ເຮືອນຢູ່ຖາວອນ ຜູ້ປະສົບພັຍເຂື່ອນແຕກ ຍັງສ້າງບໍ່ແລ້ວໝົດ

ເມື່ອຕົ້ນເດືອນກັນຍາ 2022 ທີ່ຜ່ານມານີ້ ທ່ານ ເລັດ ໄຊຍະພອນ ເຈົ້າແຂວງ, ແຂວງອັດຕະປື ໄດ້ໃຫ້ສັມພາດຕໍ່ວິທຍຸ ແຫ່ງຊາຕ ໂດຍທ່ານລະບຸວ່າ ຈະມອບເຮືອນຢູ່ຖາວອນ ຈໍານວນ 700 ຫຼັງ ໃຫ້ກັບຊາວບ້ານ ຜູ້ປະສົບພັຍເຂື່ອນແຕກ ເມືອງສນາມໄຊ ໃຫ້ສໍາເຣັດ 100% ພາຍໃນເດືອນ ຕຸລາ ປີ 2022 ນີ້ ພາຍຫຼັງ ທີ່ເກີດຄວາມຊັກຊ້າ ຍ້ອນການຣະບາດ ຂອງເຊື້ອໂຄວິດ-19.

ດັ່ງທ່ານ ເລັດ ໄຊຍະພອນ ເຈົ້າແຂວງ, ແຂວງອັດຕະປື ໄດ້ໃຫ້ສັມພາດຕອນນຶ່ງວ່າ:

“ການແກ້ໄຂ ນັບແຕ່ປີ 2018 ມາເຖິງປັດຈຸບັນນີ້ ອັນສໍາຄັນລະວຽກງານເປັນພື້ນຖານ ລະຖືວ່າໄດ້ໝົດແລ້ວ ນັບແຕ່ຊີວິຕ ການເປັນຢູ່ບໍ, ລາຍຮັບຂອງຄອບຄົວ ຫຼືວ່າ ການຢູ່ອາສັຍນີ້ ຖືວ່າ ໄດ້ແກ້ໄຂໝົດແລ້ວ ດຽວນີ້ວຽກຍັງຄ້າງ ມັນມີແຕ່ວຽກຊົດເຊີຽ ທີ່ເກັບເລັມຄືນ. ເຮືອນ 700 ຫຼັງ ກະຖືວ່າ ໃນເດືອນ 10 ນີ້ ຈະມອບ 100%.”

ແຕ່ມາຮອດປັດຈຸບັນ ວຽກງານການກໍ່ສ້າງເຮືອນ ຢູ່ຖາວອນ ອີກປະມານ 100 ຫຼັງ ກໍຍັງບໍ່ທັນສໍາເຣັດເທື່ອ ເຊິ່ງຈະເຮັດໃຫ້ການ ມອບ-ຮັບ ເຮືອນຢູ່ຖາວອນ ໃຫ້ກັບຜູ້ປະສົບພັຍ ເຂື່ອນແຕກ ຈໍານວນນຶ່ງ ໃນເມືອງສນາມໄຊ ຈະຕ້ອງເລື່ອນອອກໄປຕື່ມອີກ ແບບບໍ່ມີກໍານົົດ ເຊິ່ງສ້າງຄວາມອຸກອັ່ງໃຈ ໃຫ້ກັບຊາວບ້ານ ເຫຼົ່ານັ້ນຫຼາຍ.

ດັ່ງຊາວບ້ານຜູ້ນຶ່ງ ໃນເມືອງສນາມໄຊ ແຂວງອັດຕະປື ກ່າວຕໍ່ວິທຍຸ ເອເຊັຽເສຣີ ໃນມື້ວັນທີ 3 ພຶສຈິກາ ນີ້ວ່າ:

“ເຮືອນໃໝ່ ກະຍັງບໍ່ແລ້ວ. ຍັງບໍ່ທັນແລ້ວເທື່ອ, ຍັງບໍ່ທັນໄດ້ຢູ່ ແລ້ວບາງຄົນ ກະຍັງບໍ່ໄດ້ຂຶ້ນໄປ ກະມີ. ຂຶ້ນໄປຢູ່ກະຍັງຊິເຮັດຫຼາຍຢ່າງ ໄດ້ເຮັດຮົ້ວເຮັດຮາວ ຍັງບໍ່ທັນເຮັດໄປ ບາດນີ້ເຄື່ອງປູກຂອງຝັງ ກະຍັງຢູ່ເຮືອນເກົ່າ ມັນກະເຂົ້າເດືອນພຶສຈິກາແລ້ວ. ຄວາມຈິງເຮົາກະບໍ່ຮູ້ ຈັກຊິເຮັດແນວໃດ ເຮົາກະລໍຖ້າແຕ່ທາງຂັ້ນເທິງເພິ່ນ.”

