អាជ្ញាធរ​ខេត្ត​បន្ទាយមានជ័យ​រារាំង​លោក កឹម សុខា ជួប​ពលករ​ខ្មែរ​មក​ពី​ថៃ

ដោយ សួន សុផលមុន្នី
2014-06-19
អ៊ីម៉ែល
មតិ
Share
បោះពុម្ព
លោក កឹម សុខា ធ្វើ​សន្និសីទ​កាសែត​នៅ​ខេត្ត​បន្ទាយមានជ័យ នៅ​ពេល​ដែល​លោក​ទៅ​សួរ​សុខ​ទុក្ខ​ពលករ​ខ្មែរ​ដែល​ត្រូវ​បាន​យោធា​ថៃ​បញ្ជូន​មក​វិញ នៅ​ថ្ងៃទី ១៩ ខែ​មិថុនា ឆ្នាំ​២០១៤។
លោក កឹម សុខា ធ្វើ​សន្និសីទ​កាសែត​នៅ​ខេត្ត​បន្ទាយមានជ័យ នៅ​ពេល​ដែល​លោក​ទៅ​សួរ​សុខ​ទុក្ខ​ពលករ​ខ្មែរ​ដែល​ត្រូវ​បាន​យោធា​ថៃ​បញ្ជូន​មក​វិញ នៅ​ថ្ងៃទី ១៩ ខែ​មិថុនា ឆ្នាំ​២០១៤។
RFA/Soun Sophalmony

អាជ្ញាធរ និង​កង​កម្លាំង​សមត្ថកិច្ច បាន​រារាំង និង​បណ្ដេញ​មន្ត្រី​គណបក្ស​សង្គ្រោះ​ជាតិ ជាច្រើន​នាក់​ចេញ​ពី​ខាង​មុខ​ច្រក​ទ្វារ​អន្តរជាតិ​ប៉ោយប៉ែត ខេត្ត​បន្ទាយមានជ័យ។

ក្រុម​អាជ្ញាធរ​ចោទ​ថា វត្តមាន​របស់​ក្រុម​មន្ត្រី​គណបក្ស​ប្រឆាំង ដែល​ដឹក​នាំ​ដោយ លោក កឹម សុខា ជា​អនុប្រធាន​គណបក្ស​សង្គ្រោះ​ជាតិ នោះ ជា​ការ​រំខាន​ដល់​ការងារ​របស់​អាជ្ញាធរ​មូលដ្ឋាន និង​មាន​ចេតនា​កេង​ចំណេញ​ខាង​ផ្នែក​នយោបាយ​ពី​ពលករ​ខ្មែរ ដែល​អាជ្ញាធរ​ថៃ ចាប់​បញ្ជូន​មក​កម្ពុជា វិញ។

សំឡេង​ស៊ីផ្លេ​រថយន្ត និង​សូរ​កញ្ចែ​របស់​ប៉ូលិស​ចរាចរ បាន​បន្លឺ​ឡើង​យ៉ាង​សន្ធាប់ ដើម្បី​បំបែក​ក្រុម​ការងារ​គណបក្ស​សង្គ្រោះ​ជាតិ មួយ​ក្រុម ដែល​បាន​ព្យាយាម​ចូល​ទៅ​ជួប​ជាមួយ​ជន​ចំណាក​ស្រុក​ខ្មែរ​នៅ​ខាង​មុខ​ច្រក​ទ្វារ​អន្តរជាតិ​ប៉ោយប៉ែត៖ «សំឡេង»។

