តើ​ស្ថាប័ន​ហិរញ្ញវត្ថុ​អន្តរជាតិ​ធំៗ​ព្យាករណ៍​យ៉ាង​ណា​ពី​ផល​ប៉ះពាល់​សេដ្ឋកិច្ច​កម្ពុជា​ក្រោយ​អត់ EBA?

ដោយ មាន ឫទ្ធិ
2020-02-12
អ៊ីម៉ែល
មតិ
Share
បោះពុម្ព
ទង់ជាតិ សហគមន៍អឹរ៉ុប។
ទង់ជាតិ សហគមន៍អឹរ៉ុប។
Facebook

ចាប់​តាំង​ពី​គណៈកម្មការ​អឺរ៉ុប បាន​ដាក់​ចេញ​នីតិវិធី​ព្យួរ​ប្រព័ន្ធ​អនុគ្រោះ​ពន្ធ EBA ពី​កម្ពុជា កាលពី​ថ្ងៃ​ទី​១១ ខែ​កុម្ភៈ ឆ្នាំ​២០១៩ ភាព​មិន​ប្រាកដ​ប្រជា និង​ហានិភ័យ​នៃ​ការ​ព្យួរ​ប្រព័ន្ធ​អនុគ្រោះ​ពន្ធ​នេះ ដែល​អាច​ធ្វើ​ឱ្យ​ប៉ះពាល់​ដល់​សេដ្ឋកិច្ច​កម្ពុជា បាន​ក្លាយ​ជា​ប្រធានបទ​សំខាន់​នៃ​ការពិភាក្សា និង​សិក្សា​ស្រាវជ្រាវ​នានា​។ តើ​ស្ថាប័ន​ហិរញ្ញវត្ថុ​អន្តរជាតិ​ធំៗ ព្យាករណ៍​យ៉ាង​ដូចម្តេច​ខ្លះ​ចំពោះ​ផល​ប៉ះពាល់​នៃ​ការ​ព្យួរ​ប្រព័ន្ធ​អនុគ្រោះ​ពន្ធ​ដ៏​មាន​ឥទ្ធិពល​របស់​អឺរ៉ុប​នេះ?

ស្ថាប័ន​ហិរញ្ញវត្ថុ​អន្តរជាតិ​ធំៗ នៅ​លើ​ពិភពលោក រួមមាន​ដូចជា ធនាគារ​អភិវឌ្ឍន៍​អាស៊ី (ADB) មូលនិធិ​រូបិយវត្ថុ​អន្តរជាតិ (IMF) និង​ធនាគារ​ពិភពលោក (World Bank) ព្យាករណ៍​កំណើន​សេដ្ឋកិច្ច​កម្ពុជា ថា​ធ្លាក់​មក​នៅ​ក្រោម ៧​ភាគរយ ក្នុង​ឆ្នាំ​២០២០​នេះ ដោយសារតែ​ឥទ្ធិពល និង​ភាព​មិន​ប្រាកដ​ប្រជា​នៃ​ការ​ព្យួរ​ប្រព័ន្ធ​អនុគ្រោះ​ពន្ធ EBA ពី​កម្ពុជា ទោះបី​របប​លោក ហ៊ុន សែន ធ្លាប់​អួតអាង​ពី​ការ​រក្សា​បាន​កំណើន​សេដ្ឋកិច្ច​ក្នុង​រង្វង់ ៧% ទៅ ៧,% កាលពី​បណ្ដា​ឆ្នាំ​កន្លងទៅ​។ ការ​ព្យាករណ៍​របស់​ស្ថាប័ន​ធំៗ​ទាំងនេះ បាន​ធ្វើ​ឡើង​នៅមុន​ការ​ផ្ទុះ​ឡើង​នៃ​ការ​រីក​រាលដាល​នៃ​ជំងឺ​រលាក​ផ្លូវ​ដង្ហើម​បង្កឡើង​ដោយ​វីរុស​កូរ៉ូណា​ប្រភេទ​ថ្មី ដែល​កំពុង​បង្ក​ផល​ប៉ះពាល់​ឥត​រំពឹង​ទុក ដល់​សេដ្ឋកិច្ច​កម្ពុជា និង​សេដ្ឋកិច្ច​ពិភពលោក។

