ຜູ້ຖືກຜົລກະທົບ ໂຄງການຂົວມິຕພາບ ແຫ່ງທີ 5 ຍັງບໍ່ໄດ້ ຄ່າຊົດເຊີຍໝົດເທື່ອ

ໂຄງການກໍ່ສ້າງຂົວຂ້າມແມ່ນໍ້າຂອງ ມິຕພາບລາວ-ໄທຍ ແຫ່ງທີ 5 ບໍຣິຄໍາໄຊ-ບຶງການ ສໍາເຣັດໄປແລ້ວ 69% ອີງໃສ່ບົດຣາຍງານ ປະຈໍາເດືອນກຸມພາ ປີ 2023 ຂອງທ່ານ ໄລທອງ ພົມມະວົງ ຫົວໜ້າໂຄງການກໍ່ສ້າງຂົວຂ້າມແມ່ນໍ້າຂອງ ມິຕພາບລາວ-ໄທຍ ແຫ່ງທີ 5 ໂດຍເຈົ້າໜ້າທີ່ທີ່ກ່ຽວຂ້ອງໃນໂຄງການສ້າງຂົວຂ້າມແມ່ນໍ້າຂອງ ມິຕພາບລາວ-ໄທຍ ແຫ່ງທີ 5 ຄາດຄະເນວ່າ ການກໍ່ສ້າງຂົວດັ່ງກ່າວ ຈະສໍາເຣັດແລະເປີດນໍາໃຊ້ ພາຍໃນເດືອນທັນວາ ປີ 2023 ເນື່ອງຈາກທຸກຢ່າງ ດໍາເນີນໄປຕາມແຜນ, ດັ່ງທ່ານກ່າວ ຕໍ່ວິທຍຸເອເຊັຽເສຣີ ໃນວັນທີ 23 ມິນາ ນີ້ວ່າ:

“ຖືວ່າ ຄວາມຄືບໜ້າຂອງເຮົານີ້ ໄປຕາມແຜນຫັ້ນແຫຼະ ຖືວ່າ ເດືອນ 12 ນີ້ ເຮົາໃຫ້ສໍາເຣັດໝົດ ເວົ້າເຣື່ອງເປີດຂົວເລີຍ ແມ່ນໍ້າສອງຝັ່ງ ກັບທາງໄທຍນີ້ ກໍຖືວ່າ ເດືອນ 12 ໄດ້ເປີດນໍາໃຊ້ ຖືວ່າ ໄປຕາມແຜນ.”

ຂະນະທີ່ ວຽກງານໄກ່ເກັ່ຽສິ່ງກີດຂວາງ ທີ່ຖືກຜົລກະທົບຂອງໂຄງການກໍ່ສ້າງຂົວຂ້າມແມ່ນໍ້າຂອງ ມິຕພາບລາວ-ໄທຍ ແຫ່ງທີ 5 (ບໍຣິຄໍາໄຊ-ບຶງການ) ແມ່ນມີເນື້ອທີ່ດິນຂອງປະຊາຊົນທັງໝົດ 52.4 ເຮັກຕ້າຣ໌ ຮວມເປັນມູນຄ່າທັງໝົດ 5.33 ຕື້ປາຍກີບ ໂດຍນໍາໃຊ້ທຶນສົມທົບພາຍໃນ ຂອງຣັຖບານລາວ ເຂົ້າໃນການຊໍາຣະສະສາງ, ຜ່ານມາ ໄດ້ຈ່າຍໃຫ້ປະຊາຊົນໄປແລ້ວ ຈໍານວນ 3.687 ຕື້ປາຍກີບ ເທົ່າກັບ 68.78%. – ອີງຕາມການຣາຍງານຂອງທ່ານ ໄລທອງ ພົມມະວົງ.

ດ້ານຊາວບ້ານ ຢູ່ບ້ານກ້ວຍອຸດົມ ຜູ້ທີ 1 ທີ່ໄດ້ຮັບຜົລກະທົບຈາກໂຄງການດັ່ງກ່າວ ກ່າວວ່າ ມາຮອດປັດຈຸບັນ ວັນທີ 23 ມິນາ 2023 ການຊົດເຊີຽທີ່ດິນ ປະເພດດິນປ່າເລົ່າ ຫົວໄຮ່ປາຍນາຂອງຊາວບ້ານ ຢູ່ບ້ານກ້ວຍອຸດົມ ຈໍານວນ 30 ຄອບຄົວ ຮວມເປັນມູນຄ່າປະມານ 900 ລ້ານກີບ ຍັງບໍ່ທັນໄດ້ຮັບໝົດເທື່ອ ແລະປະມານເດືອນມົກກະຣາ ທີ່ຜ່ານມາ ໄດ້ປະສານງານຫາການນໍາຂັ້ນແຂວງ ຂັ້ນເມືອງ ແລ້ວເຂົາເຈົ້າລະບຸວ່າ ເອກກະສານການຈ່າຍເງິນ ບ້້ວງທີ່ເຫຼືອໃຫ້ປະຊາຊົນ ສົ່ງໃຫ້ກະຊວງໂຍທາທິການແລະຂົນສົ່ງ ເພື່ອຍື່ນຕໍ່ສະພາແຫ່ງຊາຕລາວ ໃຫ້ອະນຸມັດເງິນບ້້ວງທີ່ເຫຼືອ ເຂົ້າໃນງົປມານຂອງຣັຖ ໃນປີ 2023, ດັ່ງຊາວບ້ານ ຢູ່ບ້ານກ້ວຍອຸດົມ ຜູ້ທີ 1 ທີ່ທີ່ດິນໄດ້ຮັບຜົລກະທົບ ຈາກໂຄງການດັ່ງກ່າວ ກ່າວໃນມື້ດຽວກັນນີ້ວ່າ:

