ທ່ານ ໂຕຣຸ ກຸໂບຕະ (Toru Kubota) ເປັນນັກຂ່າວຍີ່ປຸ່ນ ຖືກສານທະຫານພະມ້າ ຕັດສິນຈຳຄຸກ 7 ປີ ໃນຂະນະທີ່ ລາວເອງກຳລັງຖ່າຍວີດີໂອ ການປະທ້ວງ ຂອງປະຊາຊົນຊາວພະມ້າ ໂດຍສານທະຫານພະມ້າ ຕັດສິນວ່າ ລາວມີຄວາມຜິດ ຂໍ້ຫາປະຈານ ປະເທດພະມ້າ ແລະ ລະເມີດກົດໝາຍ ການສື່ສານ ທາງອິນເຕີຣ໌ເນັຕ.
ນັກຂ່າວ ຍີ່ປຸ່ນຄົນນີ້ ຖືກສານຕັດສິນ 3 ປີ ໃນຂໍ້ຫາທີ 1 ແລະ ຖືກຕັດສິນອີກ 7 ປີ ໃນຂໍ້ຫາທີ 1, ແຕ່ວ່າ ໃນການຕັດສິນ ກໍໄດ້ລວມເອົາການລົງໂທດ 7 ປີ ເທົ່ານັ້ນ. ນອກຈາກນີ້ ນັກຂ່າວຄົນນີ້ ຍັງຈະຖືກດຳເນີນຄະດີ ອີກໃນຂ້ຫາທີ 3 ວ່າດ້ວຍການລະເມີດ ກົດໝາຍກວດຄົນເຂົ້າເມືອງ. ທະນາຍ ຂອງນັກຂ່າວຄົນນີ້ ກ່າວວ່າ ພາກທີ 13 ຂອງກົດໝາຍວ່າດວ້ຍ ການກວດຄົນເຂົ້າເມືອງ ຂອງພະມ້າ ໄດ້ລະບຸເຖິງບົດລົງໂທດ ຕໍ່ຄົນຕ່າງປະເທດ ເຊິ່ງຈະມີບົດລົງໂທດ ສູງສຸດໃຫ້ຈຳຄຸກ 2 ປີ ແລະ ປັບໃໝ. ນັບຕັ້ງແຕ່ ສານທະຫານພະມ້າ ໄດ້ຕັດສິນລົງໄປແລ້ວ ແຕ່ພວກເຮົາ ກໍຕ້ອງລໍຟັງເບິ່ງ.
ທ່ານ ໂຕຣຸ ກຸໂບຕະ (Toru Kubota) ອາຍຸ 26 ປີ ຖືກຈັບ ໃນຂະນະທີ່ລາວເອງ ກຳລັງຖ່າຍວີດີໂອ ການປະທ້ວງ ຕ້ານຣັຖປະຫານໃນ ຢູ່ນະຄອນຢ້າງກຸ້ງ ໃນວັນທີ 30 ເດືອນກໍຣະກະດາ ທີ່ຜ່ານມາ.
ເອອັກຄະຣາຊທູຕຍີ່ປຸ່ນ ປະຈຳປະເທດພະມ້າ ໄດ້ຮັບອະນຸຍາດໃຫ້ເວົ້າກັບ ໂຕຣຸ ກຸໂບຕະ (Toru Kubota) ທາງໂທລະສັບ ໃນວັນທີ 22 ສິງຫາ ແລະ ຂໍພົບກັບນັກຂ່າວຄົນດັ່ງກ່າວ, ແຕ່ທະຫານພະມ້າ ບໍ່ອະນຸຍາດໃຫ້ພົບ ຍ້ອນເຫດຜົນໂຄວິດຣະບາດ. ວິທຍຸ ເອເຊັຽເສຣີ ໄດ້ຕິດຕໍ່ໄປຫາ ສະຖານທູຕຍີ່ປຸ່ນ ຢູ່ພະມ້າ ແຕ່ບໍ່ມີການຕອບຮັບ. ຣັຖບານຍີ່ປຸ່ນ ໄດ້ຮຽກຮ້ອງໃຫ້ ປ່ອຍໂຕນັກຂ່າວຄົນດັ່ງກ່າວ ທັນທີ ທັນໃດ ແລະ ມີການປະທ້ວງ ຄັດຄ້ານການຈຳຄຸກ ນັກຂ່າວຄົນດັ່ງກ່າວ ຢູ່ນະຄອນໂຕກຽວ ປະເທດຍີ່ປຸ່ນ ໃນວັນທີ 31 ກໍຣະກະດາ.