អនុ​ប្រធាន​គណបក្ស​សង្គ្រោះ​ជាតិ លោក កឹម សុខា ដែល​បាន​ដឹក​នាំ​សមាជិក​ព្រឹទ្ធសភា និង​តំណាង​រាស្ត្រ​ជាប់​ឆ្នោត​របស់​គណបក្ស​សង្គ្រោះ​ជាតិ ជាង ២០​នាក់​នោះ ថ្លែង​កាល​ពី​ព្រឹក​ថ្ងៃ​ទី​១៩ មិថុនា ថា មន្ត្រី​គណបក្ស​សង្គ្រោះ​ជាតិ បាន​ជួប​ជាមួយ​ពលករ​ខ្មែរ​បាន​បន្តិច​ប៉ុណ្ណោះ ក៏​ត្រូវ​អាជ្ញាធរ​មូលដ្ឋាន និង​កង​កម្លាំង​សមត្ថកិច្ច​រារាំង៖ «យើង​ចង់​ដឹង​សុខ​ទុក្ខ ប៉ុន្តែ​យើង​មិន​បាន​ប្រាស្រ័យ​ទាក់ទង​ឲ្យ​បាន​ល្អ​ប្រសើរ​ទេ ដោយ​មាន​ភាព​រញ៉េរញ៉ៃ ការ​វាយ​តម្លៃ​របស់​ខ្ញុំ គឺ​សមត្ថកិច្ច​នៅ​ទីនោះ​គ្មាន​សមត្ថភាព​ក្នុង​រៀបរយ​សណ្ដាប់ធ្នាប់ គ្រាន់​តែ​ពួក​យើង​ខ្ញុំ​ចុះ​មក​ទី​នេះ​ដើម្បី​បង្ហាញ​ថា ទោះ​បី​យើង​នៅ​គណបក្ស​ណា​ក៏ដោយ ពេល​ណា​ខ្មែរ​មាន​ទុក្ខ ខ្មែរ​មាន​លំបាក យើង​ត្រូវ​សាមគ្គី​គ្នា​ដើម្បី​ជួយ ទោះ​បី​គណបក្ស​សង្គ្រោះ​ជាតិ មិន​មែន​ជា​គណបក្ស​ដឹក​នាំ​រដ្ឋាភិបាល​ក៏ដោយ ក៏​យើង​អាច​ចូលរួម​ចំណែក​ក្នុង​ការ​សួរ​សុខ​ទុក្ខ»

លោក​បញ្ជាក់​បន្ថែម​ថា តំណាង​រាស្ត្រ​ជាប់​ឆ្នោត និង​សមាជិក​ព្រឹទ្ធសភា​ជាង ២០​រូប​របស់​គណបក្ស​សង្គ្រោះ​ជាតិ មាន​បំណង​ចុះ​សួរ​សុខ​ទុក្ខ​នៃ​ការ​វិល​ត្រឡប់​មក​វិញ​របស់​ពលករ​ខ្មែរ​ពី​ប្រទេស​ថៃ ចង់​ពិនិត្យ​មើល​ពី​ស្ថានភាព​នៃ​ការ​ចាប់​បញ្ជូន​ពលករ​ខ្មែរ​មក​កម្ពុជា វិញ​របស់​អាជ្ញាធរ​ថៃ និង​ការ​ដឹក​ជញ្ជូន​ពលករ​ខ្មែរ​ទៅ​ស្រុក​កំណើត​វិញ​របស់​រដ្ឋាភិបាល​កម្ពុជា។

ទន្ទឹម​គ្នា​នេះ គណបក្ស​សង្គ្រោះ​ជាតិ ក៏​បាន​នាំ​ទៅ​ជាមួយ​នូវ​ជំនួយ​មនុស្សធម៌ និង​ថ្នាំ​សង្កូវ ដើម្បី​ចែក​ជូន​ទៅ​ឲ្យ​ពលករ​ខ្មែរ ប៉ុន្តែ​បំណង​នេះ​ត្រូវ​បាន​ក្រុម​អាជ្ញាធរ​ចោទ​ថា គណបក្ស​សង្គ្រោះ​ជាតិ ព្យាយាម​កេង​ចំណេញ​ខាង​ផ្នែក​នយោបាយ​ពី​ក្រុម​ពលករ​ខ្មែរ។

