មន្ត្រីសិទ្ធិមនុស្សជំរុញឲ្យតុលាការស្វែងរកយុត្តិធម៌ជូនជនរងគ្រោះដោយសារគ្រោះថ្នាក់ចរាចរណ៍ ដែលបង្កឡើងដោយកូនប្រុសរបស់មេធាវី ព្រហ្ម វិចិត្រសុភា បានបើកឡានទំនើប ម៉ាក Jeep បុកកីឡាករវាយសីដ៏ឆ្នើមម្នាក់គឺលោក សៀង គីមហុង កាលពីពេលថ្មីៗនេះ។
ការលើកឡើងរបស់មន្ត្រីសិទ្ធិមនុសុ្សនេះ នៅស្របពេលម្ដាយរបស់ជនបង្កបានប្ដឹងភរិយា និងក្រុមគ្រួសាររបស់ជនរងគ្រោះពីបទបរិហារកេរ្តិ៍ទៅវិញ។
មន្ត្រីសិទ្ធិមនុស្ស សម្ដែងការសោកស្ដាយ ដែលម្ដាយជនបង្កបើកឡានបុក លោក សៀង គីមហុង ស្លាប់ បានដាក់ពាក្យប្ដឹងភរិយា និងក្រុមគ្រួសាររបស់លោកថែមទៀត។
នាយកទទួលបន្ទុកកិច្ចការទូទៅនៃអង្គការលីកាដូ (LICADHO) លោក អំ សំអាត ឲ្យដឹងថា ករណីនេះក្រុមគ្រួសារជនបង្កប្ដឹងគ្រួសារជនរងគ្រោះជាសិទ្ធិ ក៏ប៉ុន្តែ តុលាការគួរតែរកយុត្តិធម៌ជូនជនរងគ្រោះ ដើម្បីបង្ហាញពីការអនុវត្តច្បាប់ដោយស្មើភាពគ្នានៅចំពោះមុខច្បាប់។
លោក អំ សំអាត៖ «ការប្ដឹងជាសិទ្ធិមួយ ប៉ុន្តែតុលាការ និងអាជ្ញាធរគួរតែពិនិត្យពិចារណាដែរ ថា តើជាកំហុសរបស់អ្នកណា?បើសិនជាយើងនាំគ្នាអនុវត្តច្បាប់ដោយត្រឹមត្រូវ គ្មានការយោគយល់ គ្មានបក្ខពួកនិយម ។ អ្នកបង្កគ្រោះថ្នាក់ចរាចរណ៍ដោយស្មើភាពគ្នា ពលរដ្ឋជនរងគ្រោះ ទទួលបានយុត្តិធម៌ ហើយអ្នកដែលបង្កត្រូវទទួលទោសតាមផ្លូវច្បាប់»។
ការលើកឡើងរបស់មន្ត្រីសិទ្ធិមនុស្សនេះ ធ្វើឡើងនៅក្រោយពេល ភរិយាជនរងគ្រោះ អ្នកស្រី គ្រុយ ឈិញលាំង បានសរសេរសារបង្ហោះលើបណ្ដាញសង្គមហ្វ៊េសប៊ុក ឈ្មោះ Juppy កាលពីថ្ងៃទី១៦ មករា បង្ហោះដីកាកោះហៅរបស់តុលាការសរសេរថា ពី “ជនរងគ្រោះ ក្លាយទៅជាជនសង្ស័យ” ។
អ្នកស្រីបានសរសេររៀបរាប់ទៀតថា «ឃើញដីកាកោះហៅ ខ្ញុំហួសចិត្តមិនដឹងនិយាយយ៉ាងណាឱ្យសម!ជនបង្កប្តឹង គ្រួសារជនរងគ្រោះដែលព្យាយាមស្ងប់ស្ងាត់ចាំការកោះហៅក្នុងការចូលខ្លួនដោះស្រាយតាមផ្លូវច្បាប់?ហេតុអ្វីមិនដោះស្រាយរឿងបុកប្តីខ្ញុំស្លាប់ ដើម្បីឱ្យខ្ញុំ និងកូនព្រមទាំងគ្រួសារសាច់ញាតិបានស្ងប់ចិត្ត បែរជាមកប្តឹងខ្ញុំជាប្រពន្ធ ព្រមទាំងឪពុកធំរបស់ប្តីខ្ញុំ និងប្អូនថ្លៃខ្ញុំ ២នាក់ទៀត ដែលជាប្អូនស្រីបង្កើតរបស់ប្តីខ្ញុំ?ក្រុមគ្រួសារយើងបានសំងំស្ងប់ រង់ចាំការដោះស្រាយតាមផ្លូវតុលាការ និងរង់ចាំមើលឆន្ទៈរបស់អ្នក តែអ្នកបែរជាធ្វើបែបនេះ?»។
ភរិយាជនរងគ្រោះបានសរសេររៀបរាប់ដូច្នេះ នៅក្រោយពីពួកគាត់បានទទួលដីកាកោះហៅពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញលោក សេង ម៉េងស្រ៊ុន ចុះថ្ងៃទី១៣មករា។ ដីកាកោះហៅឲ្យអ្នកស្រី គ្រុយ ឈិញលាំង និងក្រុមគ្រួសាររបស់អ្នកស្រី ចូលខ្លួននៅតុលាការនៅថ្ងៃទី២៤ មករា តាមបណ្ដឹងរបស់ម្ដាយជនបង្ក គឺអ្នកស្រី សុខលីណា ប្ដឹងពីបទចោទដូចៗគ្នា គឺបទ បទបរិហារកេរ្តិ៍ជាសាធារណៈ បទបរិហារកេរ្តិ៍តាមសារព័ត៌មាន និងបទជេរប្រមាថជាសាធារណៈ។