ທ່ານ ໂຕຣຸ ກຸໂບຕະ (Toru Kubota) ເປັນນັກຂ່າວຕ່າງປະເທດ ຄົນທີ 5 ທີ່ຖືກທະຫານພະມ້າ ຈັບຂັງຄຸກ ນັບແຕ່ ມີການຣັຖປະຫານ ໃນວັນທີ 1 ກຸມພາ 2021 ເປັນຕົ້ນມາ ອີງຕາມຂໍ້ມູນຈາກສຳນັກຂ່າວເອພີ.
ນອກຈາກນີ້ ຍັງມີຣາຍງານວ່າ ຜູ້ທີ່ຖືກຂັງຄຸກ ຢູ່ພະມ້າ ເສັຽຊີວິຕຢ່າງໜ້ອຍ 145 ຄົນ ຫຼັງຈາກທີ່ຖືກທະຫານພະມ້າ ສອບສວນ ນັບແຕ່ມີການຣັຖປະຫານ ເປັນຕົ້ນມາ ເປັນເວລາ 19 ເດືອນ ອີງຕາມຂໍ້ມູນ ຈາກວິທະຍຸ ເອເຊັຽເສຣີ ຜແນກພາສາພະມ້າ.
ກຸ່ມສິທທິມະນຸສ ແລະ ຣັຖບານເງົາ (ຣັຖບານຄູ່ຂນານ) ແຫ່ງຊາຕຂອງພະມ້າ ໄດ້ລະບຸວ່າ ມີຜູ້ເຄາະຮ້າຍ ຫຼາຍຄົນເສັຽຊີວິຕ ຢູ່ໃນຄຸກ ລະຫວ່າງ ວັນທີ 1 ກຸມພາ 2021 ຫາ ເດືອນກັນຍາ 2022 ເຊິ່ງເປັນສະມາຊິກ ຂອງພັກສັນນິບາຕ ແຫ່ງຊາດຕ ເພື່ອປະຊາທິປະໄຕ ຂອງພະມ້າ, ແລະ ການຕາຍຂອງພວກເຂົາ ເປັນການກໍ່ອາຊຍາກັມສົງຄາມ.
ສະມາຊິກພັກສັນນິບາຕ ແຫ່ງຊາຕ ເພື່ອປະຊາທິປະໄຕ ຂອງພະມ້າ ຫຼື NLD ທີ່ເສັຽຊີວິຕ ໃນເວລາ ເຈົ້າໜ້າທີ່ທະຫານ ສືບສວນ ສອບສວນ ລວມມີ ມຽວ ມຽວ ກຽວ (Myo Myo Kyaw), ສໍ ມຽວ ວິນ(Saw Myo Win), ຄິນ ມຽວ ວີ (Khin Myo Nwe), ນີອັນ ວິນ (Nyunt Win), ກຽວ ນັງ ວິນ(Kyaw Naing Win).
ປະຊາຊົນຢູ່ເມືອງ ໂມຮຽນ (Mohhyin) ທີ່ຮູ້ຈັກກັບຜູ້ເສັຽຊີວິຕ ບາງຄົນ ໄດ້ກ່າວຕໍ່ວິທຍຸ ເອເຊັຽເສຣີ ວ່າ ສະມາຊິກພັກ ສັນນິບາດຕ ແຫ່ງຊາຕ ເພື່ອປະຊາທິປະໄຕ ໄດ້ຖືກຈັບໃນວັນທີ 24 ສິງຫາ ນັບຕັ້ງແຕ່ນັ້ນເປັນຕົ້ນມາ ກໍໄດ້ຍິນຂ່າວວ່າ ບຸກຄົນດັ່ງກ່າວເສັຽຊີວິຕ ແລະ ຄອບຄົວຂອງລາວ ກໍບໍ່ກ້າທີ່ຈະຈັດງານສົບໃຫ້ລາວ.
