ສະຖານະການ ນ້ຳຖ້ວມບາງແຂວງ ຍັງເຝົ້າລະວັງ

ປັດຈຸບັນ ສະຖານນະການນໍ້າຖ້ວມ ໃນຫຼາຍແຂວງ ຍັງຕ້ອງເຝົ້າລະວັງ ເນື່ອງຈາກບາງພື້ນທີ່ ຍັງມີຝົນຕົກຕໍ່ເນື່ອງ, ຫຼ້າສຸດນີ້ໃນເມືອງວັງວຽງ ແຂວງວຽງຈັນ ໄດ້ເກີດຝົນຕົກແຮງ ຕັ້ງແຕ່ຕອນຄໍ່າ ຂອງວັນທີ 13 ສິງຫາ 2023 ຈົນມາຮອດມື້ນີ້ ຍັງບໍ່ເຊົາ ເຮັດໃຫ້ບາງພື້ນທີ່ເກີດນໍ້າຖ້ວມຂັງສູງ ປະມານ 20 ເຊັນຕີແມັດໂດຍສະເພາະ ຖນົນເລຂທີ 13 ບໍຣິເວັນຕລາດວັງວຽງ ນໍ້າໄດ້ໄຫຼເຂົ້າຖ້ວມຮ້ານຄ້າ ແລະ ບ້ານເຮືອນຂອງປະຊາຊົນ ແລ້ວຈຳນວນນຶ່ງ ສາເຫດຍ້ອນຮ່ອງລະບາຍນໍ້າ ບໍ່ສາມາດລະບາຍໄດ້ທັນ.

ດັ່ງຊາວບ້ານໃນເມືອງວັງວຽງ ທ່ານນຶ່ງກ່າວຕໍ່ວິທຍຸ ເອເຊັຽ ເສຣີ ໃນວັນທີ 14 ສິງຫາ ນີ້ວ່າ:

“ແມ່ນແຫຼະ ຖ້ວມຕອນນີ້ແຫຼະ ຝົນມັນຕົກໝົດມື້ ມັນຖ້ວມເປັນບາງບ່ອນ ຖ້ວມແຖວຖນົນບາງເຂດ ມັນຕໍ່າສື່ໆ ແມ່ນແຫຼະຝົນຍັງຕົກຢູ່ ຝົນຄອ່ຍໆດອກ ຝົນທັມມະດາ.”

ຊາວບ້ານ ໃນເມືອງວັງວຽງ ອີກທ່ານນຶ່ງກ່າວວ່າ ມື້ນີ້ຝົນຍັງຕົກຢູ່ ແຕ່ບໍ່ແຮງປານໃດ ເຊິ່ງນໍ້າກໍໄຫຼເຂົ້າຖ້ວມເຮືອນປະຊາຊົນແລ້ວ ໃນບາງຈຸດ ໂດຍສະເພາະໃນເຂດຕລາດວັງວຽງ ແຕ່ຍັງບໍ່ສູງປານໃດ ແລະ ຖນົນບາງສ່ວນ ຖືກນໍ້າຖ້ວມໃນບາງຈຸດ, ແຕ່ການສັນຈອນ ຍັງຂັບຂີ່ຣົຖໄດ້ຢູ່ ບາງພື້ນທີ່.

“ຂຶ້ນເປັນບາງບ່ອນມັນຖ້ວມ ຫົນທາງແບບວ່າ ໄປໄດ້ມາໄດ້ຢູ່ ຝົນຕົກແລ້ວມັນການໍ້າຂຶ້ນ ແລ້ວຈັກໜ້ອຍມັນກາລົງດອກ ຫ້ວຍໜອງຄອງບຶງມັນກໍໜ້ອຍ.”

ສ່ວນການສັນຈອນ ຜ່ານທາງຫຼວງໝາຍເລຂ 7 ແຕ່ເມືອງພູຄູນ ແຂວງຫຼວງພຣະບາງ ຫາ ແຂວງຊຽງຂວາງ ແລະ ເສັ້ນທາງຫຼວງເລຂທີ 13 ເໜືອ ແຕ່ເມືອງກາສີ ແຂວງວຽງຈັນ ຫາເມືອງພູຄູນ ແລະ ເມືອງຊຽງເງິນ ແຂວງຫຼວງພຣະບາງ ຍັງພົບຄວາມຫຍຸ້ງຍາກຫຼາຍຈຸດ ຍ້ອນເກີດດິນເຈື່ອນ ແລະດິນຫຍຸບ ເຮັດໃຫ້ການສັນຈອນ ດ້ວຍຄວາມຫຍຸ້ງຍາກລຳບາກ ໃນບາງຈຸດ ຊາວບ້ານຕ້ອງເດີນທາງ ຢ່າງລະມັດລະວັງ.