ຊາວບ້ານຜູ້ນີ້ ຍັງກ່າວອີກຕື່ມວ່າ ໄລຍະຜ່ານມາ ທາງການແຂວງອັດຕະປື ກໍໄດ້ມອບເຮືອນຢູ່ ຖາວອນ ໃຫ້ກັບຜູ້ປະສົບພັຍໄປແລ້ວ ເປັນສ່ວນໃຫຍ່ ແຕ່ກໍມີບາງຄອບຄົວ ໄດ້ຮັບເຮືອນຢູ່ ຖາວອນໄປແລ້ວ ບໍ່ຄຸ້ນເຄີຍກັບເຮືອນ ກໍ່ດ້ວຍຊີເມັນ ຈຶ່ງພາກັນໄປປຸກຕູບ ຢູ່ຕາມໄຮ່ຕາມສວນ ຂອງໂຕເອງ.

ນອກຈາກນີ້ ເຮືອນຢູ່ຖາວອນບາງຫຼັງ ກໍ່ສ້າງບໍ່ໄດ້ມາຕຖານ ຍ້ອນເປັນປ່ອງເປັນຮູ ເຮັດໃຫ້ຊາວບ້ານທີ່ໄດ້ເຮືອນຫຼັງດັ່ງກ່າວ ຕ້ອງໄດ້ຫາເງິນມາສ້ອມແປງ ແລະຕໍ່ເຕີມເອົາເອງ.

ຊາວບ້ານອີກຜູ້ນຶ່ງ ໃນເມືອງສນາມໄຊ ກ່າວວ່າ ທໍາອິດກໍວ່າ ຈະກໍ່ສ້າງເຮືອນຢູ່ ຖາວອນໃຫ້ສໍາເຣັດໄວ ທີ່ສຸດ ແລະຈະໄດ້ມອບໃຫ້ກັບຊາວບ້ານ ຜູ້ປະສົບພັຍ ໃນເດືອນຕຸລານີ້ ໂດຍສະເພາະ ຜູ້ປະສົບພັຍ ຢູ່ບ້ານຕາມະຢອດ ແລະກຸ່ມບ້ານສມອງເໜືອ-ສມອງໃຕ້ ທີ່ຍັງບໍ່ມີຄອບຄົວໃດ ໄດ້ຮັບເຮືອນຢູ່ ຖາວອນເທື່ອ.

ແຕ່ຊາວບ້ານບ້ານເຫຼົ່ານັ້ນ ກໍຕ້ອງເສັຍໃຈອີກຄັ້ງ ເນື່ອງຈາກການກໍ່ສ້າງເຮືອນຢູ່ ຖາວອນ ເກີດຄວາມຊັກຊ້າຫຼາຍ ຈົນສ້າງບໍ່ສໍາເຣັດ ຕາມແຜນການ ແລະຕ້ອງເລື່ອນອອກໄປ ແບບບໍ່ມີກໍານົດ ເຊິ່ງຊາວບ້ານ ກໍຈະຕ້ອງພັກອາສັຍຢູ່ເຮືອນ ພັກຊົ່ວຄາວໄປເລື້ອຍໆ ຈົນກວ່າຈະສ້າງເຮືອນຢູ່ ຖາວອນສໍາເຣັດ.

