བོད་མི་ལྔ་འཛིན་བཟུང༌།

༄༅༎ཟླ་འདིའི་ཕྱི་ཚེས་༡༠ཉིན་གྱི་སྔ་དྲོ་ཁམས་དཀར་མཇེས་ཁོངས་རྟོགས་སེར་ཤུལ་རྫོང་དུ་བོ་མི་དགེ་འདུན་པ་བློ་བཟང་བསམ་གཏན་ལགས་དང་།  བསོད་ནམས་རྣམ་རྒྱལ་ལགས། ཐུབ་བསྟན་དགེ་ལེགས་ལགས་བཅས་གསུམ་གྱིས་རང་དབང་དང་དམངས་གཙོ་སོགས་ཀྱི་སྐད་འབོད་གནང་ཤིང་།  འཕྲེད་དར་ཐོག་ཏུ་སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་གི་སྐུ་དཔར་གདན་ཞུས་ཀྱིས་རྔམ་སྟོན་ཁྲོམ་སྐོར་གནང་བ་དང་། སྐབས་དེར་མི་སྐྱ་བློ་བཟང་སྐལ་བཟང་ལགས་དང་།  ངག་དབང་རྒྱ་མཚོ་ལགས་གཉིས་ཀྱིས་ས་གནས་ཉེན་རྟོག་པས་དགེ་འདུན་པ་གསུམ་འཛིན་བཟུང་བྱས་པར་བཀག་འགོག་བྱས་སྟབས་རྒྱ་གཞུང་གི་ཉེན་རྟོག་པས་ཁོང་ལྔ་པོ་མཉམ་དུ་འཛིན་བཟུང་བྱས་ཡོད་པའི་སྐོར། གནས་ཚུལ་རྒྱུས་ཡོད་མི་སྣ་ཞིག་གིས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་སུ་གནས་ཚུལ་ངོ་སྤྲོད་གནང་བར་གསན་རོགས་ཞུ༎