ດັ່ງຊາວບ້ານ ທ່ານນຶ່ງ ກ່າວວ່າ:

“ແມ່ນແຫຼະ ຊ່ວງໜ້າຝົນນີ້ ມັນທງແຮງຂີ້ຮ້າຍນ່າ ທາງກໍເປື້ອນຫັ້ນນ່າ ລະວັງເອົາຫັ້ນນ່າ ມີຝົນຕົກໝົດຄືນເລີຍ ຄ່ອຍໆໄປເອົາ.”

ອີງຕາມການຣາຍງານ ຂອງ ທ່ານ ແສງດາວ ຫຼວງວິເສດ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງພູຄູນ ແຂວງຫຼວງພຣະບາງວ່າ ການແກ້ໄຂເສັ້ນທາງດັ່ງກ່າວເບື້ອງຕົ້ນ ບໍຣິສັດຮັບເໝົາມາແກ້ໄຂພັຍສຸກເສີນ ໄດ້ມີການແກ້ໄຂແລ້ວ ເພື່ອບໍ່ໃຫ້ການສັນຈອນຕິດຂັດ ສ່ວນທາງຫຼວງທ້ອງຖິ່ນບາງຈຸດ ສາມາດສັນຈອນໄດ້ພຽງຣົຖຈັກ ແລະ ກໍຍັງມີການປັກເຄື່ອງໝາຍໄວ້ ທຸກຈຸດເພື່ອຫຼຸດຄວາມສ່ຽງ ທີ່ເກີດອຸປັດຕິເຫດ.

ສໍາລັບຄວາມເສັຍຫາຍ ເສັ້ນທາງດັ່ງກ່າວປະມານ 10 ຕື້ປາຍກີບ ແລະ ຍັງມີບ້ານເຮືອນ ຂອງຊາວບ້ານໃນເມືອງພູຄູນ ແຂວງຫຼວງພຣະບາງ ຖືກດິນຍຸບທັບ 3 ຫຼັງ ເຊິ່ງປະເມີນຄວາມເສັຍຫາຍເບື້ອງຕົ້ນ 5 ຕື້ປາຍກີບ ສ່ວນການແກ້ໄຂໄລຍະຍາວ ຕ້ອງເກັບຂໍ້ມູນໃຫ້ລະອຽດ ແລະ ຈະນຳເອກະສານ ເປັນການແກ້ໄຂແຕ່ລະໂຄງການ ແລະ ແຕ່ລະໜ້າວຽກ ໃນຂັ້ນຕອນຕໍ່ໄປ.

ນອກຈາກນີ້ ເສັ້ນທາງ ໃນແຂວງໄຊສົມບູນ ຖືກຕັດຂາດ ໂດຍສະເພາະເສັ້ນທາງ ເຂົ້າ-ອອກ ເມືອງໂທນ, ເສັ້ນທາງບ້ານອ່າວ ຫາ ເມືອງຮົ່ມ, ວັງນໍ້າຂຽວ ແລະ ສອງຟາກຕາຝັ່ງກັນເຈື່ອນ ແຄມນໍ້າຈັງ ມີປະຣິມານນໍ້າເພີ່ມສູງຂຶ້ນເຕັມຝັ່ງ ແລະ ກະແສນໍ້າໄຫຼແຮງ ປັດຈຸບັນພາກສ່ວນທີ່ກ່ຽວຂ້ອງ ກຳລັງສ້ອມແປງເສັ້ນທາງ.

ສ່ວນການປ່ອຍນໍ້າ ອອກຈາກເຂື່ອນ ສາຂາຕ່າງໆ ລົງສູ່ແມ່ນໍ້າຂອງ ໃນສັປດາທີ່ຜ່ານມາ ເປັນຕົ້ນເຂື່ອນນໍ້າຮຸ່ງ 1 ໃນແຂວງໄຊຍະບູຣີ ຕັ້ງແຕ່ວັນທີ 07 ສິງຫາ 2023 ນັ້ນ ມາຮອດປັດຈຸບັນນໍ້າເຣີ່ມຫຼຸດລົງແລ້ວ ລະດັບນໍ້າຢູ່ຕໍ່າກ່ວາຂີດແດງ ຂອງເສົາວັດແທກລະດັບຄວາມເລິກ.

