ប័ណ្ណសារព័ត៌មាន
2023-12-31
ប្រជានេសាទនៅតំបន់បឹងទន្លេសាប ខេត្តបាត់ដំបងលើកឡើងថា នៅក្នុងរដូវរងា ដែលជាខែសម្បូរត្រី បទល្មើសនេសាទនៅតែកើតមាន ដោយសារមន្ត្រីជលផលទទួលសំណូកពីជនល្មើស និងទុកឱកាសឱ្យអ្នកប្រព្រឹត្តបានរួចខ្លួន។ សង្គមស៊ីវិលជំរុញឱ្យអាជ្ញាធរថ្នាក់ជាតិ ចុះធ្វើអធិការកិច្ចលើប្រសិទ្ធភាពការងាររបស់មន្ត្រីនៅតាមមូលដ្ឋាន ដើម្បីធានាបាននូវការអនុវត្តច្បាប់មានតម្លាភាព និងត្រឹមត្រូវ។
2023-12-31
ជនភៀសខ្លួនខ្មែរ ៧នាក់ត្រូវបានសមត្ថកិច្ចថៃឃុំខ្លួន ក្រោយពួកគេចូលរួមសិក្ខាសាលាសន្ធិសញ្ញាសន្តិភាពក្រុងប៉ារីស ក្នុងទីក្រុងបាងកក។ អង្គការឃ្លាំមើលសិទ្ធិមនុស្សអន្តរជាតិ ចាត់ទុកការចាប់ខ្លួនសកម្មជនទាំង ៧ នាក់ ថា ជារឿងមិនត្រឹមត្រូវ និងផ្ទុយពីគោលការណ៍សិទ្ធិមនុស្សអន្តរជាតិ។
2023-12-31
កម្មកររោងចក្រមួយចំនួនអះអាងថា ដោយសារតែប្រាក់ចំណូលទាប ពួកគាត់កាត់បន្ថយការហូបចុកដើម្បីសន្សំប្រាក់បង់ធនាគារ និងផ្ទះជួល។ មន្ត្រីសហជីពបារម្ភថា បញ្ហានេះនឹងប៉ះពាល់សុខភាពកម្មករ និងកូនរបស់ពួកគាត់ប្រសិនបើរដ្ឋាភិបាលនៅតែគ្មានវិធានការដោះស្រាយ។
2023-12-31
ប្រជាសហគមន៍ភូមិឡុំ នៅខេត្តរតនគីរី តាមព្រំដែនកម្ពុជា-វៀតណាមអះអាងថា ក្រុមឈ្មួញកំពុងសម្រុកចូលកាប់ និងដឹកជញ្ជូនឈើ ចេញពីតំបន់ព្រៃការពារ និងព្រៃសហគមន៍ភូមិឡុំ យកទៅលក់នៅប្រទេសវៀតណាមដោយសេរីជារៀងរាល់ថ្ងៃ។ ចំណែកអាជ្ញាធរពាក់ព័ន្ធនៅតំបន់នោះវិញ មិនបានចុះទប់ស្កាត់នោះទេ ទោះបីពួកគេស្នើទៅអាជ្ញាធរជាច្រើនសាយ៉ាងណាក្ដី។
2023-12-30
ទីប្រឹក្សាគណបក្សកម្លាំងជាតិរិះគន់ការបន្តតែងតាំងលោក ទេព នីថា ធ្វើជាអគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប)។ ទីប្រឹក្សាគណបក្សនេះថា ការតែងតាំងនេះ នឹងធ្វើឱ្យសាធារណជនមិនមានជំនឿទៅលើស្ថាប័ននេះ ធ្វើការដោយឯករាជ្យ។
2023-12-30
ជនបង្កដែលបើករថយន្តសេរីទំនើបម៉ាក ហាំម័រ (Hummer) បុកមនុស្សជិះម៉ូតូ៣នាក់ បណ្ដាលឲ្យមនុស្ស២នាក់បាត់បង់ជីវិត បានចូលខ្លួនសារភាពកំហុស នៅស្នងការដ្ឋាននគរបាលរាជធានីភ្នំពេញ។
