བོད་ཡིག་གསབ་སྤྱོང་འཛིན་གྲྭ་སྤེལ་མཁན་གྱི་དགོན་པ་དག་ལ་ཞིབ་བཤེར་ཐག་གཅོད་ནན་མོ་བྱེད་རྒྱུ།

རྒྱ་ནག་ནག་གིས་ནང་ཆེན་ཕྱོགས་སུ་བོད་ཡིག་གསབ་སྤྱོང་འཛིན་གྲྭ་སྤེལ་མཁན་གྱི་དགོན་པ་དག་ལ་ཞིབ་བཤེར་ཐག་གཅོད་ནན་མོ་བྱེད་རྒྱུ་བསྒྲགས་འདུག
བོད་ཁམས་ནང་ཆེན་རྫོང་གི་ཤང་དང་གྲོང་སྡེ་བཅས་ཀྱི་ནང་ཚོགས་འདུ་སྐོང་ཏེ་བོད་ཡིག་གསབ་སྤྱོང་འཛིན་གྲྭ་སྤེལ་མཁན་གྱི་དགོན་པ་དག་ལ་ཞིབ་བཤེར་ཐག་གཅོད་ནན་མོ་བྱེད་རྒྱུ་དང་། ལྷག་པར་དུ་རྩ་འཛུགས་མི་སྣ་དགོན་པའི་ཡིག་ཐོ་ལས་ཕུད་རྒྱུ་ཡིན་པ་སོགས་ཉེས་བརྡ་བཏང་འདུག
དེ་ཡང་སྤྱི་ལོ་༢༠༡༨་ལོའི་ཟླ་༡༢་ཀྱི་ཟླ་མཇུག་ཙམ་ཏུ་ནང་ཆེན་རྫོང་གི་ཤང་དང་གྲོང་སྡེ་བཅས་ཀྱི་ནང་ས་གནས་ཀྱི་ལས་བྱེད་པ་ཡོང་སྟེ་སྐྱ་སེར་ཕོ་མོ་ཡོངས་རྫོགས་འདུ་སྐོང་གིས་སློབ་གྲྭ་ཆུང་འབྲིང་གི་དགུན་གནང་ལ་ཉེ་བ་དང་བསྟུན་ནས། ས་ཆ་སོ་སོའི་དགོན་པ་ཁག་གིས་བོད་ཡིག་གཟབ་སྤྱོང་འཛིན་གྲྭ་ཚོགས་མི་ཆོག་པ་དང་། སློབ་ཕྲུག་དགོན་པའི་ནང་བསྡད་མི་ཆོག་པའི་བཀའ་རྒྱ་བཏང་ཡོད་པ་རྒྱུས་མངའ་ཡོད་པའི་ཕྱིར་སྡོད་བོད་མི་ཞིག་གིས་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ལ་འགྲེལ་བརྗོད་གནང་ཡོད་པ་རེད།
༢༠༡༨ ཕྱི་ཟླ་ ༡༢ ཚེས་ ༢༥ ཉིན་ནང་ཆེན་རྫོང་འཐབ་ཕྱོགས་གཅིག་འགྱུར་ཁང་དང་། ནང་ཆེན་རྫོང་མི་རིགས་ཆོས་ལུགས་ཁང་ཟེར་བས་དགོན་པས་ཁྲིམས་འགལ་གྱི་སྒོ་ནས་གསབ་སྦྱོང་འཛིན་གྲྭ་དང་བོད་ཡིག་འཛིན་གྲྭའི་མིང་ཐོག་ནས་སློབ་གྲྭ་ཆུང་འབྲིང་གི་སློབ་འདུས་ཏེ་སློབ་གྲྭ་འཚོགས་མི་ཆོག་པའི་མྱུར་ཚབས་བརྡ་ཐོ་ཟེར་བ་ཞིག་བཏང་ཞིང་། ཨ་རིའི་ནང་རྟེན་གཞི་བྱེད་པའི་འགྲོ་བ་མིའི་ཐོབ་ཐང་ལྟ་རྟོག་ཚོགས་པས་རྒྱ་ནག་གཞུང་གི་བྱ་སྤྱོད་འདི་ནི་བོད་མིའི་སྐད་ཡིག་རིག་གཞུང་ཉམས་ཉེས་གཏོང་ཐབས་ཤིག་ཡིན་པའི་སྐྱོན་བརྗོད་གནང་ཡོད་པ་རེད།  