ດັ່ງເຈົ້າໜ້າທີ່ ທີ່ກ່ຽວຂ້ອງໃນແຂວງໄຊຍະບູຣີ ກ່າວວ່າ:

“ອາທິດກ່ອນກາຄືວ່າ ນໍ້າມັນຝົນຕົກເນາະ 5 ມື້ ກໍຖືວ່າໝົດອາທິດແລ້ວນີ້ນ່າ. ເພິ່ນກໍໄດ້ປ່ອຍ ແຕ່ວ່າມາຮອດປັດຈຸບັນ ຖືວ່ານໍ້າປົກກະຕິແລ້ວ ນໍ້າຮຸ່ງຈະຢູ່ໃນລຸ່ມຂີດແດງ ນໍ້າມັນກໍລົງຫຼາຍ ເພາະວ່າລະບົບເຂື່ອນກໍເປັນລະບົບແບບນໍ້າລົ້ນ ຫັ້ນນ່າ.”

ພ້ອມດຽວກັນນີ້ ກັນເຈື່ອນຢູ່ເມືອງຫາດຊາຍຟອງ ນະຄອນຫຼວງວຽງຈັນ ທີ່ແຕກໃນສັປດາທີ່ຜ່ານມານັ້ນແລ້ວ ມີນໍ້າໄຫຼເຂົ້າຖ້ວມນາ ສວນຂອງຊາວບ້ານ ຈຳນວນນຶ່ງ ສະພາບນໍ້າຖ້ວມ ໄດ້ຫຼຸດລົງແລ້ວເຊັ່ນກັນ.

ດັ່ງເຈົ້າໜ້າທີ່ ທີ່ກ່ຽວຂ້ອງໃນເມືອງຫາດຊາຍຟອງ ທ່ານນຶ່ງກ່າວວ່າ:

“ມັນເປັນກັນເຈື່ອນກັນຕາຝັ່ງເຈື່ອນສື່ໆ ກໍ ມີແຕ່ຖ້ວມຮົ້ວສວນເລັກໆ ໜ້ອຍໆ ນໍ້າມັນລົງແລ້ວເດີ້ບໍ່ມີຄວາມສ່ຽງແລ້ວເດີ້ ມັນລົງຫຼາຍແລ້ວດຽວນີ້ ຢາກເຂົ້າສະພາບປົກກະຕິແລ້ວ.”

ສຳລັບສະຖານະການນໍ້າຖ້ວມ ໃນແຂວງຄຳມ່ວນໃນສັປດາຜ່ານມາ ນໍ້າກໍເຣີ່ມຫຼຸດລົງຫຼາຍແລ້ວ ຊາວບ້ານສ່ວນຫຼາຍ ກັບໄປະອະນາໄມເຮືອນຊານແລ້ວ ຄວາມເສັຍຫາຍສ່ວນຫຼາຍ ເປັນໄຮ່ນາ ຮົ້ວສວນ ແລະສັດລ້ຽງ ຈຳນວນຫຼາຍ ແຕ່ກໍຍັງບໍ່ສາມາດໃຊ້ໄຟຟ້າໄດ້ ແລະນໍ້າະອາດ ຍັງບໍ່ມີໃຊ້.

ດັ່ງຊາວບ້ານ ເມືອງຄູນຄຳກ່າວວ່າ:

“ລົງແລ້ວກຳລັງ ອັນແບບອະນາໄມເຮືອນຄືນແລ້ວ ມື້ວານນີ້ບໍ່ຕົກແຕ່ມື້ນີ້ມັນຕົກນໍ້າ ສະອາດກໍບໍ່ຄ່ອຍມີຫຼາຍ ຊິໃຊ້ນໍ້າສ້າງໄຟຟ້າ ຍັງໃຊ້ບໍ່ໄດ້ເທື່ອເດີ້.”

ຊາວບ້ານທ່ານນີ້ ຍັງໄດ້ກ່າວຕື່ມວ່າ ກໍມີຜູ້ຄົນໃຈບຸນຈໍານວນຫຼາຍຫຼັ່ງໄຫຼ ເດີນທາງເຂົ້າມາບໍຣິຈາກເຂົ້າສານ ອາຫານແຫ້ງ ແລະ ນໍ້າດື່ມຫຼາຍ ລວມເຖິງເຈົ້າໜ້າທີ່ ເລັ່ງໃຫ້ການຊ່ອຍເຫຼືອ.