ປະຊາຊົນ ທ່ານນີ້ ກ່າວຕື່ມວ່າ ຄອບຄົວຂອງລາວ ບໍ່ຮູ້ເຖິງການຕາຍຂອງລາວ ເພາະວ່າ ເຈົ້າໜ້າທີ່ທະຫານ ບໍ່ໄດ້ມາແຈ້ງໃຫ້ພວກເຂົາຮູ້. ຄອບຄົວຂອງລາວ ຢາກເຮັດບຸນກິນທານຫາລາວ ແຕ່ເຂົາເຈົ້າຢ້ານ.
ໃນເວລາດຽວກັນ, ປະຊາຊົນທ່ານນີ້ ໄດ້ກ່າວຕໍ່ວິທຍຸ ເອເຊັຽເສຣີ ວ່າ ສຳນັກງານເມືອງ ໂມຮຽນ (Mohnyin) ຖືກທະຫານຄວບຄຸມແລ້ວ ແລະ ມື້ຕໍ່ມາຈຶ່ງມີການຢືນຢັນ ການຕາຍຂອງລາວ ແລະ ສະມາຊິກພັກ ອີກຫຼາຍໆຄົນ ກໍເສັຽຊີວິຕຄ້າຍໆ ຄືກັນແບບນີ້.
ເຄືອຂ່າຍດ້ານສິທທິມະນຸສພະມ້າ ຕັ້ງຢູ່ປະເທດອັງກິດ ໄດ້ກ່າວຕໍ່ວິທຍຸ ເອເຊັຽເສຣີ ຜແນກພາສາພະມ້າ ວ່າ ຜູ້ເຄາະຮ້າຍຫຼາຍຄົນ ໄດ້ເສັຽຊີວິຕ ຢູ່ໃນຄຸກ ເປັນສະມາຊິກ ພັກສັນນິບາຕ ແຫ່ງຊາຕ ເພື່ອປະຊາທິປະໄຕ ຫຼື NLD ນັບແຕ່ທະຫານພະມ້າ ເຂົ້າມາຍຶດອຳນາດ.
ທ່ານ ກຽວ ວິນ (Kyaw Win) ຜູ້ອຳນວຍການ ກຸ່ມສິດທທິມະນຸສ ໄດ້ເຊື່ອມໂຍງ ການເສັຽຊີວິຕ ວ່າ ເປັນອາຊຍາກັມ ທີ່ຣັຖບານຟາຊີສ ໄດ້ກໍ່ເອົາໄວ້.
ທ່ານ ກ່າວວ່າ ການຂ້າຄົນຢູ່ໃນຄຸກ ເປັນການຄາຕກັມ ຄົນໃນຮູບແບບນຶ່ງ ກໍຣະນີດັ່ງກ່າວ ຄ້າຍຄືກັນກັບການກໍ່ອາຊກັມ ໂດຍທະຫານນາຊີ ໃນປາງສົງຄາມໂລກຄັ້ງທີ 2.
ທ່ານ ກຽວ ວິນ (Kyaw Win) ກ່າວວ່າ ພວກເຮົາມີ ກົລໄກການ ກວດສອບຢ່າງເປັນອິສຣະ ຕໍ່ກໍຣະນີຂອງພະມ້າ ແລະ ພວກເຮົາ ຈະສນອງຫຼັກຖານ ໃຫ້ແກ່ອົງການດັ່ງກ່າວ ເປັນກໍຣະນີສຶກສາ. ມັນຈະມີການຟ້ອງຮ້ອງກັນ ຢູ່ໃນສານໂລກ ແລະ ຜູ້ທີ່ກະທຳຜິດ ຈະຕ້ອງຮັບຜິດຊອບ.
ໂຄສົກຣັຖບານເງົາ (ຣັຖບານຄູ່ຂນານ) ຂອງພະມ້າ ທ່ານ ກຽວ ຊໍ (Kyaw Zaw) ຍັງອ້າງວ່າ ຣັຖບານ ມີຫຼັກຖານໜັກແໜ້ນ ທີ່ທະຫານພະມ້າ ໄດ້ກໍ່ອາຊຍາກັມສົງຄາມ.