2023-12-30
មន្ត្រីសហជីព និងអង្គការសង្គមស៊ីវិល ស្នើសុំឱ្យក្រសួងការងារពន្លឿនការឆ្លើយតបចំពោះសំណើស្នើឱ្យក្រសួងបង្កើតគោលការណ៍ និងពង្រឹងការអនុវត្តសេវារបបបេឡាជាតិសន្តិសុខសង្គម ឬហៅថា ប.ស.ស ទៅដល់កម្មករគ្រប់វិស័យ។ មន្ត្រីសហជីពយល់ឃើញថា ក្រសួងការងារគួរតែយកចិត្តទុកដាក់ផ្ដល់ប័ណ្ណប.ស.សជូនកម្មករដើម្បីអាចឱ្យពួកគាត់មានលទ្ធភាពព្យាបាលជំងឺ និងទទួលបានអត្ថប្រយោជន៍ផ្សេងៗ។
2023-12-30
លោកនាយករដ្ឋមន្ត្រី ហ៊ុន ម៉ាណែត ជំរុញឲ្យបង្កើនការផ្សព្វផ្សាយនយោបាយឈ្នះឈ្នះរបស់ឪពុកលោក ឱ្យកាន់តែទូលាយ និងដាក់បញ្ចូលនយោបាយឈ្នះឈ្នះ ទៅក្នុងកម្មវិធីសិក្សា និងគម្រោងសាងសង់ស្តូបឈ្នះឈ្នះបន្ថែមទៀត។ ការលើកឡើងនេះធ្វើឡើងនៅក្នុងប្រារព្ធពិធីរំឭកខួបអនុស្សាវរីយ៍លើកទី២៥ នៃទិវានយោបាយឈ្នះឈ្នះ និងខួប ៥ ឆ្នាំនៃការកសាងវិមានឈ្នះឈ្នះ។ អ្នកឃ្លាំមើលលើកឡើងថា រដ្ឋាភិបាលកំពុងបំភ្លៃប្រវត្តិសាស្ត្រ មកកុហកប្រជាពលរដ្ឋខ្មែរ ដើម្បីផលប្រយោជន៍បក្ខពួក ក្រុមគ្រួសារត្រកូលហ៊ុន។
2023-12-30
គិតត្រឹមម៉ោង១១ យប់ ថ្ងៃទី២៩ ធ្នូ ម្សិលមិញ សមត្ថកិច្ចថៃបានបញ្ជូនជនភៀសខ្លួនខ្មែរចំនួននាក់ ៧នាក់ ពីប៉ុស្តិ៍នគរបាលមូលដ្ឋាន យកទៅឃុំខ្លួននៅប៉ុស្តិ៍នគរបាលអន្តោប្រវេសន៍ ឬហៅថា តម៉សួនភ្លូ ដើម្បីបន្តសាកសួរ អំពីការចូលរួមវគ្គសិក្សាស្វែងយល់ពីកិច្ចព្រមព្រៀងសន្តិភាពទីក្រុងប៉ារីស ២៣ តុលា នៅក្នុងទីក្រុងបាងកក ដែលមានអ្នកចូលរួមជាង ៣០នាក់ កាលពីព្រឹកថ្ងៃទី២៩ ខែធ្នូ។
2023-12-30
មន្ត្រីអង្គការសង្គមស៊ីវិល ទទូចដល់អាជ្ញាធរពន្លឿនការស្រាវជ្រាវស្វែងរកជនបង្កគ្រោះថ្នាក់ចរាចរណ៍ ដែលបានបើកឡានទំនើបបុកមនុស្សស្លាប់ ដើម្បីស្វែងរកយុត្តិធម៌ដល់ក្រុមគ្រួសារជនរងគ្រោះ ។ ការលើកឡើងនេះ ក្រោយពីអាជ្ញាធរបានឃាត់រថយន្តបង្ក តែនៅពុំទាន់ឃាត់ខ្លួនអ្នកបើកបរបាននៅឡើយ។
2023-12-29