ດ້ານເຈົ້າໜ້າທີ່ ທີ່ກ່ຽວຂ້ອງເມືອງຄູນຄໍາ ກ່າວວ່າ ປັດຈຸບັນທາງເມືອງຍັງໃຫ້ຊາວບ້ານ ເຝົ້າລະວັງຢູ່ເຖິງແມ່ນວ່າ ເຂື່ອນບໍ່ໄດ້ປ່ອຍນ້ຳແລ້ວ ກໍຕາມ ເພາະຍັງມີຝົນຕົກຕໍ່ເນື່ອງ ສ່ວນໄຟຟ້າທີ່ຖືກຕັດຂາດ ມາຮອດມື້ນີ້ ສາມາດໃຊ້ໄດ້ 6 ບ້ານແລ້ວ.

“ບໍ່ມີນໍ້າເຂື່ອນປ່ອຍລົງມາ ມີແຕ່ຝົນຕົກເນາະ ຝົນຕົກຕລອດເລີຍເມືອງເຮົານີ້ນ່າ ຍັງເຝົ້າລະວັງຢູ່ ຝົນຕົກຕິດຕໍ່ດຽວນີ້ ຢ້ານມັນມາຮອບສອງແລ້ວ ໃຫ້ປະຊາຊົນນັ້ນເຝົ້າລະວັງ ຕິດຕາມຣາຍງານ ທາງການເປັນໄລຍະຫັ້ນແຫຼະ.”

ສຳລັບຄວາມເສັຍຫາຍ ໃນເມືອງຄູນຄຳ ແຂວງຄຳມ່ວນ ກອງເລຂາຄະນະກັມມະການ ຄຸ້ມຄອງພັຍພິບັດຂັ້ນເມືອງ ຣາຍງານທົ່ວເມືອງຄູນຄຳ ຖືກນໍ້າຖ້ວມ 14 ບ້ານເຊິ່ງມີທັງໝົດ 2,812 ຄອບຄົວ ແລະ 12,767 ຄົນ ແລະ ໃນນີ້ມີ 9 ບ້ານໄດ້ຮັບຜົລກະທົບໜັກ ສ່ວນເນື້ອທີ່ກະສິກັມ ຖືກນໍ້າຖ້ວມທັງໝົດ 22 ບ້ານ, ຈຳນວນ 6,138 ເຮັກຕ້າຣ໌ ສ່ວນຫຼາຍເປັນເນື້ອທີ່ນາ, ສວນມັນ, ສວນກ້ວຍ, ສວນຢາງພາຣາ ແລະ ສວນຜັກຕ່າງໆ.

ນອກຈາກນີ້ຍັງມີສັດລ້ຽງ 16,988 ໂຕ ທີ່ສູນຫາຍ, ໃນນັ້ນມີຄວາຍ, ງົວ, ໝູ, ແບ້ ແລະ ສັດປີກ 14,925 ໂຕ, ໜອງປາຖືກນໍ້າຖ້ວມ 284 ໜອງ, ຣົຖໄຖ 609 ຄັນ, ໂຮງສີເຂົ້າ 87 ໂຮງ, ເລົ້າເຂົ້າ 56 ຫຼັງ, ຈຳນວນເຂົ້າເສັຍຫາຍ 599 ຕັນ, ເຕົາຢາສູບ 47 ເຕົາ ແລະ ເຄື່ອງໃຊ້ໄຟຟ້າ ຈຳນວນນຶ່ງ. ພ້ອມນີ້ຍັງມີຜູ້ເສັຍຊີວິດ 1 ຄົນ ຈາກດິນເຈື່ອນທັບ ເປັນຄົນວຽດນາມ ແລະທັງເປັນໂຊເຟີຂັບຣົຖ ບັນທຸກ ແລະໄດ້ພົບສົບ ໃນວັນທີ 14 ສິງຫາ 2023. ຄະນະຄຸ້ມຄອງພັຍພິບັດ ຂັ້ນສູນກາງສເນີຮັບຮອງເອົາແຂວງຄໍາມ່ວນ ເປັນເຂດປະສົບພັຍພິບັດ 3 ເມືອງ ເພື່ອການລະດົມທຶນຊ່ອຍເຫຼືອ ຈາກພາກສ່ວນຕ່າງໆ ໃນນັ້ນມີເມືອງຄູນຄຳ, ເມືອງຫີນບູນ ແລະ ເມືອງນາກາຍ ເພາະໄດ້ຮັບຜົລກະທົບໜັກ ແລະ ເປັນວົງກ້ວາງ.