ທ່ານ ກຽວ ຊໍ (Kyaw Zaw) ກ່າວວ່າ “ຜູ້ກະທຳຜິດທັງໝົດ ຈະຕ້ອງຮັບຜິດຊອບ ບໍ່ວ່າຈະເປັນຜູ້ອອກຄຳສັ່ງ ແລະ ຜູ້ກໍ່ອາຊຍາກັມ. ຈະຕ້ອງມີຄວາມຍຸຕິທັມເກີດຂຶ້ນ.”
ວິທຍຸ ເອເຊັຽເສຣີ ບໍ່ສາມາດ ຕິດຕໍ່ຮອງຣັຖມົນຕຣີ ກະຊວງຖແລງຂ່າວ ຂອງທະຫານພະມ້າ ຄື ພົນຕຣີ ຊໍ ມິນ ຕັ໋ນ (Zaw Min Tun) ກ່ຽວກັບການເສັຽຊີວິຕ ຂອງຜູ້ຖືກຂັງຢູ່ໃນຄຸກ.
ໃນເດືອນກໍຣະກະດາ ທີ່ຜ່ານມາ, ນັກຂ່າວວິທຍຸ ເອເຊັຽເສຣີ ໄດ້ຖາມ ພົນຕຣີ ຊໍ ມິນ ຕັ໋ນ (Zaw Min Tun) ກ່ຽວກັບບັນຫາດັ່ງກ່າວ, ແຕ່ ທ່ານ ບໍ່ໄດ້ປະຕິເສດວ່າ ການຕາຍເສັຽຊີວິຕ ຂອງຜູ້ຖືກຂັງ ຢູ່ພາຍໃຕ້ລະບອບຂອງທະຫານ, ແຕ່ ທ່ານ ພຽງອ້າງວ່າ ເຈົ້າໜ້າໄດ້ດຳເນີນການຈັບກຸມ ແລະ ໄດ້ສອບສວນ ຕາມມາຕຖານສາກົນ.
ອີງຕາມສະມາຄົມ ຊ່ວຍເຫຼືອນັກໂທດ ການເມືອງຂອງພະມ້າ, ທະຫານພະມ້າ ໄດ້ສັງຫານພົນລະເຮືອນໄປແລ້ວ 2,000 ປາຍຄົນ ແລະ ໄດ້ຈັບກຸມປະຊາຊົນໄປແລ້ວເກືອບ 16,000 ຄົນ ນັບແຕ່ເກີດການຣັຖປະຫານ. ຜູ້ທີ່ຖືກຈັບກຸມສ່ວນຫຼາຍ ແມ່ນຜູ້ປະທ້ວງ ຕ້ານຣັຖປະຫານ ແຕ່ຍັງມີຜູ້ທີ່ຖືກຂັງຄຸກ ຢູ່ນັ້ນຫຼາຍກວ່າ 12,000 ຄົນ.
ຍານາງ ອອງ ຊານ ຊູຈີ ເປັນຫົວໜ້າ ພັກສັນນິບາຕ ແຫ່ງຊາຕ ເພື່ອປະຊາທິປະໄຕ ຂອງພະມ້າ ທີ່ຖືກທະຫານພະມ້າ ຍຶດອຳນາດ ແລະ ກັກໂຕ, ໄດ້ຖືກຍ້າຍໄປກັກຂັງດ່ຽວ ນັບເດືອນມິຖຸນາ ເປັນຕົ້ນມາ.
ແຫຼ່ງຂ່າວທີ່ໃກ້ຊິດ ເຈົ້າໜ້າທີ່ສານ ນະຄອນຫລວງ ເນປີດໍ ຂອງພະມ້າ ໄດ້ ກ່າວຕໍ່ວິທຍຸ ເອເຊັຽເສຣີ ຜແນກພາສາພະມ້າ ວ່າ “ຄະດີ ຂອງຍານາງ ອອງ ຊານ ຊູຈີ ແລະ ຄົນໃກ້ຊິດ ຂອງຍານາງ ໄດ້ຖືກນຳມາໄຕ່ສວນ ຢູ່ສານພິເສດ ສະເພາະຢູ່ໃນຄຸກເລີຍ.”
