ເຈົ້າໜ້າທີ່ສຶກສາອົບຮົມຊາວບ້ານ ແຂວງໄຊສົມບູນທີ່ລັກລອບຂຸດຄົ້ນແຮ່ຄຳ ໃນເຂດສຳປະທານ

ເມື່ອວັນທີ 26 ສິງຫາ 2024 ທີ່ຜ່ານມາເຈົ້າໜ້າທີ່ ປກສ ແຂວງໄຊສົມບູນ ໄດ້ສຶກສາອົບຮົມຊາວບ້ານຈຳນວນ 21 ຄົນ ທີ່ລັກລອບຂຸດຄົ້ນແຮ່ຄຳໃນເຂດສຳປະທານ ຂອງບໍລິສັດ ເອທີໂອໂຕ້ ຈຳກັດ ຂອງນັກທຸລະກິດລາວຢູ່ ບ້ານພູກອງເຂົ້າ ເມືອງລ້ອງແຈ້ງ ເຊິ່ງເປັນການກະທຳຜິດຕໍ່ກົດໝາຍອາຍາມາດຕາ 40. ດັ່ງເຈົ້າໜ້າທີ່ແຂວງໄຊສົມບູນກ່າວຕໍ່ວິທຍຸເອເຊັຽເສຣີໃນວັນທີ 30 ສິງຫາ ນີ້ວ່າ.

“ໂຕນິ້ເປັນຂອງຄົນລາວດີ້ຢູ່ອັນນ່າພູກອງເຂົ້າຢູ່ແຖວຫຼວງພັນໄຊ ເມືອງລ້ອງແຈ້ງ ມີແຕ່ໄປສຶກສາອົບຮົມໃຫ້ອັນນ່າປະຊາຊົນທີ່ລະເມີດເຂົ້າໄປຫັ້ນຢຸດເຊົາ ເພາະວ່າໃນຂອບເຂດດັ່ງກ່າວຫັ້ນນ່າ ມັນເປັນຂອບເຂດສຳປະທານຂອງບໍລິສັດເອທີໂອ ໂຕ້ຈະບໍ່ໄປອີກຫັ້ນນ່າ ມີແຕ່ສຶກສາອົບຮົມບໍ່ມີການຖືກກັກຂັງດອກ.”

ບໍລິສັດເອທີໂອໂຕ້ຈໍາກັດ ຫາກໍ່ລົງມືຂຸດຄົ້ນແຮ່ຄໍາໄດ້ປະມານ 1 ປີ ພາຍຫຼັງສໍາຫຼວດມາດົນຫຼາຍປີແລ້ວ ຈຶ່ງເຮັດໃຫ້ມີການປັກມຸດໝາຍ ແລະປ້າຍຫ້າມເຂົ້າເຂດສຳປະທານ ຂຸດຄົ້ນແຮ່ຄຳບໍ່ທັນທົ່ວເຖິງ ແລະ ບາງກໍລະນີປະຊາຊົນ ກໍ່ເຫັນປ້າຍຫ້າມແລ້ວແຕ່ກໍ່ຍັງມີການລະເມີດ ເຂົ້າໄປຂຸດຄົ້ນແຮ່ຄຳ. ດັ່ງເຈົ້າໜ້າທີ່ແຂວງໄຊສົມບູນຜູ້ດຽວກັນກັບຂ້າງກ່າວຕື່ມວ່າ:

“ເພາະວ່າມັນເປັນເຂດສໍາປະທານ ໃໝ່ທາງບໍລິສັດເຂົາກໍາລັງ ສິເລັ່ງໃສ່ປັກວ່າ ຂອບເຂດໃດຂອບເຂດໃດປະຊາຊົນກໍ່ບາງຄົນກໍ່ເຫັນແດ່ບາງຄົນ ກໍ່ບໍ່ເຫັນແດ່. ບາງທີ່ເຫັນແລ້ວອາດດື້ເຂົ້າໄປກໍ່ມີຫັ້ນນ່່າ.”

ຍ້ອນຄວາມທຸກຍາກຂອງຊາວບ້ານ ຈຶ່ງເຮັດໃຫ້ພວກເຂົາເຈົ້າພາກັນໄປລັກຂຸດຄົ້ນ ແຮ່ຄໍາຂອງນັກທຸລະກິດລາວເນື່ອງຈາກເມື່ອເອົາຄຳໄປຂາຍໄດ້ເງິນກໍ່ ຈະສາມາດແກ້ໄຂຊີວິດການເປັນຢູ່ໃນຄອບຄົວໄດ້. ດັ່ງເຈົ້າໜ້າທີ່ເມືອງລ້ອງແຈ້ງນາງໜຶ່ງກ່າວວ່າ:

