དྭང་སློབ་དམག་སྒར་གྱི་མ་ཧ་གུ་རུའི་འབུམ་ཚོགས་ཀྱི་ཚོགས་མགོན་དུ་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་བསྐྱངས་ཡོད་པ།

ལོ་རེར་འཆར་ཅན་ལྟར་རྒྱ་གར་ནང་གི་དྭང་སློབ་དམག་སྒར་གྱིས་གོ་སྒྲིག་གནང་སྟེ། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་བསྟན་སྲིད་སྤྱིའི་བདེ་ཐབས་སུ་མ་ཧ་གུ་རུའི་འབུམ་ཚོགས་གནང་སྲོལ་ཡོད་པ་དེ། འདི་ལོ་སྤྱི་ཟླ་༩པའི་ཚེས་༢༤ཉིན་རྡ་རམ་ས་ལ་ཐེག་ཆེན་ཆོས་གླིང་གཙུག་ལག་ཁང་དུ་དབུ་འཛུགས་གནང་བའི་ཚོགས་མགོན་དུ། བོད་མིའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་དབུ་འཛུགས་བཞུགས་གནང་ཡོད་པར་བརྟེན། ཕྱི་ནང་གི་མི་རིགས་འདྲ་མིན་གྱི་མི་ཚོགས་རྒྱ་ཆེན་པོ་ཞིག་ཀྱང་དད་གུས་རྩེ་གཅིག་གི་སྒོ་ནས་བཅར་འདུག་ཅིང་། གམ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་དགེ་བཤེས་བློ་བཟང་གྲགས་པ་ལགས་ནས། འབུམ་ཚོགས་ཀྱི་ཉིན་དང་པོ་འདིར་དམིགས་བསལ་༸གོང་ས་མཆོག་ཚོགས་མགོན་དུ་ཆིབས་སྒྱུར་གྱིས། རྫས་སྔགས་ཏིང་ངེ་འཛིན་དང་བཅས་པའི་ཚོགས་འཁོར་སྡེ་ཚན་དང་པོ་ལེགས་པར་གྲུབ་ཡོད་པ་འགྲེལ་བརྗོད་གནང་གི་འདུག

བོད་བསྟན་སྲིད་ཀྱི་གནད་དོན་བསྒྲུབ་པར་སྔོན་གྱི་ལས་དང་འཕྲལ་གྱི་རྐྱེན་གཉི་ག་ལ་ཐུག་ཡོད་པ་དང་། ལས་བཟང་པོ་བསགས་པར་ཚོགས་དང་བསོད་ནམས་བསོག་རྒྱུ་གལ་ཆེན་ཡིན་པས། འབུམ་ཚོགས་འདིས་ཞི་བའི་སྒོ་ནས་རང་གཞན་རོགས་གསུམ་བདེ་སྐྱིད་ཕུན་ཚོགས་དང་། རང་དབང་དགའ་བདེའི་དཔལ་ལ་རོལ་རྒྱུར་ཚོགས་དང་བསོད་ནམས་ཀྱི་རྒྱབ་རྟེན་ཡག་པོ་ཡོང་ཆེད་འབུམ་ཚོགས་གནང་གི་འགྲེལ་བརྗོད་གནང་གི་འདུག གཞན་ཡང་གུ་རུ་ཨོ་རྒྱན་པདྨ་འབྱུང་གནས་ནི་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐབས་ནས་བོད་ཁམས་སྐྱོང་བར་ཞལ་གྱིས་བཞེས་ཡོད་པས། ང་ཚོས་བདེན་པ་བདར་ན་དམིགས་བསལ་གྱི་དགོས་ཆོས་ཁྱད་པར་ཅན་ཡོད་པ་དང་། རང་ཅག་བོད་མིའི་མེ་ཏོག་ཕོག་པའི་ལྷ་སྐལ་འཕགས་པ་ཐུགས་རྗེ་ཆེན་པོ་དང་། ཐུགས་བསྐྱེད་དམ་བཅའ་དུས་སུ་སྨིན་པའི་གུ་རུ་རིན་པོ་ཆེར་གསོལ་བ་བཏབ་ན། བསམ་དོན་འགྲུབ་པ་དང་འགལ་རྐྱེན་བར་ཆད་སེལ་བར་ཕན་ཐོགས་ཡོད་པ་འགྲེལ་བརྗོད་གནང་གི་འདུག

མ་ཧ་གུ་རུའི་འབུམ་ཚོགས་ཉི་མ་ལྔ་རིང་གནང་གི་ཡོད་པ་དང་ཆབས་ཅིག་ཏུ། དཔལ་ལྡན་ལྷ་མོའི་གཟབ་གསོལ་དང་མི་མང་ལ་ལོ་རེའི་དམིགས་བསལ་མཇལ་ཁ་སོགས་ཀྱང་གནང་གི་ཡོད་པ་རེད།