“ດຽວນີ້ ແລ້ວເພິ່ນຊົດເຊີຽໄປ ຜູ້ທີ່ໄດ້ 100% ແລ້ວ ລະແມ່ນ 21 ຄອບຄົວແລ້ວ ແລ້ວຍັງເຫຼຶືອ 30 ຄອບຄົວ ທີ່ບໍ່ທັນໄດ້ ໃນ 30 ຄອບຄົວນີ້ ລະແມ່ນ ຍັງວົງເງິນຢູ່ 900 ກວ່າລ້ານກີບ ຍັງປະສານເພິ່ນ ເພິ່ນກໍວ່າ ດຽວນີ້ຫັ້ນ ເອກກະສານທີ່ ຢາກໃຫ້ທາງເທິງເອົາຂໍ້ມູນໂຕນີ້ເຂົ້າເປັນງົປມານ 2023 ຫັ້ນ ລະແມ່ນ ຜ່ານກະຊວງແລ້ວ ມີແຕ່ສະພາແຫ່ງຊາຕຮັບຮອງ ແລ້ວກະໂອນເງິນລົງມາໄດ້ເລີຍ.”

ຊາວບ້ານຢູ່ບ້ານກ້ວຍອຸດົມ ຜູ້ທີ 2 ທີ່ໄດ້ຮັບຜົລກະທົບ ຈາກໂຄງການກໍ່ສ້າງຂົວຂ້າມແມ່ນໍ້າຂອງແຫ່ງທີ 5 ກ່າວວວ່າ ດິນຂອງໂຕເອງ ແລະເພື່ອນບ້ານໃກ້ຄຽງ ຍັງບໍ່ທັນໄດ້ຮັບຄ່າຊົດເຊີຽທັງໝົດເທື່ອ ແລະຍັງບໍ່ທັນເຫັນແຈ້ງການ ຈາກຂັ້ນສູນກາງ ຂັ້ນແຂວງ ແລະຂັ້ນເມືອງ ກ່ຽວກັບຄວາມຄືບໜ້າ ການຈ່າຍເງິນຄ່າຊົດເຊີຽບ້ວງທີ່ເຫຼືອ, ດັ່ງທ່ານກ່າວໃນມື້ດຽວກັນນີ້ວ່າ:

“ເພິ່ນບໍ່ເອົາໃຫ້ເດ້ ກະໄດ້ຄອງໄປຈັ່ງຊີ້ແຫຼະ ໃຈແທ້ກະຢາກໄດ້ບາດດຽວຫັ້ນແຫຼະ ໄປຊື້ຫຍັງກໍຈັ່ງຄ່ອຍໄດ້ຊື້ ອັນນີ້ເພິ່ນເອົາມາຢອດໃຫ້ເທື່ອລະເລັກລະໜ້ອຍ ຜູ້ບໍ່ມີ ບາງຄົນກະວ່າຊິເອົາໄປຊື້ດິນ ຊື້ໄຮ່ຊື້ນາກໍບໍ່ໄດ້ແລ້ວ ຄັນວ່າບໍ່ພໍໃຈ ກໍແມ່ນວ່າ ບໍ່ພໍໃຈ ເພາະວ່າ ເພິ່ນກໍໃຫ້ລາຄາຕໍ່າເນາະ ແຕ່ວ່າແນວໃດກໍເພິ່ນວ່າ ໃຫ້ບໍ່ໃຫ້ແນວໃດ ແລ້ວພາກຣັຖເພິ່ນຊິເອົາວ່າຊີ້ນ່າ ກໍຈໍາເປັນກະຕ້ອງໄດ້ຍອມໃຫ້ເພິ່ນ ໂອ້ ເສັຍສະຣະຫຼາຍ ບາງຄົນຈົນບໍ່ໄຮ່ ມີນາເຮັດກິນເຂົ້າເລີຍ ຜູ້ບາງຄົນນ່າ ມີນາຊໍ່ານັ້ນແລ້ວ ເອົາໃຫ້ເພິ່ນໄປເຮັດຂົວໝົດເລີຍນ່າ ແລ້ວບໍ່ມີນາເຮັດກິນເລີຍກໍມີ.”