ཡང་གོང་ཞུས་མིང་འབོད་གནང་འདོད་མེད་པའི་ཕྱིར་སྡོད་བོད་མི་ཁོང་གིས་གསུངས་ན། མི་དམངས་འདུ་བསྐོངས་བྱས་པའི་ཚོགས་འདུ་དེའི་སྐབས་ཡིག་ཆ་དེའི་ནང་དོན་མང་ཚོགས་ལ་ངོ་སྤྲོད་བྱས་པ་དང་བསྟུན་ཡིག་ཆའི་འདྲ་བཤུས་རེ་མང་ཚོགས་ལ་བཀྲམས་ནས་ངེས་པར་དུ་བལྟ་ཀློག་དགོས་པའི་ལམ་སྟོན་བྱས་ཡོད་འདུག
ནང་ཆེན་འཐབ་ཕྱོགས་གཅིག་གྱུར་ཁང་གིས་སྤེལ་བའི་ཡིག་ཆ་དེའི་ནང་དགོན་སྡེ་ཁག་གིས་བོད་ཡིག་གཟབ་སྤྱོང་སྤྲད་པ་ལ་སོགས་པའི་གནས་ཚུལ་མི་ཡོང་ཆེད་དགོན་པ་རང་ཉིད་ནས་འགན་འཁུར་དགོས་པ་ནན་བརྗོད་བྱས་ཡོད་པར་མ་ཟད། གལ་སྲིད་གནས་ཚུལ་འདི་རིགས་འབྱུང་ཚེ། གནད་དོན་འབྱུང་ཡུལ་གྱི་དགོན་པ་དེ་དག་ནག་ཐིག་ཕོག་པའི་དགོན་པའི་གྲལ་དུ་འཇུག་ནས་ཐག་གཅོད་ནན་མོ་བྱ་རྒྱུ་དང་། ལྷག་པར་གྱོད་དོན་ཕོག་པའི་གྲྭ་པ་སྒེར་དེ་དགོན་པའི་སྒྲིག་འཛུགས་ཀྱི་མིང་ཐོག་ནས་ཕུད་རྒྱུ་དང་། ཆོས་ལུགས་མི་སྣའི་དཔང་ཡིག་ཡར་བསྡུ་བྱེད་རྒྱུ་ཡིན་པ་སོགས་ཉེན་བརྡ་བཏང་ཡོད་པ་རེད།
ཡང་བཀའ་རྒྱ་དེའི་ནང་། དགོན་པས་ལས་དོན་གཙོ་བོ། ཏང་དང་སྲིད་གཞུང་གིས་སློབ་གསོའི་ལས་དོན་ལམ་སྟོན་ཁག་གཙོ་བཟུང་བྱ་དགོས་པ་བཀོད་འདུག
བོད་ཀྱི་ས་ཁུལ་མང་པོའི་ནང་བོད་ཡིག་སློབ་གསོའི་ཐད་དམ་དྲག་དང་ལྷག་པར་དུ་སློབ་གྲྭའི་གུང་གསེང་སྐབས་སློབ་ཕྲུག་ཚོ་ཆོས་ལུགས་ཀྱི་བྱེད་སྒོའི་ནང་ཞུགས་མི་ཆོག་པའི་བཀའ་རྒྱ་བཏང་ཡོད་ཅིང་། དེ་བཞིན་ཡུལ་ཤུལ་ཁུལ་ནང་དེ་སྔ་ཡིན་ན་ཁུལ་དེར་ལོ་ལྟར་འཚོགས་པའི་ས་སྐྱའི་སྨོན་ལམ་སྐབས་སློབ་གྲྭའི་གུང་གསེང་བཞག་སྲོལ་ཡོད་ན་ཡང་། ༢༠༡༨ ལོའི་ས་སྐྱའི་སྨོན་ལམ་སྐབས་སློབ་གསེང་བཞག་མེད་ལ། ད་དུང་ཡུལ་ཤུལ་གྱི་དགོན་པ་ཁག་ནས་སློབ་གྲྭའི་གུང་གསེང་སྐབས་བོད་ཡིག་བསྐྱར་སྦྱོང་གི་འཛིན་གྲྭ་འཚོགས་སྲོལ་ཡོད་པ་དེ་ཡང་ས་གནས་ཀྱི་འཐབ་ཕྱོགས་གཅིག་འགྱུར་ཁང་གི་ལས་བྱེད་པ་སོགས་དགོན་པར་དངོས་སུ་ཡོང་ནས་བོད་ཡིག་འཛིན་གྲྭ་འཚོགས་མི་ཆོག་པ་བཟོས་འདུག