របាយការណ៍​បច្ចុប្បន្ន​ភាព​ចក្ខុវិស័យ​អភិវឌ្ឍន៍​អាស៊ី​ឆ្នាំ​២០១៩ ផ្សាយ​កាលពី​ខែ​កញ្ញា ឆ្នាំ​២០១៩ ធនាគារ​អភិវឌ្ឍន៍​អាស៊ី (ADB) ព្យាករណ៍​ថា កំណើន​សេដ្ឋកិច្ច​កម្ពុជា នឹង​ធ្លាក់​ចុះ​ពី ៧% ក្នុង​ឆ្នាំ​២០១៩ មក​នៅ ៦,% ក្នុង​ឆ្នាំ​២០២០​។ ធនាគារ​នេះ ហៅ​ការណ៍​ដែល​សហភាព​អឺរ៉ុប ព្យួរ​ប្រព័ន្ធ​អនុគ្រោះ​ពន្ធ EBA ពី​កម្ពុជា ដោយ​ផ្នែក ឬ​ទាំងស្រុង ជា​ហានិភ័យ​ពី​ខាងក្រៅ ដល់​កំណើន​សេដ្ឋកិច្ច​កម្ពុជា​ក្នុង​រយៈពេល​ខ្លី​។ រីឯ មូលនិធិ​រូបិយវត្ថុ​អន្តរជាតិ (IMF) និង​ធនាគារ​ពិភពលោក (World Bank) ក៏បាន​ព្យាករណ៍​ស្រដៀង​គ្នា​នេះ​ដែរ ដោយ​បាន​ទម្លាក់​កំណើន​សេដ្ឋកិច្ច​កម្ពុជា មក​នៅ ៦,% នៅ​ឆ្នាំ​២០២០ ដោយសារតែ​បញ្ហា EBA នេះ​។

ការសិក្សា​ពី​សេណារីយ៉ូ​នៃ​ការ​ព្យួរ​ប្រព័ន្ធ​អនុគ្រោះ​ពន្ធ EBA របស់​សហភាព​អឺរ៉ុប ធ្វើ​ឡើង​ដោយ​អ្នក​ជំនាញ IMF ចេញផ្សាយ​ក្នុង​របាយការណ៍​ប្រចាំ​ឆ្នាំ​២០១៩ របស់​អង្គការ​នេះ ប៉ាន់​ស្មានថា ការ​ព្យួរ​ទាំងស្រុង​នូវ​ប្រព័ន្ធ​អនុគ្រោះ​ពន្ធ​នេះ អាច​បណ្ដាល​ឱ្យ​ធ្លាក់​ចុះ​ខ្លាំង​នៃ​ការនាំចេញ​របស់​កម្ពុជា និង​ធ្លាក់​ចុះ​កំណើន​ផលិតផល​ក្នុងស្រុក​សរុប (​..) GDP ការ​កាត់បន្ថយ​ការងារ និង​ការ​កើន​ឡើង​នៃ​ភាព​ក្រីក្រ​នៅ​កម្ពុជា​។ បើ​ទោះ​ជា​ការ​ប៉ាន់ស្មាន​នេះ មិន​ទាន់​មាន​ភាព​ប្រាកដ​ប្រជា​ក៏ដោយ អ្នក​ជំនាញ IMF គូសបញ្ជាក់​ថា ហានិភ័យ បណ្ដាល​មក​ពី​ភាព​ងាយ​រងគ្រោះ​នៃ​វិស័យ​ហិរញ្ញវត្ថុ​ក្នុងស្រុក ក៏​អាច​នឹង​រួមចំណែក​ធ្វើ​ឱ្យ​ផល​ប៉ះពាល់​នេះ​កាន់តែ​ធ្ងន់ធ្ងរ​ជាង​នេះ​ថែមទៀត​ដែរ​។ យ៉ាងណាក៏ដោយ អ្នក​ជំនាញ IMF ថា ផល​​ប៉ះពាល់​នេះ អាច​នឹង​កាត់បន្ថយ​ខ្លះ ប្រសិនបើ​មានការ​ព្យួរ​ដោយ​ផ្នែក​នៃ​ប្រព័ន្ធ​អនុគ្រោះ​ពន្ធ EBA

ដោយឡែក ការសិក្សា​ស្រដៀង​គ្នា​នេះ​ដែរ អំពី​ផល​ប៉ះពាល់​នៃ​ការ​ព្យួរ​ប្រព័ន្ធ​អនុគ្រោះ​ពន្ធ EBA នេះ ចេញផ្សាយ​ដាច់ដោយឡែក​ដោយ​ ធនាគារ​ពិភពលោក កាលពី​ខែ​ឧសភា ឆ្នាំ​២០១៩ រក​ឃើញ​ថា ការ​ព្យួរ​ប្រព័ន្ធ​អនុគ្រោះ​ពន្ធ EBA របស់​អឺរ៉ុប​នេះ គឺជា​ហានិភ័យ​ចម្បង​មួយ ក្នុងចំណោម​ហានិភ័យ​នានា ដែល​អាច​ធ្វើ​ឱ្យ​ប៉ះពាល់​ដល់​កំណើន​សេដ្ឋកិច្ច​កម្ពុជា​។ បើ​តាម​ធនាគារ​ពិភពលោក ក្រៅពី EBA ហានិភ័យ​ផ្សេងទៀត រួមមាន​លំហូរ​វិនិយោគ​ដោយ​ផ្ទាល់ ៛FDI មាន​ប្រភព​ប្រមូល​ផ្តុំ​ចេញ​មក​ពី​តែ​ពី​ប្រទេស​ចិន​ពេក ហើយ​ផ្ដោត​តែ​លើ​វិស័យ​មួយ​ចំនួន។

