ນັກວິຊາການແລະພາກປະຊາສັງຄົມໄທກັງວົນຜົນກະທົບເຂື່ອນປາກແບງ

ນັກວິຊາການ ແລະພາກປະຊາສັງຄົມໃນໄທ ຈັດກອງປະຊຸມເສວະນາ ເຂື່ອນປາກແບງ ໃນມື້ວັນທີ່ 1 ພະຈິກ ທີ່ຜ່ານມາ ທີ່ນະຄອນຫຼວງບາງກອກ ຍູ່ປະເທດໄທ ເພື່ອສະແດງເຖີງຄວາມກັງວົນ ຕໍ່ຜົນກະທົບຈາກເຂື່ອນປາກແບງ. ເນື່ອງຈາກໂຄງການດັ່ງກ່າວຂາດການຄຸ້ມຄອງທີ່ດີບໍ່ວ່າຈະເປັນເລື່ອງສິ່ງແວດລ້ອມ, ວິຖີຊີວິດ ລວມໄປເຖິງເຂດແດນລະຫວ່າງໄທ ກັບລາວ.

ທ່ານນາງ ປີດີ ຄົງແປ້ນ ກຳມະການສິດທິມະນຸດສະຍະຊົນແຫ່ງຊາດ ປະເທດໄທກ່າວວ່າ ເຂື່ອນໃນແມ່ນ້ຳຂອງຈະສົ່ງຜົນກະທົບຕໍ່ພື້ນທີ່ທຳການກະເສດຢູ່ແຄມແມ່ນ້ຳຂອງ, ການປະມົງ, ການທ່ອງທ່ຽວ ແລະການໃຊ້ນ້ຳເພື່ອອຸປະໂພກ-ບໍລິໂພກ.  ດັ່ງ ທ່ານນາງ ປີດີ ຄົງແປ້ນ ກ່າວໃນກອງປະຊຸມເສວະນາໃນມື້ວັນທີ່ 1 ພະຈິກ ທີ່ຜ່ານມາໃນຕອນນຶ່ງວ່າ.

“ຂໍ້ຫ່ວງໄຍຂອງກຳມະການສິດກະນ່າຈະເປັນວິຖີຊີວິດຂອງຊຸມຊົນຂອງຊາວບ້ານທີ່ທຸກຄົນ ມີສິດທີ່ຈະໃຊ້ນ້ຳ ແລ້ວກະການພັດທະນາກະເສດແບບຍືນຍົງ ແລ້ວກະພຽງພໍ ແລ້ວກະໃຫ້ຄວາມສຳຄັນກັບກຸ່ມທີ່ມີຄວາມສ່ຽງ”

ຂະນະທີ່ ທ່ານ ນິວັດ ຮ້ອຍແກ້ວ ປະທານກຸ່ມຮັກຊຽງຂອງ ແຂວງຊຽງຮາຍ ປະເທດໄທ ກ່າວວ່າ ໂຄງການເຂື່ອນປາກແບງຄວນຈະທົບທວນຄືນທັງໝົດ. ເນື່ອງຈາກຂັ້ນຕອນການຈັດຕັ້ງປະຕິບັດຂາດຄວາມໂປ່ງໃສ ແລະຂາດການສຶກສາທີ່ລະອຽດຮອບດ້ານ. ດັ່ງ ທ່ານ ນິວັດ ຮ້ອຍແກ້ວ ກ່າວໃນກອງປະຂຸມເສວະນາໃນມື້ດຽວກັນໃນຕອນນຶ່ງວ່າ.

“ເຂື່ອນປາກແບງນີ້ ເປັນເຂື່ອນທີ່ຂ້ອຍຄິດວ່າ ມັນມີບັນຫາຫຼາຍ ຫຼາຍຕັ້ງແຕ່ຂະບວນການປຶກສາຫາລືລ່ວງໜ້າ ການແຈ້ງໃຫ້ພີ່ນ້ອງປະຊາຊົນຮັບຮູ້ ທີ່ຜ່ານມາມັນກະບໍ່ເຕັມທີ່ ເລື່ອງຂອງຜົນກະທົບແມ່ນຫຍັງຕ່າງໆ ຜົນການສຶກສາແມ່ນຫຍັງຕ່າງໆ ກະບໍ່ໄດ້ເວົ້າເຖິງ ເວົ້າເຖິງແຕ່ວ່າເຂື່ອນຈະສ້າງອອກມາແບບໃດ”