“ຫຼ້າສຸດພວກທີ່ອັນຖືກມານໍາມາດໍາເນີນຄະດີ ມີແຕ່ຜູ້ໃຫຍ່ຜູ້ເຖົ້າຫັ້ນໄປຂຸດຄໍານ່າ. ເຂົາເຈົ້າກໍ່ແຈ້ງການແຫຼະເນາະແຈ້ງການເຂົາກໍ່ຄິດວ່າ ຄິດຢາກໄດ້ເພາະວ່າມັນມີຄຳຫຼາຍ. ໄປຂຸດບາງເທື່ອກໍ່ຄຸ້ມຄ່າແຮງງານຫັ້ນນ່າ. ພໍໄດ້ແກ້ໄຂຊີວິດຄອບຄົວມີຫຍັງກໍ່ພາກັນໄປ. ບໍ່ມີປ້າຍເຕືອນດອກບໍ່ໄດ້ປະກາດໂທລະໂຄ່ງ ມີແຕ່ແຈ້ງການຫານາຍບ້ານນາຍບ້ານ ກໍ່ແຈ້ງຕໍ່ເອີ້ນຫົວໜ້າຄອບຄົວມາປະຊຸມສື່ໆນ່າ.”

ແຕ່ພະນັກງານຈາກບໍລິສັດຂຸດຄົ້ນບໍ່ຄໍາ ເຂດບ້ານພັນໄຊ ເມືອງລ້ອງແຈ້ງ ແຂວງໄຊສົມບູນກ່າວວ່າ ເຂດສຳປະທານຂຸດຄົ້ນແຮ່ຄຳຂອງບໍລິສັດ ເອທີໂອໂຕ້ ຈໍາກັດແມ່ນຂື້ນກັບບ້ານພູກອງເຂົ້າຢູ່ໄກຈາກເຂດສຳປະມານຂຸດຄົ້ນຄໍາບ້ານພັນໄຊປະມານ 3 ກິໂລແມັດເຊິ່ງບໍລິສັດເອທີໂອໂຕ້ນີ້ມີແຄ້ມ ຂອງທະຫານຍາມ 24 ຊົ່ວໂມງ. ສ່ວນວ່າການຈ້າງວຽງກໍ່ຈ້າງວຽກໂດຍໃຊ້ຄົນງານລາວ. ດັ່ງທ່ານກ່າວວ່າ:

“ບ່ອນແຄ້ມແຕ່ລະແຄ້ມຕ້ອງມີທະຫານຍາມ ບໍ່ໃຫ້ເຂົາເຈົ້າເຂົ້າໄປຍາມມື້ຄືນເຂົາເຈົ້າກໍ່ຍາມ ກໍ່ຢູ່ບ່ອນລະ 4-5 ຄົນຄົນລາວເຮົານີ້ໄປເປັນຜູ້ຮ່ອນຄຳຈັ່ງຊິນ່າ.”

ພາຍຫຼັງທີ່ເຈົ້າໜ້າທີ່ ປກສ ແຂວງໄຊສົມບູນນໍາຊາວບ້ານ 21 ຄົນທີ່ລັກລອບຂຸດຄົ້ນແຮ່ຄຳ ໃນເຂດສຳປະທານຂອງບໍລິສັດ ເອທີໂອໂຕ້ ຈຳກັດໄປສຶກສາອົບຮົມແລ້ວທາງບໍລິສັດ ກໍ່ພໍໃຈຕໍ່ການລົງໂທດດັ່ງກ່າວພ້ອມທັງມີແຜນຈະສ້ອມແປງທາງເຂົ້າບ້ານພູກອງເຂົ້າ ແລະ ສ້າງນໍ້າລິນໃຫ້ຊາວບ້ານດັ່ງກ່າວເພື່ອຫຼຸດຜ່ອນຄວາມທຸກຍາກໃຫ້ຊາວບ້ານ. ອີງຕາມຂໍ້ມູນຈາກ ປກສ ແຂວງໄຊສົມບູນ.

ນອກຈາກນັ້ນໄລຍະທີ່ຜ່ານມາ ຄະນະຮັບຜິດຊອບ ແກ້ໄຂການລັກຂຸດຄົ້ນແຮ່ທາດ ແຂວງໄຊສົມບູນ ໄດ້ນໍາຕົວກຸ່ມຄົນ ທີ່ລັກຂຸດແຮ່ຄຳ ຈຳນວນ 25 ຄົນ, ເປັນຍິງ 3 ຄົນ ມາສຶກສາອົບຮົມ, ກ່າວເຕືອນ ແລະ ປ່ອຍຕົວໃນວັນທີ 17 ມິຖຸນາ 2024. ໂດຍຊາວບ້ານ ທີ່ລັກຂຸດຄົ້ນແຮ່ຄຳ ໄດ້ຖືກກັກຕົວ ໃນວັນທີ 10 ພຶດສະພາ 2024 ຢູ່ເຂດພູນາງນອນ ເມືອງທ່າໂທມ ແຂວງ ໄຊສົມບູນ. ຜ່ານການດຳເນີນການ ສືບສວນ-ສອບສວນ ຊາວບ້ານທັງໝົດ ຮັບສາລະພາບວ່າ ໄດ້ກະທຳຜິດ ຕໍ່ກົດໝາຍແທ້.