បើ​តាម​ធនាគារ​ពិភពលោក មុខទំនិញ​សំខាន់ៗ​របស់​កម្ពុជា​នាំចេញ​ទៅ​ទីផ្សារ​អឺរ៉ុប រួមមាន សំលៀកបំពាក់ ស្បែកជើង កង់ និង​អង្ករ​។ ធនាគារ​ពិភពលោក ថា ជា​រួម អត្រា​គិត​ពន្ធ​របស់​សហភាព​អឺរ៉ុប​លើ​ផលិតផល​សំលៀកបំពាក់ គឺ ១២% ស្បែកជើង ១៦% និង​កង់ ១០%។ សម្រាប់​ផលិតផល​អង្ករ​កម្ពុជា កាលពី​ពាក់​កណ្ដាល​ខែ​មករា ឆ្នាំ​២០១៩ សហភាព​អឺរ៉ុប បាន​ដាក់​ចេញ​វិធានការណ៍​ការពារ ដោយ​ចាប់ផ្ដើម​យកពន្ធ​លើ​អង្ករ​កម្ពុជា​ជិត ២០០​ដុល្លារ ក្នុង​មួយ​តោន សម្រាប់​ឆ្នាំ​ដំបូង​២០១៩ ហើយ​ធ្លាក់​មក​នៅ​ជាង ១៧០​ដុល្លារ​ក្នុង​ឆ្នាំ​២០២០ និង​ជាង ១៤០​ដុល្លារ ក្នុង​ឆ្នាំ​២០២១ សម្រាប់​អង្ករ​មួយ​តោន។

ធនាគារ​ពិភពលោក ព្យាករណ៍​ថា ប្រសិនបើ​មានការ​ព្យួរ​ប្រព័ន្ធ​អនុគ្រោះ​ពន្ធ EBA នេះ នឹង​បណ្ដាល​ឱ្យ​តម្លៃ​ផលិតផល​កម្ពុជា​នាំចេញ​ទៅ​លក់​នៅ​ទីផ្សារ​អឺរ៉ុប ត្រូវ​ឡើងថ្លៃ ខណៈ​ផលិតផល​កាត់ដេរ​តំណាង​ឱ្យ​ប្រមាណ ៨០% នៃ​ការនាំចេញ​សរុប​របស់​កម្ពុជា​ទៅកាន់​ទីផ្សារ​អឺរ៉ុប​។​ការណ៍​នេះ គឺ​នៅ​មិនទាន់​គិត​ពី​កត្តា​ដទៃ​ទៀត ដែល​អាច​បណ្ដាល​ឱ្យ​មានការ​កាត់បន្ថយ​ខ្លាំង​ដល់​បរិមាណ​នាំចេញ​របស់​កម្ពុជា និង​មាន​ផល​ប៉ះពាល់​ជា​អវិជ្ជមាន​ទៅលើ​ឧស្សាហកម្ម​កាត់ដេរ។

