ທາງການວ່າຂັ້ນບໍຣິສັດ ຈຶ່ງໃຊ້ ສານເຄມີ ໄດ້

ມະນີຈັນ
2016-10-24
Share
f-chemical ສານເຄມີ ຂ້າສັດຕູພືດ,ຂ້າຫຍ້າ ສ່ວນຫຼາຍມີແຕ່ພາສາຈີນ ຕິດຢູ່ຂ້າງກ່ອງ ຊຶ່ງວ່າຄົນງານລາວ ບໍ່ສາມາດເຂົ້າໃຈ ວິທີນຳໃຊ້ຢ່າງປອດພັຍ
RFA/NY

ວຽກງານການກະເສດ ເພື່ອປ້ອນໂຮງງານ ອຸດສາຫະກັມ ຮວມທັງ ໂຮງງານນໍ້າຕານ ຢູ່ ແຂວງ ສະຫວັນນະເຂດ ບໍ່ສາມາດ ທີ່ ຈະຈໍາກັດ ການໃຊ້ ສານເຄມີ ໄດ້ ເຊັ່ນ; ຢາຂ້າຫຍ້າ ໃນສວນອ້ອຍ ເປັນຕົ້ນ ທີ່ໃຊ້ ສານເຄມີ ນີ້ ຫຼາຍກວ່າໝູ່  ຕາມການ ເປີດເຜີຍ ຂອງ ເຈົ້າໜ້າທີ່ ຂແນງ ສິ່ງແວດລ້ອມ ແຂວງ ສະຫວັນນະເຂດ ຕໍ່ ວິທຍຸ ເອເຊັຽ ເສຣີ ເມື່ອວັນທີ 21 ຕຸລາ ນີ້:

"ເອີມັນກະໃຊ້ຫຼາຍກໍ ໃນເຂົາເຈົ້າ ທໍາການຜລິດຫັ້ນແລະ ເພາະວ່າ ມັນຂະເຈົ້າ ກໍວ່ານີ້ ມັນມີ ຄວາມຈໍາເປັນ ກໍຕ້ອງໃຊ້ ສານຂ້າຫຍ້າ ນີ້ນະ ເພິ່ນກໍວ່າ ບໍ່ສາມາດ ເສັຽໄດ້ ບໍ່ສາມາດ ຈະກໍາຈັດໄດ້ ຖ້າບໍ່ໃຊ້ ສານ ຂ້າຫຍ້ານີ້".

ທີ່ຜ່ານມາການໃຊ້ ສານເຄມີ ຢູ່ໃນສວນອ້ອຍ ໄດ້ ສ້າງບັນຫາ ດ້ານສຸຂພາບ ໃຫ້ແກ່ ປະຊາຊົນ ທີ່ເຮັດວຽກ ໃນສວນນັ້ນ ເປັນຕົ້ນວ່າ ມີອາການ ອ່ອນເພັຽ, ວິນຫົວ ເມື່ອຍງ່າຍ ເພາະ ພວກເຂົາເຈົ້າ ບໍ່ຮູ້ວິທີ ໃຊ້ ສານເຄມີ ຢ່າງຖືກຕ້ອງ ບໍ່ມີເຄື່ອງ ປ້ອງກັນ. ແຕ່ ສໍາລັບ ການຜລິດ ຂອງປະຊາຊົນ ທ່ານເວົ້າວ່າ ຈະບໍ່ໃຊ້ ສານເຄມີ ເພາະທາງການ ບໍ່ອະນຸຍາດ ໃຫ້ໃຊ້ ມີແຕ່ ທາງໂຮງງານ ຫລື ບໍຣິສັດ ທີ່ ເຂົ້າມາລົງທຶນ ເທົ່ານັ້ນ ຈຶ່ງ ອະນຸຍາດ ນໍາເຂົ້າ ແລະ ໃຊ້ ສານເຄມີ ເຫຼົ່ານີ້ໄດ້.

"ເຂົາບໍ່ໃຊ້ ຢານີ້ ສິບໍ່ແມ່ນ ນໍາເອົາເຂົ້າມາງ່າຍໆ ມັນບໍ່ແມ່ນ ມັນສິມີຂາຍ ຕາມທ້ອງຕລາດ ນອກຈາກ ຣະດັບ ບໍຣິສັດ ພຸ້ນ ທີ່ເອົາເຂົ້າມາ ໄດ້ຫັ້ນນະ ເຣື່ອງ ປະຊາຊົນ ນີ້ ເຂົາເຈົ້າ ບໍ່ຊົມໃຊ້ ໄດ້ເລີຍ ເຂົາບໍ່ຮູ້ ການນໍາເຂົ້າ ມາເລີຍ ຢາຂ້າຫຍ້າ ນີ້ ເຂົາມີແຕ່ ໃຊ້ແຮງງານ ເຂົາເຈົ້າ ເສັຽເອົາ".

ທີ່ຜ່ານມາ ແຂວງ ສະຫວັນນະເຂດ ມີບໍຣິສັດ ນໍ້າຕານ ມິດລາວ ເຂົ້າມາ ສັມປະທານ ທີ່ດິນນໍາຣັຖ ແລະ ເຊົ່າທີ່ດິນ ນໍາປະຊາຊົນ ເພື່ອ ປູກອ້ອຍ ຈໍານວນ ຫຼາຍພັນ ເຮັກຕາ ໃນຫຼາຍເມືອງ ທົ່ວແຂວງ ແລະ ໄດ້ສ້າງ ຜົລກະທົບ ທາງດ້ານ ສຸຂພາບ ໃຫ້ແກ່ ປະຊາຊົນ ທີ່ເຮັດວຽກ ໃນສວນ ຂອງ ບໍຣິສັດ ດັ່ງກ່າວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