ពលរដ្ឋ​នៅ​កោះកុង​ដាក់​ញត្តិ​ទាមទារ​ឲ្យ​ផ្អាក​គម្រោង​សង់​ទំនប់​វារីអគ្គិសនី​ស្ទឹង​អារ៉ែង

ដោយ ដែន អយុធ្យា
2014.03.31
Share on WhatsApp
Share on WhatsApp
កោះកុង ទំនប់​វារីអគ្គិសនី​ស្ទឹង​អារ៉ែង ៦១០ ប្រជាពលរដ្ឋ​មក​ពី ៣​ឃុំ នៅ​ស្រុក​ថ្មបាំង ខេត្ត​កោះកុង ហែរ​ក្បួន​តាម​ម៉ូតូ​ទៅ​ប្រមូល​ផ្តុំ​គ្នា​នៅ​​មុខ​សាលា​ខេត្ត​កោះកុង ដើម្បី​ដាក់​ញត្តិ​ជូន​អាជ្ញាធរ ស្នើ​ឲ្យ​ផ្អាក​​គម្រោង​សាងសង់​ទំនប់​វារីអគ្គិសនី​ស្ទឹង​អារ៉ែង នៅ​ព្រឹក​ថ្ងៃ​៣១ មីនា ឆ្នាំ​២០១៤។
Licadho Photo

ប្រជាពលរដ្ឋ​ជនជាតិ​ដើម​ភាគ​តិច​ជង ចំនួន ៣​ឃុំ នៅ​ស្រុក​ថ្មបាំង បាន​ធ្វើ​ដំណើរ​ដោយ​មធ្យោបាយ​ម៉ូតូ ឆ្ពោះ​ទៅ​ដាក់​ញត្តិ​ជូន​អាជ្ញាធរ​ខេត្ត​កោះកុង ដើម្បី​ស្នើ​ឲ្យ​ផ្អាក​គម្រោង​សាងសង់​ទំនប់​វារីអគ្គិសនី​ស្ទឹង​អារ៉ែង របស់​​ក្រុមហ៊ុន​ចិន ឈ្មោះ ស៊ីណូ ហាយត្រូ (Sino hydro)។

មន្ត្រី​សិទ្ធិ​មនុស្ស​បាន​ឲ្យ​ដឹង​ថា គម្រោង​សង់​ទំនប់​វារីអគ្គិសនី​ស្ទឹង​អារ៉ែង នាំ​ឲ្យ​ប៉ះពាល់​ផ្ទះ និង​ការ​រស់​នៅ​របស់​ប្រជាពលរដ្ឋ​ជាង ៦០០​គ្រួសារ​នៅ​ជុំវិញ​តំបន់​នោះ។

តំណាង​ជនជាតិ​ដើម​ភាគ​តិច​ជង លោក វ៉ែន វ៉ន បាន​ឲ្យ​ដឹង​ថា មាន​ពលរដ្ឋ​ជនជាតិ​ដើម​ភាគ​តិច​ជង ជិត ២០០​គ្រួសារ បាន​មក​ប្រមូល​ផ្តុំ​គ្នា​នៅ​មុខ​សាលា​ខេត្ត​កោះកុង ​ដាក់​ញត្តិ​ជូន​អាជ្ញាធរ​ខេត្ត​ស្នើ​ឲ្យ​រដ្ឋាភិបាល​ផ្អាក​គម្រោង​​សាងសង់​ទំនប់​វារីអគ្គិសនី​ស្ទឹង​អារ៉ែង ដែល​រដ្ឋាភិបាល​ផ្តល់​សិទ្ធិ​ឲ្យ​ក្រុមហ៊ុន​ចិន ឈ្មោះ ស៊ីណូ ហាយត្រូ។

តំណាង​រូប​នេះ​បាន​អះអាង​ថា បើ​សិន​ជា​សំណង់​ទំនប់​វារីអគ្គិសនី​ស្ទឹង​អារ៉ែង កើត​មាន​ជា​រូបរាង​មែន​នោះ នោះ​នឹង​ប៉ះពាល់​ដល់​ការ​រស់នៅ​របស់​ជនជាតិ​ដើម​ភាគ​តិច​ជង ពួកគាត់​ជាង ៦០០​គ្រួសារ ដែល​ធ្លាប់​រស់​នៅ​តំបន់​នេះ​តាំង​​ពី​ដូន​តា​មក ជា​ពិសេស​នឹង​បំផ្លាញ​នូវ​បរិស្ថាន ធនធាន​ធម្មជាតិ មាន​សត្វ​ព្រៃ និង​ព្រៃ​ឈើ​ជាដើម៖ «ខ្ញុំ​ជា​ជនជាតិ​ដើម​ភាគ​តិច​ជង រស់​នៅ​តំបន់​នោះ​តាំង​ពី​យូរ​មក​ហើយ ហើយ​ឪពុក​ម្តាយ​ខ្ញុំ​ក៏​ស្រុក​កំណើត​របស់​គាត់​នៅ​ទី​ហ្នឹង​ដែរ។ ទាក់ទង​ទំនប់​វារីអគ្គិសនី​ហ្នឹង ទី​១ គាត់​ចង់​បញ្ឈប់​គម្រោង​សាងសង់​ទំនប់​វារីអគ្គិសនី​ហ្នឹង និង​ទី​២ គាត់​មិន​ចង់​ឲ្យ​មាន​ការ​សិក្សា​ស្រាវជ្រាវ​រ៉ែ សត្វ​ព្រៃ និង​ព្រៃ​ឈើ​ផ្សេងៗ»

