ເຊກອງເຕືອນ ປະຊາຊົນ ໃຫ້ເຝົ້າລະວັງ ເຂື່ອນວຽດນາມປ່ອຍນ້ຳ

ຜແນກ ຊັພຍາກອນທັມມະຊາຕ ແລະ ສິ່ງແວດລ້ອມ ແຂວງເຊກອງ ແຈ້ງເຕືອນ ປະຊາຊົນ ໃນວັນທີ 18 ຕຸລາ 2023 ເຖິງເຣື່ອງ ບໍຣິສັດ ຫຸ້ນສ່ວນເຂື່ອນໄຟຟ້ານໍ້າຕົກ ພາກກາງ ຫລື ເຂື່ອນອາເລື້ອຍ ຂອງ ປະເທດວຽດນາມ ປ່ອຍນໍ້າອອກຈາກເຂື່ອນ ເຮັດໃຫ້ລະດັບແມ່ນໍ້າເຊກອງສູງຂຶ້ນ ໂດຍສະເພາະຊາວບ້ານ ທີ່ອາໄສຢູ່ລຽບຕາມຊາຍແດນ ເເມ່ນໍ້າເຊກອງ ໃຫ້ລະມັດລະວັງ ແລະ ມີສະຕິຕຽມຄວາມພ້ອມຮັບມືໄວ້ ຕັ້ງແຕ່ວັນທີ 18 ຕຸລາ ຫາ 20 ຕຸລາ 2023 ນີ້ ແລະ ປະຣິມານການປ່ອຍນໍ້າ ອອກຈາກເຂື່ອນອາເລື້ອຍ ຢູ່ທີ່ 1,600 ແມັດກ້ອນ ຕໍ່ວິນາທີ ຕາມການຄາດຄະເນ ໃນໄລຍະ 3 ມື້ນີ້ ແມ່ນໍ້າເຊກອງ ຈະມີປະຣິມານນໍ້າສູງຂຶ້ນ ສເລັ້ຽ ປະມານ 9 -10 ແມັດປາຍ.

ໃນວັນທີ 18 ຕຸລາ ຜ່ານມານີ້ ກ່ອນທີ່ເຂື່ອນອາເລື້ອຍ ຂອງວຽດນາມ ຈະປ່ອຍນໍ້າ ເຈົ້າໜ້າທີ່ແຂວງເຊກອງ ວັດແທກລະດັບນໍ້າເຊກອງ ປະມານ 4 ແມັດ ແລະ ເມື່ອເຂື່ອນ ປ່ອຍນໍ້າລົງມາ ລະດັບແມ່ນໍ້າເຊກອງສູງຂຶ້ນ ປະມານ 10 ແມັດ. ເບື້ອງຕົ້ນນໍ້າໄດ້ຖ້ວມຂົວຂ້າມເຊກອງ ຜ່ານໄປເມືອງກະລຶມ ແຕ່ຍັງບໍ່ໄດ້ຮັບຜົລກະທົບ ເສັຽຫາຍ ອັນໃດທີ່ຮ້າຍແຮງ.

ຕໍ່ມາ ໃນວັນທີ 19 ຕຸລາ 2023 ນີ້ ລະດັບນໍ້າເຊກອງ ໄດ້ຫລຸດລົງ ປະມານ 3-4 ແມັດແລ້ວ ແລະ ຖ້າຝົນບໍ່ຕົກຕື່ມບໍ່ໜ້າເປັນຫ່ວງ.

ດັ່ງ ເຈົ້າໜ້າທີ່ ທີ່ກ່ຽວຂ້ອງ ໃນແຂວງເຊກອງ ທ່ານນຶ່ງ ຜູ້ຂໍສງວນຊື່ ແລະ ຕຳແໜ່ງ ກໍກ່າວຕໍ່ວິທຍຸເອເຊັຽເສຣີ ໃນວັນທີ່ 19 ຕຸລາ ນີ້ວ່າ:

“ເອີ. ມັນມາແຕ່ມື້ຊືນພຸ້ນແຫລະ ແຕ່ວານນີ້ພຸ້ນ ປະມານຂຶ້ນ 5-6 ແມັດນີ້ ດຽວນີ້ມັນກໍລົງເດ້ 3-4 ແມັດ ແຫລະ ເພາະວ່າ ຝົນມັນຕົກແຕ່ທາງເຂົາ ທາງເຮົາມັນບໍ່ຕົກປານໃດ ມັນກໍຈະວິດແລ້ວ ປ່ອຍຊ່ວງມື້ວານນີ້ ມັນກໍຮອດແລ້ວ ມັນບໍ່ຕົກຕື່ມ ມັນກໍບໍ່ມີບັນຫາດອກ ທາງນີ້ ມື້ນີ້ ມີແດດແລ້ວ ບໍ່ມີຫຍັງ.”