ສ່ວນຊາວບ້ານ ຢູ່ບ້ານກ້ວຍອຸດົມ ຜູ້ທີ 3 ທີ່ໄດ້ຮັບຜົລກະທົບ ຈາກໂຄງການດັ່ງກ່າວເຊັ່ນດຽວກັນ ກໍກ່າວວ່າ ປະຊາຊົນ ທັງໝົດ 51 ຄອບຄົວ ທີ່ມີດິນຖືກຜົລກະທົບຈາກໂຄງການ ຕ່າງກໍຈົ່ມເປັນສຽງດຽວກັນວ່າ ຄ່າຊົດເຊີຽແມ່ນໄດ້ໜ້ອຍ ໂດຍຫຼາຍຄອບຄົວໄດ້ເງິນຄ່າຊົດເຊີຽ ບໍ່ສາມາດຊື້ດິນບ່ອນໃໝ່ເພື່ອປູກຝັງຄືນໄດ້ ຫຼືບໍ່ສາມາດຊື້ຣົຖໄຖນາໄດ້ເລີຍ ແຕ່ກໍຂັດຂັ້ນເທິງບໍ່ໄດ້  ເພື່ອເປັນການພັທນາປະເທດ, ດັ່ງທ່ານກ່າວໃນມື້ດຽວກັນນີ້ວ່າ:
“ບາງຄົນກະວ່າໜ້ອຍ ບາງຄົນເພິ່ນອັນນັ້ນ ເພິ່ນກໍວ່າ ເຮັດແນວເດີ ເພິ່ນຢາກເຮັດຢາກສ້າງເດ້ ຊິໄປກົດໜ່ວງຖ່ວງດຶງໄດ້ແນວໃດ ເພິ່ນກໍວ່າ ເພິ່ນໃຫ້ແນວໃດກໍເອົາ ຍົກໂຕຢ່າງວ່າ ດິນນາ ແລ້ວໄດ້ແລ້ວໄປຊື້ຄືນ ແລ້ວບໍ່ໄດ້ຫັ້ນນ່າ ຄ່າຊົດເຊີຽຫັ້ນນ່າ ເພິ່ນເວົ້າແນວນີ້ແຫຼະ ຫຼາຍຄົນທີ່ຈົ່ມຫັ້ນນ່າ.”

ກ່ຽວກັບຄ່າຊົດເຊີຽດິນ ຂອງຊາວບ້ານທີ່ໄດ້ຮັບຜົລກະທົບບ້ວງທີ່ເຫຼືອ 30 ຄອບຄົວ ແມ່ນຈະໄດ້ຮັບຄ່າຊົດເຊີຽ ພາຍໃນປີ 2023 ເນື່ອງຈາກ ພາກສ່ວນທີ່ກ່ຽວຂ້ອງ ບໍ່ຢາກໃຫ້ການກໍ່ສ້າງຂົວສໍາເຣັດໄປແລ້ວ ແຕ່ປະຊາຊົນຍັງບໍ່ໄດ້ຮັບຄ່າຊົດເຊີຽໝົດ, ດັ່ງເຈົ້າໜ້າທີ່ ທີ່ກ່ຽວຂອງ ໃນວຽກງານໄກ່ເກັ່ຽສິ່ງກີດຂວາງທີ່ຖືກຜົລກະທົບ ຈາກໂຄງການກໍ່ສ້າງຂົວຂ້າມແມ່ນໍ້າຂອງມິຕພາບ ລາວ-ໄທຍ ແຫ່ງທີ 5 (ບໍຣິຄໍາໄຊ-ບຶງການ) ກ່າວໃນມື້ດຽວກັນນີ້ວ່າ:

“ຄືວ່າໄດ້ຍິນເພິ່ນ ເວົ້າໃນກອງປະຊຸມ ເພິ່ນກໍວ່າ ຄາດວ່າເນາະ ບາງເທື່ອເພິ່ນກໍທາງແຂວງ ຊິຄົນຄວ້າການຊົດເຊີຽໃຫ້ ເພື່ອວ່າ ບໍ່ໃຫ້ມັນມີບັນຫາ ສົມມຸດວ່າ ໂຄງການກໍ່ສ້າງສໍາເຣັດແລ້ວ ຢ້ານວ່າມັນມີບັນຫາເນາະ ຖ້າບໍ່ທັນໄດ້ທົດແທນເງິນປະຊາຊົນຫັ້ນນ່າ ເພິ່ນກໍຄາດວ່າ ຊິໃຫ້ຊົດເຊີຽແລ້ວກ່ອນ ການກໍ່ສ້າງສໍາເຣັດ.”

ໂຄງການກໍ່ສ້າງຂົວຂ້າມແມ່ນໍ້າຂອງ ມິຕພາບລາວ-ໄທຍ ແຫ່ງທີ 5 ບໍຣິຄໍາໄຊ-ບຶງການ ມີມູນຄ່າການກໍ່ສ້າງທັງໝົດ 3,930 ລ້ານບາທ, ໃນນັ້ນ ໄທຍ ອອກຈໍານວນ 2,630 ລ້ານບາທ ສ່ວນປະເທດລາວ ກູ້ຢືມເງິນຈາກປະເທດໄທຍ ເພື່ອມາສົມທົບທຶນສ້າງ ຈໍານວນ 1,300 ລ້ານບາທ, ອີງຕາມບົດຄວາມຮ້ອຍເຣື່ອງເມືອງໄທຍ.