មន្ត្រី​សិទ្ធិ​មនុស្ស និង​តំណាង​ពលរដ្ឋ​បាន​ឲ្យ​ដឹង​ថា មក​ដល់​ម៉ោង​ជាង ២​រសៀល ថ្ងៃ​ច័ន្ទ ទី​៣១ ខែ​មីនា មន្ត្រី​សាលា​ខេត្ត​កោះកុង បាន​ចេញ​មក​ទទួល​យក​​​ញត្តិ​របស់​ជនជាតិ​ដើម​ភាគ​តិច​ជង ដែល​បាន​មក​ប្រមូល​ផ្តុំ​គ្នា​នៅ​មុខ​សាលា​ខេត្ត​កោះកុង។ មន្ត្រី​ខេត្ត​កោះកុង​បាន​សន្យា​ថា នឹង​យក​ញត្តិ​របស់​​ប្រជាពលរដ្ឋ​ដាក់​ជូន​ប្រមុខ​​រាជរដ្ឋាភិបាល និង​ក្រសួង​ពាក់ព័ន្ធ​ ដើម្បី​ពិនិត្យ​ពិចារណា។

លោក អ៊ិន គង់ជិត មន្ត្រី​សម្របសម្រួល​​​អង្គការ​សិទ្ធិ​មនុស្ស​លីកាដូ ប្រចាំ​ខេត្ត​កោះកុង ដែល​តាម​ឃ្លាំមើល​សកម្មភាព​ហែ​ញត្តិ​របស់​ជនជាតិ​ដើម​ភាគ​តិច​ជង។ លោក​បាន​ឲ្យ​ដឹង​ថា ការ​ធ្វើ​ដំណើរ​របស់​ជនជាតិ​ដើម​ជង មាន​ចំនួន​ជិត ២​នាក់ នៅ​ព្រឹក​ថ្ងៃ​ច័ន្ទ ទី​៣១ ខែ​មីនា បាន​មក​ដល់​មុខ​សាលា​កោះកុង ដោយ​មិន​មាន​សមត្ថកិច្ច​រារាំង​ទេ។

លោក អ៊ិន គង់ជិត បាន​ឲ្យ​ដឹង​ទៀត​ថា បើសិន​គម្រោង​សាង់​សង់ទំនប់​វារីអគ្គិសនី​ស្ទឹង​អារ៉ែង ក្លាយ​ជា​ការ​ពិត នឹង​នាំ​ឲ្យ​ប៉ះពាល់​ដល់​ការ​រស់​នៅ​របស់​ពលរដ្ឋ​ក្នុង​តំបន់​នោះ​​​ជាង ៦០០​គ្រួសារ៖ «ករណី​នេះ​អាជ្ញាធរ​ខេត្ត​គួរ​តែ​យក​ញត្តិ​របស់​គាត់​ដាក់​ជូន​ទៅ​រាជ​រដ្ឋាភិបាល​កម្ពុជា ដើម្បី​ពិនិត្យ​ពិចារណា និង​គិតគូរ​ឡើង​វិញ​អំពី​គម្រោង​ទំបន់​វារីអគ្គិសនី​អារ៉ែង។ ព្រោះ​ពេល​នេះ​សហគមន៍​ពួកគាត់ ៦០០​គ្រួសារ​ហ្នឹង គឺ​មិន​ត្រូវ​ការ​ទំនប់​វារីអគ្គិសនី​ទេ បើ​កាល​ណា​តំបន់​ហ្នឹង​ធ្វើ​ទំនប់ គឺ​ពួក​គាត់​នឹង​ត្រូវ​បាន​គេ​ជម្លៀស​ចេញ ហើយ​ធនធាន​ធម្មជាតិ​នៅ​តំបន់​នោះ នឹង​ត្រូវ​បាត់បង់ ឬ​ខូចខាត​ទាំង​ស្រុង។ មាន​ដូច​ជា​ព្រៃ​ឈើ មាន​តំបន់​ព្រៃ​អភិរក្ស មាន​សត្វ​ព្រៃ ដូចជា​ក្រពើ​ភ្នំ ត្រី​នាគ និង​សត្វ​ផ្សេងៗ​ទៀត ដែល​កំពុង​ត្រូវ​បាន​អភិរក្ស​កន្លង​មក​ជា​យូរ​ឆ្នាំ​មក​ហើយ»

​​​គម្រោង​សង់​ទំនប់​វារីអគ្គិសនី​នេះ បាន​ឈាន​ដល់​ប្រជាពលរដ្ឋ​នៅ​ស្រុក​ថ្មបាំង ចំនួន ៣​ឃុំ បាន​​តវ៉ា​និង​ឈាន​ដល់​បិទ​ផ្លូវ​ចេញ​ចូល​ទៅ​តំបន់​អារ៉ែង មិន​ឲ្យ​គ្រឿង​ចក្រ​របស់​ក្រុមហ៊ុន​ចិន ចេញ​ចូល​ក្នុង​តំបន់​​​​នោះ អស់​រយៈ​ពេល ២​សប្តាហ៍​​មក​ហើយ។

​មន្ត្រី​អង្គការ​លីកាដូ ប្រចាំ​ខេត្ត​កោះកុង បាន​ឲ្យ​ដឹង​បន្ត​ទៀត​ថា ទំនបន់​​វារីអគ្គិសនី​ស្ទឹង​អារ៉ែង​​​ បាន​ប៉ះ​ពាល់​ឃុំ​ចំនួន​​បី គឺ​ឃុំ​ជំនាប់ ឃុំ​ប្រឡាយ និង​​​​ឃុំ​ថ្មដូនពៅ ហើយ​មាន​ប្រជាពលរដ្ឋ​​​​រង​ផល​ប៉ះពាល់​ប្រមាណ​​ជាង ៦០០​​គ្រួសារ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។