អភិបាល​ខេត្ត​បន្ទាយមានជ័យ លោក គោ ស៊ុំសារឿត មាន​ប្រសាសន៍​ថា អាជ្ញាធរ​ខេត្ត​ស្នើ​ឲ្យ​ក្រុម​ការងារ​គណបក្ស​សង្គ្រោះ​ជាតិ អាច​ធ្វើ​ដំណើរ​តាម​រថយន្ត​ចូល​ទៅ​មើល​ទិដ្ឋភាព​ខាង​ក្នុង​បាន ប៉ុន្តែ​មិន​អនុញ្ញាត​ឲ្យ​ចុះ​សួរ​សុខ​ទុក្ខ​នោះ​ឡើយ។ មូលហេតុ​ដោយសារ​នៅ​ខាង​មុខ​ច្រក​ទ្វារ​អន្តរជាតិ​ប៉ោយប៉ែត នោះ ក្រុម​អាជ្ញាធរ​ពាក់ព័ន្ធ​គ្រប់​ស្ថាប័ន កំពុង​មាន​សកម្មភាព​មមាញឹក​ជួយ​ពលករ​ខ្មែរ​ដែល​គេ​ចាប់​បញ្ជូន​មក​ពី​ប្រទេស​ថៃ។

គិត​ត្រឹម​ថ្ងៃ​ទី​១៨ មិថុនា ចំនួន​ពលករ​ខ្មែរ​ដែល​ថៃ ចាប់​បញ្ជូន​មក​តាម​ច្រក​ទ្វារ​អន្តរជាតិ​ប៉ោយប៉ែត កើន​ឡើង​រហូត​ទៅ​ដល់​ជាង ២០​ម៉ឺន​នាក់។ លោក គោ ស៊ុំសារឿត បន្ថែម​ថា គណបក្ស​សង្គ្រោះ​ជាតិ ពួក​គេ​ធ្វើ​ជា​មិន​យល់​ពី​ស្ថានភាព​នេះ​ឡើយ ប៉ុន្តែ​បែរ​ជា​ចេតនា​ចង់​កេង​ចំណេញ​ផល​ប្រយោជន៍​នយោបាយ​ពី​ពលករ​ខ្មែរ​ទៅ​វិញ៖ «ខ្ញុំ​គិត​ថា គាត់​ចង់​ចំណេញ​នយោបាយ​ពលករ​មក​រាប់​ម៉ឺន​រាប់​សែន​នាក់ អ៊ីចឹង​អ្នក​ណា​ខ្លះ​ជួយ​ពលករ ព្រោះ​គេ​ឃើញ​ជាក់ស្ដែង​មាន​តែ​អាជ្ញាធរ មន្ត្រី​រាជការ កង​កម្លាំង​សមត្ថកិច្ច ដូចជា កង​រាជ​អាវុធហត្ថ ប៉ូលិស ទាហាន ​ជួយ​ធ្វើ​ទាំងអស់»

លោក​អភិបាល​ខេត្ត​យល់​ថា មន្ត្រី​គណបក្ស​សង្គ្រោះ​ជាតិ គួរ​នាំ​គ្នា​ធ្វើ​សកម្មភាព​មនុស្សធម៌​នេះ​នៅ​តាម​ខេត្ត​ក្រុង​គោលដៅ ដែល​មាន​ការ​ដឹក​ជញ្ជូន​ពលករ​ទៅ​កាន់​ស្រុក​កំណើត ប៉ុន្តែ​មិន​គួរ​មក​កេង​ចំណេញ​ខាង​ផ្នែក​នយោបាយ​ពី​ពលករ​ខ្មែរ​នៅ​ច្រក​ទ្វារ​អន្តរជាតិ​ប៉ោយប៉ែត នោះ​ឡើយ។

ទោះ​យ៉ាង​នេះ​ក្តី លោក កឹម សុខា ជា​អនុប្រធាន​គណបក្ស​សង្គ្រោះ​ជាតិ បាន​អះអាង​ថា ក្រុម​ការងារ​គណបក្ស​សង្គ្រោះ​ជាតិ នឹង​ព្យាយាម​ចូល​ទៅ​ជួប​ពលករ​ខ្មែរ​ឲ្យ​បាន​នៅ​ខាង​មុខ​ច្រក​ទ្វារ​អន្តរជាតិ​ប៉ោយប៉ែត ប៉ុន្តែ​នៅ​ប៉ុន្មាន​នាទី​ក្រោយ​មក លោក កឹម សុខា បាន​ប្ដូរ​ឥរិយាបថ​ដឹក​នាំ​ក្រុម​ការងារ​គណបក្ស​សង្គ្រោះ​ជាតិ ដក​ថយ​ទៅ​កាន់​ទី​រួម​ខេត្ត​បន្ទាយមានជ័យ វិញ។

