កម្មករ-កម្មការរិនីនៅតាមរោងចក្រ បារម្ភខ្លាំងចំពោះសុវត្ថិភាព និងសុខភាពរបស់ពួកគេ ក្នុងស្ថានភាពនៃការរីករាលដាលជំងឺកូវីដ-១៩ និងការខាតបង់ប្រាក់អត្ថប្រយោជន៍ ប្រសិនបើពួកគេឆ្លងជំងឺ ហើយរដ្ឋាភិបាលមិនបានយកចិត្តទុកដាក់ ផ្តល់អាទិភាពដល់ក្រុមកម្មករ។ កម្មការិនីរោងចក្រកាត់ដេរ ប័ររី (Berry) ជម្ពូវ័ន កញ្ញា ហេង បូរី ព្រួយបារម្ភពីស្ថានភាពរីលរាលដាលជំងឺកូវីដ-១៩ ដែលនៅរោងចក្រកញ្ញាកំពុងធ្វើការមានកម្មករច្រើន។ ពួកគេធ្វើដំណើរតាមរថយន្តជិះបញ្ជ្រៀតគ្នាមិនរក្សាគម្លាតសុវត្ថិភាព អាចប្រឈមនឹងការឆ្លងជំងឺកូវីដ-១៩ ថ្វីត្បិតខាងរោងចក្រប្រកាសពីវិធានការការពារក៏ដោយ។ កញ្ញាស្នើទៅរដ្ឋាភិបាលគួរផ្តល់អាទិភាពចាក់វ៉ាក់សាំងកូវីដ-១៩ ដែលមានគុណភាព និងទទួលស្គាល់ដោយអង្គការសុខភាពពិភពលោកដល់កម្មកររោងចក្រ។ កញ្ញាត្អូញត្អែថា ស្ថានភាពបច្ចុប្បន្នកម្មករជួបការលំបាកខ្លាំងក្នុងជីវភាពគ្រួសារ និងជំពាក់បំណុលធនាគារ ទើបពួកគេធ្វើការទាំងប្រថុយប្រថាន៖ «គម្លាតនៃការបញ្ជៀសនៅតែអត់មានប្រសិទ្ធភាព ដូចកម្មករគាត់មកពីខេត្ត ដែលជិះមួយឡាន ៣០ ទៅ ៤០នាក់ នៅតែមិនអាចបញ្ជៀសកើត អ៊ីចឹងពួកខ្ញុំគួរតែទទួលបានអាទិភាពហ្នឹងដែរ » ។
ស្រដៀងគ្នានេះដែរ បុគ្គលិករដ្ឋបាលរោងចក្រណាត់ផាក (Nat Park) ក្រុងព្រះសីហនុកញ្ញា ញឹម ធីតា ប្រាប់អាស៊ីសេរីថា ប្រសិនបើរដ្ឋាភិបាលមិនយកចិត្តទុកដាក់ និងបន្តអូសបន្លាយការទប់ស្កាត់ជំងឺនេះ កម្មករភាគច្រើននៅតំបន់សេដ្ឋកិច្ចពិសេសក្រុងព្រះស៊ីហនុ នឹងប៉ះពាល់ដល់ជីវភាពក្នុងគ្រួសាររបស់ពួកគេ។ កញ្ញាទទូចឱ្យរដ្ឋាភិបាលយកចិត្តទុកដាក់ចំពោះសុខភាពរបស់កម្មករ និងបញ្ចុះតម្លៃទំនិញលើទីផ្សារ ដោយសារពួកគាត់ភាគច្រើនមានជីវភាពក្រីក្រ ចំណូលធ្លាក់ចុះ ចំណាយកើនឡើងក្នុងស្ថានភាពនេះ៖ «គ្រាន់តែថា ចង់ឱ្យគាត់យកចិត្តទុកដាក់ទៅលើកម្មករអីផង ដោយសារអី ពួកគាត់កម្មករច្រើនគ្រួសារ ពួកគាត់មិនធូធារប៉ុន្មានទេ អ៊ីចឹងអ៊ីវ៉ាន់អីកុំឱ្យឡើងថ្លៃ ផ្ទះជួលអីកាត់បន្ថយឱ្យពួកគាត់ ពីព្រោះស្ថានភាពកូវីដរោងចក្រខ្លះ ផ្តល់តែហាសិបភាគរយក្នុងមួយសប្តាហ៍ ឬប្តូរវេន » ។
ការលើកឡើងនេះ ធ្វើឡើងបន្ទាប់ពីកម្មករជាច្រើនបន្តការងារទាំងភ័យខ្លាច ដែលនៅកន្លែងធ្វើការមានកម្មករច្រើន និងរោងចក្រមួយចំនួនមិនអាចអនុវត្តវិធានការរក្សាគម្លាត តាមការណែនាំរបស់ក្រសួងសុខាភិបាលឲ្យបានត្រឹមត្រូវនោះទេ ស្របពេលកម្ពុជាកំពុងរីករាលដាលជំងឺកូវីដ-១៩ និងមានអ្នកស្លាប់ ហើយអ្នកជំងឺមួយចំនួនទៀតកំពុងស្ថិតក្នុងស្ថានភាពធ្ងន់ធ្ងរ។ ជាងនេះទៅទៀតករណីចម្លងក្នុងសហគមន៍ក៏បានបន្តកើនឡើងខ្ពស់។ ក្រសួងសុខាភិបាលរកឃើញករណីឆ្លងថ្មីចំនួន ៧៥នាក់ ទៀតនៅថ្ងៃទី១៧ ខែមីនា នេះ។
