ດິນແຄມທາງ 450 ປີ ຣັຖເຫັນດີ ໂອນສິດນຳໃຊ້

ສຸພັດຕາ
2020-12-29
Share
ດິນແຄມທາງ 450 ປີ ຣັຖເຫັນດີ ໂອນສິດນຳໃຊ້ ຖນົນ 450 ປີ ທີ່ທາງການລາວ ປະກາດຂາຍ ສິດນຳໃຊ້ທີ່ດິນ ຕາມແຄມທາງ ຂອງຖນົນເສັ້ນນີ້. ຮູບຖ່າຍເມື່ອ: ເດືອນພຶສຈິກາ 2020. ໂດຍ: TS
RFA

ຜແນກຊັພຍາກອນທັມມະຊາດ ແລະສິ່ງແວດລ້ອມ ນະຄອນຫຼວງວຽງຈັນ ອອກແຈ້ງການ ເລຂທີ 11159/ພຊສ ລົງວັນທີ 17 ທັນວາ 2020 ເຣື່ອງຂາຍສິດນໍາໃຊ້ທີ່ດິນ ໃນເຂດສງວນສອງຟາກ ຖນົນວຽງຈັນ 450 ປີ ໃຫ້ບຸກຄົນ ຫຼືນິຕິບຸກຄົນ ເພື່ອເງິນນໍາມາຊໍາລະທະນາຄານ ແຫ່ງ ສປປລາວ ທີ່ກູ້ຢືມມາກໍ່ສ້າງເສັ້ນທາງ 450 ປີ, ອີງຕາມຄວາມເວົ້າ ຂອງເຈົ້າໜ້າທີ່ ຜແນກຊັພຍາກອນ ທັມມະຊາດແລະສິ່ງແວດລ້ອມ ນະຄອນຫຼວງວຽງຈັນ ທ່ານນຶ່ງ ຕໍ່ວິທຍຸເອເຊັຽເສຣີ ເມື່ອວັນທີ 24 ທັນວາ ນີ້.

“ແມ່ນໆ ບາງເທື່ອຊໍາລະຫັ່ນ ເງິນກູ້ທະນາຄານ ທີ່ຣັຖບານໄດ້ຍື່ນມາ ເຮັດໂຄງການກໍ່ສ້າງທາງນີ້ແຫຼະ ໂຕນີ້ ມັນເປັນທາງວົງແຫວນ, ແຕ່ວ່າ ທາງອ້ອມນອກ ວ່າຈ່ັງຊັ້ນສາ, ສະເພາະເສັ້ນທາງ 450 ປີ ພຸ້ນແຫຼະ ແຕ່ວ່າ ຊໍາລະສະເພາະ ໂຄງການ 450 ປີ ບໍ່ກ່ຽວກັບທາງດ່ວນ ທາງຣົດໄຟ ບໍ່ກ່ຽວຫຍັງໝົດ.”

ເຈົ້າໜ້າທີ່ ຫ້ອງການປົກຄອງ ນະຄອນຫຼວງວຽງຈັນ ກ່າວວ່າ ສໍາລັບດິນ ທີ່ຈະສາມາດຂາຍໄດ້ນັ້ນ ແມ່ນເປັນສິດຂອງຣັຖທັງໝົດ ມີເນື້ອທີ່ດິນ ຢູ່ປະມານ 1 ລ້ານປາຍຕາແມັດໃນທະນາຄານ ແລະຢູ່ໃນການຄຸ້ມຄອງຂອງຣັຖ 2 ແສນປາຍຕາແມັດ ໂດຍແບ່ງຂາຍ ຕາແມັດລະ 100-200 ໂດລ່າສະຫະຣັຖ ຂຶ້ນຢູ່ກັບເຂດທີ່ຕັ້ງ ຂອງດິນໃນແຕ່ລະບ່ອນ.

“ກະຍັງເຫຼືອ ໂຕອອກທະນາຄານ ຍັງເຫຼືອປະມານ 1 ລ້ານປາຍຕາແມັດ ກະຖືກສຸດ ກະ 100 ປາຍຂຶ້ນໄປ ຫາ 200 ມັນກໍຂຶ້ນຢູ່ກັບ ທີ່ຕັ້ງຂອງດິນແຕ່ລະເຂດນະ.”

ເຈົ້າໜ້າທີ່ ຜແນກແຜນການ ແລະການລົງທຶນ ນະຄອນຫຼວງວຽງຈັນ ກ່າວວ່າ ບຸກຄົນ ຫຼືນິຕິບຸກຄົນ ທັງຄົນລາວ ແລະຄົນຕ່າງປະເທດ ສາມາດຊື້ດິນດັ່ງກ່າວໄດ້ ໂດຍຈ່າຍເປັນເງິນສົດ ແລ້ວຈະໄດ້ສິດນໍາໃຊ້ທີ່ດິນ ເພື່ອປະກອບທຸຣະກິຈເລີຍ, ເຊິ່ງຕາມການປະຊຸມເບື້ອງຕົ້ນ ແມ່ນໃຫ້ຄົນຕ່າງປະເທດ ມີສິດນໍາໃຊ້ທີ່ດິນນີ້ ເປັນເວລາ 30-50 ປີ ຫຼັງຈາກນັ້ນ ຈຶ່ງສາມາດຂາຍຕໍ່ໃຫ້ຜູ້ອື່ນ ຫຼືຍົກເປັນດິນຂອງຣັຖບານລາວໄດ້.