ພ້ອມດຽວກັນນີ້ ເຈົ້າໜ້າທີ່ ທີ່ກ່ຽວຂ້ອງໃນແຂວງເຊກອງ ອີກທ່ານນຶ່ງ ກ່າວວ່າ ການປ່ອຍນໍ້າເຂື່ອນອາເລື້ອຍ ຂອງວຽດນາມລົງມານີ້ ທາງແຂວງເຊກອງ ຍັງເຝົ້າລະວັງໃນໄລຍະ 3 ມື້ນີ້ ເພາະປະຣິມານນໍ້າ ຈະໄຫລຈາກເຂື່ອນອາເລື້ອຍ ຜ່ານແມ່ນໍ້າເຊກອງໄປເມືອງກະລຶຶມ, ເມືອງລະນາມ, ເມືອງຊານໄຊ, ເມືອງ ໄຊເສດຖາ ລວມໄປເຖິງ ເມືອງສນາມໄຊ ແຂວງອັດຄະປື ແລະ ປະຣິມານນໍ້າ ຈະລົງຊູ່ແມ່ນໍ້າຂອງ ແລະ ມາມື້ນີ້ ແມ່ນໍ້າເຊກອງຫລຸດລົງແລ້ວ.

“ແມ່ນທາງ ສ.ສ ວຽດນາມກໍແຈ້ງຢູ່ ເວລາເພີ່ນບໍຣິຫານນໍ້າອອກຈາກເຂື່ອນ ເພີ່ນປ່ອຍມື້ວານນີ້ ມັນລົງແລ້ວນໍ້າ. ເພີ່ນປ່ອຍ ກໍປ່ອຍ ໃນລະດັບຄ່ອຍ 3 ມື້ເນາະ. ມາຈາກຊາຍແດນວຽດນາມ ຕິດຈອດກັບແຂວງເຊກອງ. ຕົກໃສ່ນໍ້າຂອງ ທາງເຊປຽນ ພຸ້ນເລີຍ ໃສ່ຂະເມນພຸ້ນ.”

ຂະນະທີ່ຊາວບ້ານ ໃນແຂວງເຊກອງ ທ່ານນຶ່ງ ກ່າວວ່າ ໄດ້ຍິນຂ່າວ ການແຈ້ງເຕືອນ ຂອງທາງການແລ້ວ ທີ່ທາງວຽດນາມ ແຕ່ປີນີ້ ບໍ່ເປັນຕາຢ້ານປານໃດ ເພາະ ຝົນບໍ່ໄດ້ຕົກແຮງ ຄືປີກາຍທີ່ຜ່ານມາ ທີ່ມີຝົນຕົກຕິດຕໍ່ກັນ 2 ອາທິດ ເຮັດໃຫ້ເກີດນໍ້າຖ້ວມໜັກຫລາຍບ່ອນ ແລະ ມື້ນີ້ກໍໄດ້ຍິນວ່າ ແມ່ນໍ້າເຊກອງ ປະຣິມານຫລຸດລົງແລ້ວ.

“ໂອ. ໄລຍະນີ້ ມັນຢາກລົງແດ່ແລ້ວເດ້ ປົກກະຕິ ເປັນຕາຢ້ານ ຄືປີກາຍນີ້ ເປັນຕາຢ້ານ ເພາະວ່າ ມັນຝົນເປັນອາທິດ ໂອ້ ຖ້ວຍຫລາຍປີກາຍນີ້. ປີນີ້ບໍ່ຢ້ານປານໃດ.”