ດັ່ງຊາວບ້ານຜູ້ນີ້ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ຄຸ້ມບ້ານໃຫຍ່ ຂອງບ້ານຫິນລາດຫັ້ນເຂົາຂຶ້ນແລ້ວ ຍັງແຕ່ຄຸ້ມບ້ານຕາມະຢອດ ຄຸ້ມບ້ານສມອງເໜືອ ຍັງບໍ່ທັນໄດ້ຢູ່ ມັນບໍ່ທັນແລ້ວ, ກະຢູ່ເຮືອນເຫຼັກຄືເກົ່າ ເຫັນວ່າ ກໍານົດວ່າ ປະມານເດືອນ 12 ນີ້ແຫຼະ ຊິໃຫ້ມັນແລ້ວໝົດຫັ້ນນ່າ.”

ສ່ວນຊາວບ້ານອີກຜູ້ນຶ່ງ ໃນເມືອງສນາມໄຊ ກ່າວວ່າ ຕາມການສັງເກດເບິ່ງ ຕໍ່ກັບວຽກງານກໍ່ສ້າງເຮືອນຢູ່ຖາວອນນັ້ນ ກໍເຫັນວ່າ ຍັງມີຄວາມຊັກຊ້າຫຼາຍ ຂະນະທີ່ ກັມມະກອນມາກໍ່ສ້າງ ກໍມີໜ້ອຍ. ສ່ວນການຊົດເຊີຽເງິນ ຣາຍການສຸດທ້າຍ ປະເພດຊັບສິນມີຄ່າ ກໍຍັງບໍ່ໄດ້ສລຸບວ່າ ຊາວບ້ານຜູ້ປະສົບພັຍ ຈະໄດ້ຮັບເງິນຊົດເຊີຽໃນມື້ໃດແທ້.

ດັ່ງຊາວບ້ານຜູ້ນີ້ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່ານີ້ວ່າ:

“ຍັງ ຍັງບໍ່ທັນໄດ້ຂຶ້ນນ່າ ເພິ່ນກະທຽວໄປເບິ່ງ ຊ່າງເຂົາເຮັດບໍ່ທັນແລ້ວເທື່ອ ເງິນຊົດເຊີຽກະວ່າ ຣາຍການທີ່ 6 ເທື່ອສຸດທ້າຍນີ້ ກະວ່າ ວ່າຈະໃຫ້ທ້າຍເດືອນ 12 ນີ້ກະເປີເຊັນໜ້ອຍ.”

ກ່ຽວກັບເຣື່ອງນີ້ ເຈົ້າໜ້າທີ່ແຂວງອັດຕະປື ທ່ານນຶ່ງກ່າວວ່າ ສໍາລັບວຽກງານການກໍ່ສ້າງ ເຮືອນຢູ່ຖາວອນ ຖືວ່າ ເກີດຄວາມຊັກຊ້າເລັກໜ້ອຍ ຈໍາເປັນຈະຕ້ອງເລື່ອນການ ຮັບ-ມອບ ຈາກເດືອນຕຸລາ ອອກໄປເປັນເດືອນທັນວາ 2022 ນີ້ ເນື່ອງຈາກ ກັມມະກອນທີ່ມາກໍ່ສ້າງເຮືອນ ຢູ່ຖາວອນ ມີຈໍານວນໜ້ອຍ ສາເຫດທີ່ມີໜ້ອຍ ກໍມາຈາກ ໄດ້ຮັບຄ່າຕອບແທນຊ້າ.

ສ່ວນການຊົດເຊີຽເງິນ ໃນຣາຍການສຸດທ້າຍ ປະເພດຊັບສິນມີຄ່ານັ້ນ ຕາມແຜນການ ກໍວ່າຈະມອບໃຫ້ຊາວບ້ານຜູ້ປະສົບພັຍ ໃນເດືອນທັນວານີ້ ແຕ່ກະຕ້ອງເບິ່ງສະພາບການໂຕຈິງ ແລະການເຮັດວຽກ ຂອງພາກສ່ວນທີ່ກ່ຽວຂ້ອງຂັ້ນແຂວງ ແລະບໍຣິສັດຜູ້ພັທນາໂຄງການ ກໍຄື ບໍຣິສັດເຂື່ອນໄຟຟ້າ ເຊປຽນ-ເຊນໍ້ານ້ອຍ ຈະເຫັນດີກັບຂໍ້ມູນຈາກການປະເມີນ ວ່າຈະໃຫ້ເງິນຊົດເຊີຽແນວໃດ.