ຜູ້ທີ່ເຫັນເຫດການ ຖືກທະຫານພະມ້າ ນຳໂຕມາສືບສວນ ສອບສວນ ຢູ່ໃນສານ ທີ່ມີສ່ວນພົວພັນ ໃນຄະດີນີ້. ຂໍ້ມູນການສືບສວນ ສອບສວນ ຍັງບໍ່ມີການເປີດເຜີຍ ໃນຂະນະທີ່ ທະນາຍຄວາມ ຂອງ ຍານາງ ອອງ ຊານ ຊູຈີ ຍັງບໍ່ໄດ້ຮັບອະນຸຍາດ ໃຫ້ເຜີຍແຜ່ຂໍ້ມູນຕໍ່ສື່ມວນຊົນ.
ທີ່ຜ່ານມາ, ໄດ້ມີການໄຕ່ສວນ ຄະດີດັ່ງກ່າວ ທຸກໆວັນພະຫັດ ໃນສານພິເສດ ຢູ່ ນະຄອນຫລວງ ເນປີດໍ ເຊິ່ງດຳເນີນການ ຢູ່ຄ້າຍທະຫານ ນັບແຕ່ວັນທີ 1 ກຸມພາ 2021 ເປັນຕົ້ນມາ.
ທະຫານພະມ້າ ໂຈມຕີເຂດພົລເຮືອນ ເຮັດໃຫ້ຊາວບ້ານ 4,000 ປາຍຄົນ ຈາກ 15 ບ້ານ ຢູ່ເຂດສະກາງ ພາກຕາເວັນອອກສ່ຽງເໜືອ ຂອງພະມ້າ ຕ້ອງໜີອອກຈາກບ້ານ ເພື່ອຫຼົບໜີຄວາມຮຸນແຮງ. ການໂຈມຕີດັ່ງກ່າວ ເກີດຂຶ້ນເປັນເວລາ 3 ມື້ ຢູ່ເຂດເມືອງສະກາງ ພາກຕາເວັນອອກສ່ຽງເໜືອ ຂອງພະມ້າ ໂດຍມີທະຫານພະມ້າປະມານ 100 ຄົນ ໄດ້ຫັນມາໂຈມຕີ ພົລເຮືອນແທນ ເຊິ່ງຂັດຕໍ່ຫຼັກການ ທາງການທະຫານ. ມີຍົນເຮລິຄອບເຕີຣ໌ 4 ລຳ ໄດ້ໂຈມຕີໝູ່ບ້ານ ເຮັດໃຫ້ມີຜູ້ເສັຽຊີວິຕ 1 ຄົນ ຊື່ວ່າ ຂິນ ເມືອງສານ ແລະ ມີຜູ້ຍິງ ກັບຜູ້ຊາຍໄດ້ຮັບບາດເຈັບ.
ປະຊາຊົນ ໄດ້ກ່າວຕໍ່ວິທຍຸ ເອເຊັຽເສຣີ ຜແນກພາສາພະມ້າ ວ່າ “ມີຜູ້ເສັຽຊີວິຕຄາທີ່ ແລະ ຜູ້ຍິງໄດ້ຮັບບາດເຈັບສາຫັດ ຢູ່ຂັນໄດບ້ານ ແລະ ລາວກໍໄດ້ຮັບການຮັກສາ ຈາກກອງກຳລັງ ສະພາທະຫານພະມ້າ. ປະຊາຊົນພາກັນຫຼົບໜີ ບໍ່ກ້າກັບຄືນບ້ານ ຈົນກະທັ້ງທະຫານພະມ້າ ຈະອອກຈາກບ້ານເຂົາເຈົ້າກ່ອນ. ສະພາບທາງພາກພື້ນດິນ ມີຄວາມອັດຕະຄັດຫຼາຍ.”