ຂະນະທີ່ຊາວບ້ານ ໃນແຂວງເຊກອງ ທ່ານນຶ່ງ ກໍກ່າວວ່າ ໃນວັນທີ 18 ຕຸລາ 2023 ທາງການກໍໄດ້ແຈ້ງການໃຫ້ປະຊາຊົນ ຮັບຮູ້ແລ້ວ ວ່າ ທາງວຽດນາມ ຈະປ່ອຍນໍ້າອອກຈາກເຂື່ອນ ເພາະປະຣິມານນໍ້າຫລາຍເກີນໄປ ຖ້າເຂົາເຈົ້າບໍ່ປ່ອຍ ເຂື່ອນເຂົາຈະແຕກ ແລະ ມາມື້ນີ້ ຝົນບໍ່ຕົກ ແມ່ນໍ້າເຊກອງ ໜ້າຈະຫລຸດລົງ.

“ເຫັນເພິ່ນແຈ້ງຢູ່ຫັ້ນວ່າ ໃຫ້ ປະຊາຊົນມິສຕິ ລະວັງຕົວຫັ້ນນ່າ ລະດັບນໍ້າມັນຫລາຍຫັ້ນນ່າ ເພີ່ນປ່ອຍຫລາຍ ຝົນຕົກໜັກຫັ້ນນ່າ ລະດັບນໍ້າມັນຊິລົ້ນເຂື່ອນ ຢ້ານເຂື່ອນແຕກແລ້ວ ແລ້ວເພີ່ນກໍຕ້ອງໄດ້ລະບາຍອອກ ມື້ນີ້ ເຫັນແດດແດ່ໜ້ອຍນຶ່ງ ນໍ້າຄືຊິຫລຸດລົງຫັ້ນນ່າ.”

ເຖິງຢ່າງໃດກໍຕາມ ຍັງບໍ່ມີຣາຍງານຄວາມເສັຽຫາຍ ຈາກໄພພິບັດນໍ້າຖ້ວມ ທີ່ເກີດຈາກການປ່ອຍນໍ້າ ຈາກເຂື່ອນອາເລື້ອຍ ຂອງປະເທດວຽດນາມ ແລະ ສະພາບແມ່ນໍ້າເຊກອງ ຍັງປົກກະຕິ ບວກກັບ ສະພາບອາກາດ ບໍ່ມີຝົນຕົກ. ກ່ອນໜ້ານີ້ ໃນວັນທີ 25-28 ເດືອນກັນຍາ 2023 ທີ່ຜ່ານມາ ເຂື່ອນໄຟຟ້າອາເລື້ອຍ ກໍໄດ້ມີການປ່ອຍນໍ້າ ຈາກເຂື່ອນລົງສູ່ ແມ່ນໍ້າເຊກອງ ເຊິ່ງໃນໄລຍະນັ້ນກໍມີ ພາຍຸຣະດູຮ້ອນ (Depression) ເຂົ້າມານຳດ້ວຍ ທາງການແຂວງເຊກອງ ກໍໄດ້ອອກເເຈ້ງເຕືອນ ປະຊາຊົນເຊັ່ນກັນ ໂດຍທາງເຂື່ອນອາເລື້ອຍ ໄດ້ປ່ອຍນໍ້າ ປະຣິມານ 100-600 ແມັດກ້ອນ ຕໍ່ວິນາທີເຮັດໃຫ້ລະດັບນໍ້າ ເຊກອງສູງຂຶ້ນຈາກ 3 ແມັດປາຍ ເປັນ 7 ແມັດປາຍ ຂະນະທີ່ລະດັບນໍ້າເຂດເຕືອນໄພ 17 ແມັດປາຍ ເຂດອັນຕະຣາຍ 18 ແມັດປາຍ. ອີງຕາມແຈ້ງເຕືອນລະດັບນໍ້າເຊກອງ ຂອງແຂວງເຊກອງ ເລຂທີ 102/ພຊສ.ຊກ ຕໍ່ການປ່ອຍນໍ້າ ຂອງເຂື່ອນອາເລື້ອຍ, ໃນວັນທີ 26 ກັນຍາ 2023 ລະດັບນໍ້າ ນໍ້າເຊກອງ ເຂດທ່າບັກ ເມືອງກະລຶມເກົ່າ ສູງຂຶ້ນ ເຊິ່ງຣົຖບໍ່ສາມາດສັນຈອນ ຂ້າມຂົວນໍ້າເຊກອງໄດ້ ແລະ ຍັງບໍ່ມີຣາຍງານ ພົບຄວາມເສັຽຫາຍດ້ານອື່ນໆ.