“ແນວນີ້ ຄົນຕ່າງປະເທດ ກະສາມາດຊື້ໄດ້ ແຕ່ມີກໍານົດ ຢູ່ໃນກົດໝາຍ 30-50 ປີ, ແຕ່ວ່າ ຢູ່ໃນ 30-50 ປີ ເຈົ້າກໍສາມາດຂາຍຕໍ່ໄດ້ກະໄດ້ ເຈົ້າຊິເອົາເຮັດທຸຣະກິຈແນວໃດ ຂາຍກໍໄດ້ ຕໍ່ຫັ້ນນາ ເຈົ້າຊື້ໄວ້ ສິດຂອງເຈົ້າເດ້.”

ກ່ຽວກັບເຣື່ອງນີ້ ນັກວິຊາການ ຄະນະຊັພຍາກອນນໍ້າ ມະຫາວິທະຍາລັຍ ແຫ່ງຊາດລາວ ໃຫ້ຄວາມເຫັນວ່າ ຫາກຣັຖບານ ຂາຍສິດນໍາໃຊ້ທີ່ດິນ ໃນເຂດສງວນ ສອງຟາກ ຖນົນວຽງຈັນ 450 ປີ ເພື່ອນໍາເງິນມາຊໍາລະທະນາຄານ ແຫ່ງ ສປປລາວ ແລະຄ່າກໍ່ສ້າງເສັ້ນທາງ ຖືວ່າ ບໍ່ແມ່ນການແກ້ໄຂບັນຫາທີ່ຕົ້ນຕໍ, ແຕ່ຕ້ອງແກ້ໄຂບັນຫາການຮົ່ວໄຫຼ ຂອງເງິນຈາກສ່ວນອື່ນ ທີ່ເຮັດໃຫ້ຣັຖບານຂາດດຸນ ບໍ່ມີເງິນໃຊ້ໜີ້.

“ເພາະວ່າໂຕນີ້ນິ່ ມັນບໍ່ແມ່ນສ່ວນ ອົງປະກອບສ່ວນນຶ່ງ ພໍເຮັດໃຫ້ ແກ້ບັນຫາໂຕນີ້ ຈະບໍ່ເປັນໂຕແກ້ໄຂບັນຫາໂຕນີ້ ທີ່ຕົ້ນຕໍ ມັນສ່ວນອື່ນທີ່ເວົ້າເຣື່ອງ ການຮົ່ວໄຫຼຂອງເງິນ ທີ່ຈະເຂົ້າໄປ ໃນຄັງເງິນຂອງຣັຖບານ ມັນມີຫຼາຍ ມັນກໍເລີຍເຮັດໃຫ້ ເກີດບັນຫາໂຕນີ້ຂຶ້ນມານ່ະ ເຮັດໃຫ້ມັນຂາດດຸນ.”

ທ່ານກ່າວຕື່ມວ່າ ເຂດສງວນສອງຟາກ ຖນົນວຽງຈັນ 450 ປີນັ້ນ ແມ່ນເປັນເຂດເໝາະສົມ ທີ່ຈະເຮັດທຸຣະກິຈ ເຮັດອະສັງຫາຣິມະຊັພ ເນື່ອງຈາກມີລັກສະນະເນື້ອທີ່ດິນ ຂ້ອນຂ້າງຈະກວ້າງຂວາງ.

ໃນຂນະດຽວກັນ ປະຊົນ ຢູ່ເມືອງບໍຣິຄັນ ແຂວງບໍຣິຄໍາໄຊ ທ່ານນຶ່ງກ່າວວ່າ ບໍ່ເຫັນດີ ທີ່ຣັຖບານ ເຫັນດີໃຫ້ຂາຍສິດນໍາໃຊ້ທີ່ດິນ ໃຫ້ກັບຄົນຕ່າງປະເທດ ເນື່ອງຈາກ ເປັນດິນຂອງວົງຄະນະຍາດແຫ່ງຊາດ ຕ້ອງເພື່ອໄວ້ ໃນອານາຄົດໃຫ້ລູກຫຼານ ແຕ່ເຫັນດີ ທີ່ຣັຖບານຂາຍສິດນໍາໃຊ້ທີ່ດິນໃຫ້ກັບບຸກຄົນ ທີ່ມີໃບຕາດິນຂອບຄໍາ.

“ກໍຣະນີ ອັນທີ່ນຶ່ງ ຄັນແມ່ນເປັນດິນຂອງທ້າວ ຍົກໂຕຢ່າງ ແມ່ນທ້າວ ກໍ ເນາະ ແລ້ວລາວມີໃບຂອບທອງ ນັກທຸຣະກິຈມາຊື້ນໍາລາວ ລາວສາມາດຂາຍໄດ້ ແຕ່ເວົ້າເຣື່ອງດິນລວມຂອງປະເທດນີ້ ບົນພື້ນຖານເນາະ ມັນກໍບໍ່ຢາກຄັກນັ້ນແຫຼະ ເພາະວ່າ ເພື່ອລູກຫຼານເຮົາໃນອານາຄົນຕໍ່ໜ້າເດ້ເນາະ.”

ເຖິງຢ່າງໃດກໍຕາມ ສ່ວນຜູ້ໃດທີ່ມີຄວາມສົນໃຈ ຢາກຊື້ສິດນໍາໃຊ້ດິນ ໃນເຂດສງວນສອງຟາກ ຖນົນວຽງຈັນ 450 ປີ ໃຫ້ເຂົ້າມາພົວພັນ ນໍາໜ່ວຍງານກອງເລຂາ ແລະວິຊາການປະຈໍາສນາມ ຢູ່ຫ້ອງການສນາມ 450 ປີ ຕັ້ງຢູ່ບ້ານ ໂພນທອງ, ເມືອງໄຊເສດຖາ ນະຄອນຫຼວງວຽງຈັນ

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