ຫາກບໍຣິສັດ ເຂື່ອນໄຟຟ້າເຊປຽນ-ເຊນໍ້ານ້ອຍ ເຫັນດີກັບການປະເມີນໃນຄັ້ງນີ້ ຊາວບ້ານຜູ້ປະສົບພັຍ ກໍຈະໄດ້ຮັບເງິນຊົດເຊີຽ ໃນເດືອນທັນວາ ຕາມແຜນການ, ແຕ່ຫາກບໍຣິສັດ ບໍ່ເຫັນດີ ທາງການແຂວງອັດຕະປື ກໍຈະຕ້ອງໄດ້ລົງພື້ນທີ່ ໄປປະເມີນຊັບສິນຄືນໃໝ່.

ດັ່ງເຈົ້າໜ້າທີ່ທ່ານນີ້ ກ່າວຕໍ່ວິທຍຸ ເອເຊັຽເສຣີ ໃນມື້ດຽວກັນນີ້ວ່າ:

“ເພິ່ນວ່າຊິໃຫ້ແລ້ວ ແຕ່ເພິ່ນກະຢາກຟ້າວເລັ່ງ ປິດໃຫ້ມັນແລ້ວຫັ້ນແຫຼ້ວ ໂຕທີ່ 2 ກະແມ່ນຣາຍການ (ຊົດເຊີຽ) ທີ່ສຸດທ້າຍຫັ້ນແຫຼະ ໃຫ້ມັນແລ້ວໄປໝົດ ເຫຼືອຂັ້ນສູດທ້າຍ ກະແມ່ນພາກຣັຖເຮົາແລ້ວບາດນີ້, ບາດນີ້ ປຸກ (ເຮືອນ) ຂຶ້ນມາແລ້ວ ບາງຄອບຄົວ ກະບໍ່ຢູ່ ພຸ້ນແລ້ວຍັງຢູ່ຮົ້ວຢູ່ສວນ ບໍ່ມາໄກ້ເຮືອນກະມີ ວິຖີຊີວິຕ ຍັງອາສັຍແບບທັມມະຊາຕຢູ່ນ່າ.”

ເຫດການສັນເຂື່ອນ D ຂອງເຂື່ອນເຊປຽນ-ເຊນໍ້ານ້ອຍແຕກ ແມ່ນເກີດຂຶ້ນໃນມື້ວັນທີ 23 ກໍຣະກະດາ ປີ 2018 ເຮັດໃຫ້ຊາວບ້ານ ໃນເມືອງສນາມໄຊ ແຂວງອັດຕະປື ຈໍານວນ 19 ບ້ານ ໄດ້ຮັບຄວາມເສັຍຫາຍຢ່າງໜັກໜ່ວງ ໃນນັ້ນ ມີ 6 ບ້ານ ເສັຍຫາຍຈົນໝົດ 100% ແລະມີຜູ້ເສັຍຊີວິຕ 71 ຄົນ ຊາວບ້ານ ບໍ່ມີທີ່ຢູ່ອາສັຍຖາວອນ ປະມານ 14,440 ຄົນ.

ອີງຕາມແຜນການຟື້ນຟູ ຜົລກະທົບ ແລະຄຸນນະພາບຊີວິຕ ຂອງຜູ້ປະສົບພັຍ ເມືອງສນາມໄຊ ລະບຸວ່າ ທາງການແຂວງອັດຕະປື ຈະກໍ່ສ້າງເຮືອນຢູ່ຖາວອນ ແລະ ມອບຮັບ ໃຫ້ສໍາເຣັດພາຍໃນປີ 2022 ແລະພາຍໃນປີ 2025 ທຸກໂຄງການພັທນາ ຕ້ອງສໍາເຣັດທັງໝົດ 100% ແລະ ຜູ້ປະສົບພັຍທຸກຄົນ ຕ້ອງມີຊີວິຕການເປັນຢູ່ທີ່ດີຂຶ້ນ ເຊິ່ງເປັນເງິນທີ່ໄດ້ຮັບຈາກບໍຣິສັດ ເຂື່ອນໄຟຟ້າ ເຊປຽນ-ເຊນໍ້ານ້ອຍ ຈໍານວນ 828 ຕື້ປາຍກີບ.