ក្រសួងសុខាភិបាលនៅយប់ថ្ងៃទី២៨ ខែធ្នូ បានប្រកាសព័ត៌មានអំពីការរកឃើញវីរុសកូវីដ១៩ បំប្លែងថ្មីប្រភពអូមេក្រុង ជេអនវ័ន (Omicron JN1) តែក្រសួងអះអាងថា អ្នកជំងឺទាំងនោះទទួលបានការព្យាបាលជាសះស្បើយដោយបន្តធ្វើចត្តាឡីស័កនៅតាមផ្ទះរៀងៗ ខ្លួន។ ក្រសួងបញ្ជាក់ដោយផ្អែកតាមអង្គការសុខភាពពិភពលោកថាជំងឺកូវីដ១៩ ប្រភេទថ្មីនេះ មិនសូវមានសភាពធ្ងន់ធ្ងរទេ។
2023-12-29
សកម្មជនដីធ្លីខេត្តកោះកុង លោក មិន អាន់ ស្នើដល់តុលាការកំពូលឱ្យទម្លាក់បទចោទប្រកាន់ ហើយលោកនៅតែអះអាងថា លោកមិនបានក្លែងបន្លំឯកសារ ដូចការចោទប្រកាន់របស់ភាគីម្ខាងទៀតនោះទេ។ ការស្នើសុំនេះ បន្ទាប់ពីតុលាការកំពូលបើកសវនាការ នៅព្រឹកថ្ងៃទី២៩ ធ្នូ ហើយគ្រោងប្រកាសសាលដីកា នៅថ្ងៃទី៨ ខែមករាខាងមុខ។
2023-12-29
មន្ត្រីសង្គមស៊ីវិលយល់ឃើញថា ការកាត់ដីឧទ្យានជាតិ និងទ្រព្យសម្បត្តិសាធារណៈរបស់រដ្ឋទៅឱ្យបុគ្គលឯកជនកាន់កាប់ទាំងនោះ ធ្វើឡើងដោយមិនមានតម្លាភាពនោះទេ និងស្នើឱ្យរដ្ឋាភិបាលគួរវាយតម្លៃអំពីផលប្រយោជន៍ទ្រព្យសម្បត្តិសាធារណៈឱ្យបានត្រឹមត្រូវ មុននឹងសម្រេចផ្ដល់ឱ្យបុគ្គលឯកជនកាន់កាប់។
2023-12-29
ពលរដ្ឋដែលបាត់បង់ដីធ្លីលើកឡើងថា ការផ្ដល់សម្បទានដីសេដ្ឋកិច្ចរបស់រដ្ឋាភិបាលទៅឱ្យបុគ្គល ឬក្រុមហ៊ុនឯកជនបានធ្វើឱ្យពួកគាត់បាត់បង់មុខរបរ និងធ្លាក់ក្នុងបំណុលបំណុលជាដើម។ មន្ត្រីសង្គមស៊ីវិលស្នើឱ្យរដ្ឋាភិបាលថ្មីងាកមកដោះស្រាយបញ្ហាដីធ្លីរបស់ពលរដ្ឋ និងដកហូតសម្បទានដីសេដ្ឋកិច្ចដែលពុំបានបម្រើផលប្រយោជន៍ជាតិមកវិញ។
2023-12-29
សមត្ថកិច្ចថៃឃាត់ខ្លួនជនភៀសខ្លួនខ្មែរជាង ១០នាក់ ក្នុងពេលពួកគាត់ចូលរួមវគ្គសិក្សាស្វែងយល់ពីកិច្ចព្រមព្រមសន្តិភាពទីក្រុងប៉ារីស ២៣ តុលា នៅក្នុងទីក្រុងបាងកក កាលពីព្រឹកថ្ងៃទី២៩ ខែធ្នូ។ ជនភៀសខ្លួនដែលត្រូវបានសមត្ថកិច្ចថៃឃាត់ខ្លួនទាំងនោះ រួមមានសកម្មជនគណបក្សសង្គ្រោះជាតិ សកម្មជនគណបក្សភ្លើងទៀន យុវជនធ្វើការងារសង្គម និងជនភៀសខ្លួនខ្មែរក្រោមផងដែរ។