វិទ្យុអាស៊ីសេរី មិនអាចទាក់ទង អ្នកស្រី គ្រុយ ឈិញលាំង ដែលជាភរិយាជនរងគ្រោះ ដើម្បីសុំសួរអំពីបញ្ហានេះបន្ថែមបានទេ កាលពីថ្ងៃទី១៧ មករា។ រីឯដើមបណ្ដឹង អ្នកស្រី សុខ លីណា ក៏វិទ្យុអាស៊ីសេរីមិនអាចទាក់ទងសុំសួរបន្ថែមអំពីករណីអ្នកស្រីប្ដឹងភរិយា និងក្រុមគ្រួសារជនរងគ្រោះនេះ បាននៅឡើយដែរ។ ប៉ុន្តែ លោកស្រី សុខ លីណា បាននិយាយតាមបណ្ដាញសង្គម (Facebook)ថា ការចោទប្រកាន់ថា លោកប្រុសលោកស្រីប្រណាំងឡាន និងស្រវឹងស្រា មិនត្រឹមត្រូវនោះទេ។ លោកស្រីថា មានតែតុលាការជាអ្នកសម្រេច។
កូនប្រុសអ្នកស្រី សុខ លីណា គឺលោក ព្រហ្ម វិចិត្រសុសក្ដា បានបើកឡានទំនើបម៉ាក (Jeep) បានបុកលោក សៀង គីមហុង ដែលជាកីឡាករវាយសីឆ្នើមរបស់កម្ពុជា នៅសង្កាត់បឹងកក់២ បណ្ដាលឱ្យស្លាប់ នៅកន្លែងកើតហេតុ កាលពីថ្ងៃទី១៤ ធ្នូ។ បន្ទាប់ពីគ្រោះថ្នាក់ចរាចរណ៍លោក ព្រហ្ម វិចិត្តសុសក្ដា បានរត់គេចអស់រយៈពេលជាង ១សប្ដាហ៍ ទើបជនបង្ករូបនោះ ចូលខ្លួនសារភាពនៅស្នងការដ្ឋាននគរបាលរាជធានីភ្នំពេញ ក្រោយពីមានការអំពាវនាវពីស្នងការនគរបាលរាជធានីភ្នំពេញ និងរដ្ឋមន្ត្រីក្រសួងយុត្តិធម៌ជាដើម។
នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត បន្ថែមថា តុលាការនៅមិនទាន់កាត់ទោសឲ្យជនបង្កជាប់ទោសនៅឡើយ មកទល់ពេលនេះ។ លោកជំរុញឲ្យតុលាការស្វែងរកយុត្តិធម៌ជូនជនរងគ្រោះឲ្យបានឆាប់ ជាពិសេសក្រុមគ្រួសាររបស់ជនរងគ្រោះគួរតែជៀសផុតការចោទប្រកាន់នានាពីតុលាការ។
លោក អំ សំអាត៖ «ពេលដែលមានគ្រោះថ្នាក់ចរាចរណ៍បណ្ដាលឲ្យមនុស្សស្លាប់ហើយ ហើយគេចពីការទទួលខុសត្រូវ គឺច្បាប់ត្រូវទម្ងន់ទោសបន្ថែមទៀត។ មិនមែនទុកឲ្យមានការិះគន់ពីមហាជន និងមានប្រតិកម្មពីសម្ដេចនាយករដ្ឋមន្ត្រី ទើបមានការអនុវត្តច្បាប់លើករណីនេះ។ អីចឹងករណីនេះវាមានភាពមិនប្រក្រតីរួចទៅហើយ អ៊ីចឹងហើយទើបមានការិះគន់ជាពិសេសក្រុមគ្រួសារជនរងគ្រោះជាដើម»។
ទោះជាយ៉ាងណា ដីកាកោះរបស់ព្រះរាជអាជ្ញារង លោក សេង ម៉េងស្រ៊ុន កោះហៅ ភរិយាជនរងគ្រោះ និងក្រុមគ្រួសារនេះ មិនបានបញ្ជាក់អំពីមូលហេតុអ្វីពិតប្រាកដឡើយ គ្រាន់តែឲ្យទៅបំភ្លឺពីបទបរិហារកេរ្តិ៍តាមបណ្ដឹងរបស់ម្ដាយជនបង្ក អ្នកស្រី សុខ លីណា តែប៉ុណ្ណោះ។
ភរិយាជនរងគ្រោះ អ្នកស្រី គ្រុយ ឈិញលាំង បានឲ្យកាសែតក្នុងស្រុកដឹងកាលពីថ្ងៃទី១៦ មករា ថា អ្នកស្រីមិនទាន់អាចបញ្ជាក់ថា អ្នកស្រីនឹងចូលខ្លួនទៅបំភ្លឺតាមដីកាកោះនេះ ឬយ៉ាងណាទេ ដោយសារនៅជាប់រវល់ពេក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។