ទាក់ទិន​បញ្ហា​នេះ អ្នក​វិភាគ​បញ្ហា​សង្គម លោក កែម ឡី បាន​ប្រៀប​ប្រដូច​រដ្ឋាភិបាល និង​គណបក្ស​ប្រឆាំង ក្លាយ​ខ្លួន​ទៅ​ជា​អ្នក​រត់​តាក់ស៊ី​នៅ​ផ្សារ​ថ្មី។ ភាគី​ទាំង​ពីរ​នាំ​គ្នា​ដណ្ដើម​ម៉ូយ​គ្នា ដែល​បណ្ដាល​ឲ្យ​មាន​ការ​បាត់​បង់​របស់​របរ រងគ្រោះ​ដល់​ពលករ​ខ្មែរ៖ «តាម​ពិត​ប្រទេស​ដែល​អាសន្ន​មាន​បញ្ហា​ធំ​អ៊ីចឹង នាយក​រដ្ឋមន្ត្រី ប្រធាន​គណបក្ស​ប្រឆាំង ប្រធាន​បណ្ដេញ អ៊ិន.ជី.អូ (Ngo) ត្រូវ​តែ​អង្គុយ​ជាមួយ​គ្នា ជជែក​គ្នា ហើយ​រក​យុត្តិសាស្ត្រ​ជួយ​ឲ្យ​មាន​និរន្តរភាព អា​ហ្នឹង​ជា​គោលការណ៍។ ទី​២ រក​យុទ្ធសាស្ត្រ​ហ្នឹង​មិន​មែន​ដណ្ដើម​គ្នា​ដូច​អ្នក​រត់​តាក់ស៊ី​នៅ​ផ្សារ​ថ្មី​អ៊ីចឹង​ទេ គឺ​ត្រូវ​រៀបចំ​ថវិកា​យក​ធនធាន​ពី​ណា​មក»

លោក​បន្ត​ថា រដ្ឋាភិបាល​បាន​ចំណាយ​ថវិកា​ច្រើន​សន្ធឹក​សន្ធាប់​នៅ​គ្រា​ខ្លួន​មាន​អាសន្ន។ ជំនួយ​នេះ​ពលករ​ខ្មែរ​ទទួល​បាន​ផល​ប្រយោជន៍​តិចតួច​បំផុត ប៉ុន្តែ​ផល​ប្រយោជន៍​ច្រើន​បាន​ទៅ​លើ​អ្នក​ជួយ ដូចជា មន្ត្រី​គ្រោះ​មហន្តរាយ និង​មន្ត្រី​កាក​បាទ​ក្រហម។ លោក កែម ឡី សង្កត់​ធ្ងន់​ថា៖ «យើង​ត្រូវ​គិត​ធ្វើ​ម៉េច​ឲ្យ​មាន​តម្លាភាព​ក្នុង​ការ​ជួយ ហើយ​ចៀសវាង​ការ​កេង​ចំណេញ​នយោបាយ​ពី​គ្នា​ទៅ​វិញ​ទៅ​មក»

ផ្អែក​លើ​ស្ថានភាព​ជាក់ស្តែង គេ​សង្កេត​ឃើញ​ថា ពលករ​ខ្មែរ​ទាំង​នោះ​បាន​អំពាវនាវ​រក​ការ​ជួយ​សង្គ្រោះ​បឋម នូវ​អ្វី​ដែល​ពួក​គាត់​បាត់​បង់ និង​ការ​ប្រឈម​នឹង​គ្រោះថ្នាក់ រួម​ទាំង​បញ្ហា​លំបាក​ផ្សេង​ទៀត ដោយ​ពុំ​បាន​គិត​ពី​រឿង​នយោបាយ​នោះ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

Hun Sen authority help them or squeeze them for money ?

Jun 19, 2014 09:13 AM

គេហទំព័រ​ទាំងមូល