ທາງດ້ານ ຊາວບ້ານທ່ານໜຶ່ງ ຢູ່ເມືອງປາກແບງ ແຂວງອຸດົມໄຊ ກ່າວວ່າ ເຖິງຈະບໍ່ໄດ້ເຂົ້າຮ່ວມໃນກອງປະຊຸມເສວະນາຢຸູ່ປະເທດໄທ ແຕ່ຊາວບ້ານສ່ວນຫຼາຍກໍເປັນກັງວົນກ່ຽວກັບໂຄງການເຂື່ອນປາກແບງ ແລະບໍ່ຕ້ອງການໂຍກຍ້າຍອອກຈາກພື້ນທີ່. ດັ່ງຊາວລາວ ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ວັນທີ່ 4 ພະຈິກ ນີ້ວ່າ.

“ເຮັດເຂື່ອນແລ້ວບາດນີ້ ຈັກຊິເຮັດຫຍັງໄດ້ຈັ່ງວ່າ ຄັນເຮັດເຂື່ອນຫຼາຍແລ້ວ ເຮັດໃຫ້ປະຊາຊົນ ທຸກຍາກກວ່າເກົ່າ ພວກແລ່ນເຮືອກະ ໄປຍາກແລ້ວ ໄດ້ເງິນມາ 5-6 ລ້ານ 10 ລ້ານ (ກີບ) ມັນຊິມີຫຍັງ ເຂົາທໍາມາຫາກິນ...ໂອ້.”

ເຈົ້າໜ້າທີ່ທ້ອງຖິ່ນ ໃນແຂວງອຸດົມໄຊ ກ່າວວ່າ ຢາກໃຫ້ລັດຖະບານລາວທົບທວນຄືນກ່ຽວກັບ ໂຄງການເຂື່ອນປາກແບງ ເຖິງວ່າຈະມີການອະນຸມັດໄປແລ້ວ ເພາະໂຄງການດັ່ງກ່າວ ຈະສົ່ງຜົນກະທົບຕໍ່ສິ່ງແວດລ້ອມ ແລະສັງຄົມຢ່າງໜັກ ຢູ່ແຂວງອຸດົມໄຊ ແລະແຂວງບໍ່ແກ້ວ. ດັ່ງເຈົ້າໜ້າທີ່ທ່ານນີ້ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ບໍ່ທັນສົມບູນ ລັດຖະບານເຮົາກໍອະນຸມັດໃຫ້ເຮັດແລ້ວເດ້ອັນນີ້ປະຊາຊົນຍັງເວົ້າເລື່ອງ ຜົນສະທ້ອນຂອງສັງຄົມແບບໃດຫັ້ນນ່າກະເຂົາເຈົ້າໄດ້ເຊັນຜ່ານໄປແລ້ວບັນຫາຕົວນີ້ແຫຼະມັນຕາມມາ”

   ໂຄງການເຂື່ອນປາກແບງ ຈະສົ່ງຜົນກະທົບຕໍ່ຊາວບ້ານ ທັງທາງກົງ ແລະທາງອ້ອມ ຈໍານວນ 26 ບ້ານ ໃນ 3 ແຂວງ. ສໍາລັບ ໂຄງການເຂື່ອນປາກແບງ ຈະມີກໍາລັງຕິດຕັ້ງ 912 ເມກະວັດ ຕັ້ງຢູ່ບ້ານປາກເງີຍ ເມືອງປາກແບງ ແຂວງອຸດົມໄຊ ໂດຍມີ ບໍລິສັດ China Datang ປະເທດຈີນ ເປັນຜູ້ພັດທະນາໂຄງການ ດ້ວຍມູນຄ່າການລົງທຶນ ປະມານ 1,880 ລ້ານ ໂດລ້າສະຫະລັດ, ສ່ວນໄຟຟ້າທີ່ຜະລິດໄດ້ ຈາກໂຄງການເຂື່ອນປາກແບງ ຕາມແຜນຈະສົ່ງຂາຍໃຫ້ປະເທດໄທ 90% ແລະລັດວິສາຫະກິດໄຟຟ້າລາວ 10% ສັນຍາ 29 ປີ ມີກໍານົດຂາຍໄຟຟ້າ ເປັນທາງການ ໃນປີ 2033.