ជុំវិញរឿងនេះ អាស៊ីសេរីមិនអាចទាក់ទងអ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន និងអ្នកនាំពាក្យក្រសួងការងារលោក ហេង សួរ ដើម្បីសាកសួរព័ត៌មាននេះបានទេ នៅថ្ងៃទី១៧ ខែមីនា។ ប៉ុន្តែលោកនាយករដ្ឋមន្រ្តី ហ៊ុន សែន បានថ្លែងសារជាសំឡេងលើទំព័រហ្វេសប៊ុក កាលពីថ្ងៃទី១៦ ខែមីនា ថា គណៈកម្មការចំពោះកិច្ចទទួលបន្ទុកដឹកនាំការចាក់វ៉ាក់សាំងកូវីដ-១៩ ទូទាំងប្រទេស នឹងជំរុញឱ្យក្រសួងនានារៀបចំអនុគណៈកម្មការចាក់វ៉ាក់សាំង។ ចំណែកក្រសួងការងារវិជ្ជាជីវៈត្រូវទទួលខុសត្រូវការចាក់វ៉ាក់សាំងបង្ការជំងឺកូវីដ-១៩ លើកម្មករនៅតាមរោងចក្រសហគ្រាស និងកម្មករសេដ្ឋកិច្ចក្រៅប្រព័ន្ធ៖ «កន្លងទៅយើងចាក់ឱ្យអ្នកដែលប្រមូលសំរាមនៅតាមទីក្រុងភ្នំពេញជាដើម ហើយយើងនៅមានចំនួនកម្មករមួយចំនួនផ្សេងទៀត ដែលត្រូវទទួលអាទិភាពក្នុងការចាក់ » ។
កន្លងមករោងចក្រ Y & W Garment ដែលស្ថិតក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ធ្លាប់មានកម្មករស្ត្រីម្នាក់ឆ្លងជំងឺកូវីដ១៩ ហើយបច្ចុប្បន្នកំពុងសម្រាកព្យាបាលនៅឯមន្ទីរពេទ្យ។ កម្មកររោងចក្រនេះជាច្រើននាក់ទៀត ត្រូវបានក្រុមគ្រូពេទ្យយកសំណាកទៅវិភាគ និងដាក់ឲ្យធ្វើចត្តាឡីស័កនៅតាមមណ្ឌល និងផ្ទះរៀងៗខ្លួន ព្រមទាំងបិទអគារក្នុងរោងចក្រនោះ១កន្លែងផងដែរ។ ករណីនេះ ធ្វើឲ្យកម្មករភ័យខ្លាច និងព្រួយបារម្ភយ៉ាងខ្លាំង។
នៅថ្ងៃទី១៧ ខែមីនា ក្រុមគ្រូពេទ្យក៏បានរកឃើញជំងឺកូវីដ-១៩ ម្នាក់ទៀត លើស្រ្តីដែលជាសន្តិសុខធ្វើការនៅរោងចក្រកាត់ដេរ ត្រាក់ស៍ អេបភែរៀល (Trax Apparel) នៅសង្កាត់ទឹកថ្លា ខណ្ឌសែនសុខ។
ប្រធានសម្ព័ន្ធសហជីពកម្ពុជាអ្នកស្រី យ៉ាង សុភ័ណ្ឌ មានប្រសាសន៍ថា រោងចក្រមួយចំនួនមិនបានអនុវត្តវិធានការបង្ការជំងឺកូវីដ១៩ឲ្យមានប្រសិទ្ធភាព និងត្រឹមត្រូវនោះទេ ជាពិសេស គឺការរក្សាគម្លាតក្នុងពេលធ្វើការ ការញាំអាហារជុំគ្នា និងពេលជិះរថយន្តឈរជ្រៀតគ្នាជាដើម។ អ្នកស្រីថា ករណីនេះ ជាបញ្ហា មួយដែលរដ្ឋាភិបាលនិងក្រសួងសុខាភិបាលគួរយកចិត្តទុកដាក់ឲ្យបានខ្ពស់។
អ្នកស្រីយល់ឃើញថា កម្មករ គឺជាក្រុមគោលដៅប្រឈមនឹងជំងឺកូវីដ-១៩ ខ្លាំងជាងគេ ហើយកម្មករគួរទទួលបានអាទិភាពមុនគេ ដើម្បីទទួលបានវ៉ាក់សាំងកូវីដ-១៩ តាមគោលការណ៍ស្ម័គ្រចិត្ត៖ «កម្មករនឹងហើយជាចំណុចអាទិភាព ដែលត្រូវគិតចំពោះគាត់មុនគេ ព្រោះគាត់ត្រូវធ្វើការងារហ្នឹងនៅកន្លែងទីប្រជុំជន ដែលមានមនុស្សច្រើន អង្គុយជាក្រុមហូបបាយមានមនុស្សច្រើន ចង់មិនចង់ពួកគាត់ហ្នឹងហើយ ដែលកំពុងជួបប្រទះនឹងបញ្ហាប្រឈមច្រើនជាងគេ ប្រសិនណាកូវីដនឹងកាន់តែរាលដាលខ្លាំងទៅៗ ខ្ញុំគិតថា នឹងអាចប៉ះពាល់ដល់ការងាររបស់ពួកគាត់ » ។
អ្នកស្រី យ៉ាង សុភ័ណ្ឌ ស្នើឲ្យរដ្ឋាភិបាលគិតគូរផ្តល់ ឬ រក្សាអត្ថប្រយោជន៍ជូនកម្មករមានជំងឺកូវីដ-១៩ ក្នុងពេលសម្រាកព្យាបាលនៅមន្ទីពេទ្យធ្វើចត្តាឡីស័ក និងនៅពេលរោងចក្របិទដំណើរការមួយរយៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។