ປະຊາຊົນ ກ່າວວ່າ ມີປະຊາຊົນປະມານ 100 ຄົນ ບໍ່ຍອມໜີຈາກບ້ານ ແລະ ເຂົາເຈົ້າຖືກບັງຄັບ ແລະ ພວກທະຫານ ພາກັນມາກວດຂໍ້ ຄວາມໂທລະສັບເຂົາເຈົ້າ ວ່າມີການຕິດຕໍ່ ກັບກຸ່ມກອງກຳລັງ ປົກປ້ອງປະຊາຊົນ ຫຼືບໍ່. ປະຊາຊົນ ກ່າວວ່າ ຍົນເຮລິຄອບເຕີຣ໌ ຂອງທະຫານພະມ້າ ໄດ້ຍິງປືນໃສ່ໝູ່ບ້ານ ໃນວັນທີ 2 ກໍຣະກະດາ ທີ່ຜ່ານມາ.
ຊາວເມືອງດັ່ງກ່າວ ຕ້ອງຕໍ່ຕ້ານກັບທະຫານພະມ້າ ທີ່ຍຶດອຳນາດມາແຕ່ ວັນທີ 1 ກຸມພາ 2021, ໂດຍ ເຂົ້າເຈົ້າມີການຈັດຕັ້ງ ກຸ່ມກອງກຳລັງ ປົກປ້ອງປະຊາຊົນ ຫຼື PDF ຫຼັງຈາກທະຫານ ເຂົ້າມາຍຶດອຳນາດຈາກພັກ ສັນນິບາຕ ແຫ່ງຊາຕ ເພື່ອປະຊາທິປະໄຕ ຂອງພະມ້າ ແລະ ມີການຕັດ ສັນຍາໂທລະສັບ ແລະ ອິນເຕີຣ໌ເນັຕ.
ປະຊາຊົນທີ່ໜີການສູ້ຣົບ ໄດ້ກ່າວວ່າ " ພວກ ເຮົາຕ້ອງໜີປະເລົ້າເຂົ້າ, ສັດລ້ຽງ ບໍ່ວ່າ ຈະເປັນງົວ ແລະ ແບ້. ພວກເຮົາເປັນຫ່ວງສັດລ້ຽງ ຖ້າວ່າ ສັດລ້ຽງຖືກຍິງຕາຍ ພວກເຮົາຈະບໍ່ມີຫຍັງເຫຼືອ ພວກເຮົາບໍ່ມີວຽກເຮັດ ແລະ ຍາກທີ່ຫາລ້ຽງຄອບຄົວ."
ນອກຈາກນີ້ ປະຊາຊົນຊາວເມືອງປາເລ ໄດ້ກ່າວວ່າ ມີປະຊາຊົນ 4 ຄົນເສັຽຊີວິຕ ລວມມີເດັກນ້ອຍແມ່ຍິງນຳ ຍ້ອນການໂຈມຕີ ຂອງທະຫານພະມ້າ ຫຼັງຈາກທີ່ຊາວບ້ານ ໄດ້ພາກັນກັບຄືນມາບ້ານ ໃນຂະນະທີ່ ເຂົາເຈົ້າກຳລັງລ້ຽງງົວ ແລ ເກືອໝູ ຢູ່.
ແຫຼ່ງຂ່າວ ຈາກເມືອງປາເລ ໄດ້ໃຫ້ສັມພາດວ່າ ຜູ້ທີ່ຖືກເຄາະຮ້າຍ ເປັນແມ່ຍິງ ອາຍຸ 45 ປີ ແລະ ເດັກນ້ອຍແມ່ຍິງ ອາຍຸ 15 ປີ, ແມ່ຍິງ ອາຍຸ 54 ປີ, ແລະ ອີກ ນຶ່ງຄົນ ເປັນຜູ້ຊາຍ. ມີທະຫານພະມ້າ ປະມານ 100 ຄົນ ໄດ້ເຂົ້າມາທີ່ໝູ່ບ້ານ ໃນວັນທີ 10 ກໍຣະກະດາ ແລະ ບັງຄັບໃຊ້ຊາວບ້ານ ທັງໝົດ ໜີເຂົ້າໄປໃນປ່າ.