អ្នក​ជំនាញ​ធនាគារ​ពិភពលោក ប៉ាន់​ស្មានថា ប្រសិនបើ​ព្យួរ EBA មែន នោះ​ផលិតផល​កាត់ដេរ​កម្ពុជា នាំ​ចេញទៅ​ទីផ្សារ​អឺរ៉ុប នឹង​ធ្លាក់​ចុះ​ក្នុង​រង្វង់​ពី ៨,% ដល់ ១០,%​។ ជារួម សម្រាប់​តែ​វិស័យ​កាត់ដេរ ការ​ធ្លាក់​ចុះ​ការនាំចេញ​នេះ គឺ​មាន​តម្លៃ​ចន្លោះ​ពី ៣២០ ទៅ​ជាង ៣៨១​លាន​ដុល្លារ​អាមេរិក​។ ដូចគ្នា​នេះ​ដែរ ការ​ធ្លាក់​ចុះ​នៃ​ផលិតផល​ស្បែកជើង​វិញ គឺ​មាន​ប្រមាណ ២៥,% ស្មើនឹង​ប្រមាណ ១២៨,៥ លាន​ដុល្លារ​អាមេរិក​។ ដោយ​មិន​គិត​ពី​ការ​ធ្លាក់​ចុះ​ការនាំចេញ​អង្ករ ដែល​មាន​តម្លៃ​រវាង​ពី ៦៥,១​លាន​ដុល្លារ​អាមេរិក ទៅ ១៤៤,១ លាន​ដុល្លារ​អាមេរិក ការ​ធ្លាក់​ចុះ​ការនាំចេញ​ជា​រួម​ទាំង​ផលិតផល​សំលៀកបំពាក់ និង​ស្បែកជើង មានតម្លៃ​ប្រមាណ ៥១០ លាន​ដុល្លារ​អាមេរិក​។ នេះ ធនាគារ​ពិភពលោក នៅ​មិន​ទាន់​បាន​សិក្សា​អំពី​ផល​ប៉ះពាល់​ចំពោះ​ការ​យក​ពន្ធ​លើ​ផលិតផល​កង់​របស់​កម្ពុជា​នៅឡើយ​ទេ។

កម្ពុជា ទទួល​បាន​ផលប្រយោជន៍​ពី​ប្រព័ន្ធ​អនុគ្រោះ​ពន្ធ EBA របស់​សហភាព​អឺរ៉ុប ដែល​មិន​យកពន្ធ​លើ​ទំនិញ​កម្ពុជា​ស្ទើរ​តែ​គ្រប់មុខ លើកលែងតែ​អាវុធ ចាប់​តាំង​ពី​ឆ្នាំ​២០០១​មក។ ផលិតផល​នាំចេញ​របស់​កម្ពុជា​ភាគច្រើន ជា​ផលិតផល​វាយនភណ្ឌ សំលៀកបំពាក់ ស្បែកជើង សម្ភារៈ​ធ្វើដំណើរ អង្ករ និង​កង់​ជាដើម​។ ដោយសារតែ​ការ​ទទួល​បាន​ប្រព័ន្ធ​អនុគ្រោះ​ពន្ធ EBA នេះ វិស័យ​កាត់ដេរ​នៅ​កម្ពុជា​បាន​ពង្រីក​វិសាលភាព​យ៉ាង​ឆាប់រហ័ស ដែល​បាន​ចូលរួម​ចំណែក​ជួយ​ឱ្យ​ពលរដ្ឋ​កម្ពុជា​ងើប​ផុត​ពី​ភាព​ក្រីក្រ​។ ឧស្សាហកម្ម​កាត់ដេរ បច្ចុប្បន្ន ផ្ដល់​ការងារ​ធ្វើ​ឱ្យ​ពលរដ្ឋ​ខ្មែរ​ប្រមាណ ៧​សែន​៥​ម៉ឺន​នាក់ (៧៥០.០០០) ខណៈ ៨០% នៃ​ពួកគេ​ជា​ស្ត្រី ហើយ​ពលរដ្ឋ​កម្ពុជា ប្រមាណ ៣​លាន​នាក់​ផ្សេងទៀត ត្រូវ​គេ​ប៉ាន់​ស្មានថា ទទួល​បាន​ចំណូល​ពី​វិស័យ​នេះ ដោយ​ប្រយោល​។ តួលេខ​របស់​គណៈកម្មការ​អឺរ៉ុប ឱ្យ​ដឹង​ថា ក្នុង​ឆ្នាំ​២០១៨ កម្ពុជា នាំចេញ​ផលិតផល​ទៅ​ដាក់​លក់​នៅ​ទីផ្សារ​អឺរ៉ុប សរុប​ទាំងអស់​ក្នុង​តម្លៃ ៥,៧៩ ពាន់​លាន​ដុល្លារ (​ឬ​ជាង ៥,៣ ពាន់​លាន​យូរ៉ូ​) ខណៈ​៩៥%​នៃ​ផលិតផល​ទាំងនេះ ទទួល​បាន​ការ​មិន​គិត​ពន្ធ​ក្រោម​ប្រព័ន្ធ​អនុគ្រោះ​ពន្ធ EBA​។ ក្នុង​នោះ គ្រាន់តែ​ផលិតផល​សំលៀកបំពាក់ និង​ស្បែកជើង មានតម្លៃ​ប្រមាណ ៤,៣៧ ពាន់​លាន​ដុល្លារ​អាមេរិក (​ឬ ៤​ពាន់​លាន​យូរ៉ូ)

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល