ཨ་རིའི་བོད་མི་མང་པོ་ཨ་རིའི་གྲོས་ཚོགས་ནང་དངོས་སུ་བཅར་ནས་བོད་དོན་ཞུ་གཏུག་གནང་བཞིན་འདུག

དེ་ཡང་ཨ་མི་རི་ཀའི་ས་གནས་ཁག་གང་སའི་བོད་མི་༡༥༠ལྷག་ཨ་རིའི་རྒྱལ་སར་འཛོམས་ནས། རྒྱལ་སྤྱིའི་བོད་དོན་ལས་འགུལ་ཁང་གི་གོ་སྒྲིག་འོག་འདི་ཚེས་༢༧དང་༢༨ཉིན་གྲངས་གཉིས་རིང་། ཨ་མི་རི་ཀའི་གྲོས་ཚོགས་ནང་དངོས་སུ་བཅར་ནས་ཨ་རིའི་གྲོས་ཚོགས་ཀྱི་སོ་སོའི་མངའ་སྡེའི་འཐུས་མི་དང་ཁོང་ཚོའི་ལས་བྱེད་རྣམ་པར་དངོས་སུ་ཐུག་འཕྲད་ཀྱིས་༢༠༢༣ལོའི་བོད་དོན་ཞུ་གཏུག་གི་ལས་འགུལ་སྤེལ་བཞིན་པ་དང་། རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་འགན་འཛིན་གཞོན་པ་བསྟན་ཆོས་རྒྱ་མཚོ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུང་ན། ད་ལོ་བོད་དོན་ཞུ་གཏུག་སྐབས་གཙོ་བོ་ཉེ་བའི་ཆར་ཨ་རིའི་གྲོས་ཚོགས་ནས་བོད་ཀྱི་ལོ་རྒྱུས་གནས་བབས་དང་འབྲེལ་ནས་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་གཏན་འབེབས་ཡོང་ཐབས་སུ་རྒྱབ་སྐྱོར་འཚོལ་ཐབས་སུ་བོད་དོན་ཞུ་སྐུལ་གནང་གི་ཡོད་པ་དང་། དེ་བརྒྱུད་ནས་ཨ་རིའི་གྲོས་ཚོགས་གོང་འོག་ནང་བོད་དོན་རྒྱབ་སྐྱོར་སྔར་ལྷག་ཐོབ་ཐབས་དང་། འཐུས་མི་གསར་བ་ཚོར་བོད་དོན་གོ་རྟོགས་སྤེལ་ཐབས་གནང་བཞིན་པ་གསུང་བྱུང་།
ཐེངས་འདིའི་ཞུ་གཏུག་ལས་འགུལ་ནང་ཨ་མི་རི་ཀའི་(Massachusetts)་མངའ་སྡེ་ནས་ནས་ཕེབས་པའི་བོད་མི་དང་བོད་དོན་རྒྱབ་སྐྱོར་བ་ཚོ། མངའ་སྡེ་དེ་ནས་ཡིན་པའི་གྲོས་ཚོགས་འཐུས་མི་(Jim McGovern)་ལགས་ཀྱི་ལས་ཁུངས་སུ་དངོས་སུ་བཅར་ནས་བོད་དོན་ཞུ་གཏུག་གནང་སྐབས། གྲོས་ཚོགས་འཐུས་མི་(Jim McGovern)་ལགས་ཀྱིས། བོད་མི་དང་བོད་དོན་རྒྱབ་སྐྱོར་བ་ཚོས་སྤེལ་བཞིན་པའི་བོད་དོན་ཞུ་གཏུག་ལས་འགུལ་འདི་བཞིན་གལ་ཆེན་པོ་ཡིན་པ་དང་། ད་རེས་ཆབ་སྲིད་ཚོགས་པ་གཉིས་ཐུན་མོང་གིས་བཏོན་པའི་བོད་རྒྱའི་དཀའ་རྙོག་སེལ་ཐབས་ཀྱི་རྒྱབ་སྐྱོར་ཁྲིམས་འཆར་དེས། མ་འོངས་བོད་རྒྱའི་དཀའ་རྙོག་དེ་བཞིན་གྲོས་མོལ་གྱི་ལམ་ནས་སེལ་ཐབས་སུ་ནུས་བ་ཐོན་ངེས་ཡིན་པ་དང་། དེ་བཞིན་རྒྱ་ནག་གཞུང་ལ་ཡང་བརྡ་ལན་ཤུགས་ཆེན་པོ་ཞིག་གཏོང་ངེས་ཡིན་པ་གསུང་སོང་། ད་རེས་ཞུ་གཏུག་ལས་འགུལ་ནང་མཉམ་ཞུགས་གནང་ཡོད་པ་བོད་ཀྱི་ཆབ་སྲིད་བཙོན་ཟུར་ངག་དབང་གསང་སྒྲོལ་ལགས་ཀྱིས། ཁོང་གི་མཉམ་མྱོང་ལ་གཞིགས་ན། བོད་མི་ཚོས་རང་དབང་ལུང་བའི་ནང་དང་། ལྷག་དོན་རྒྱལ་སྤྱིའི་སྤྱི་ཚོགས་དང་ཨ་མི་རི་ཀའི་གཞུང་ལ་བོད་དོན་ཞུ་གཏུག་བྱས་དང་བྱེད་བཞིན་པ་དེ་བཞིན་གལ་གནད་ཆེན་པོ་ཡིན་པ་དང་། དེས་ནུས་བ་ཡང་ཐོན་བཞིན་པ་ངོ་སྤྲོད་གནང་བྱུང་།
ད་ཐེངས་ཀྱི་བོད་དོན་ཞུ་གཏུག་དང་འབྲེལ། ཚེས་༢༨ཉིན་རྒྱ་ནག་གཞུང་གིས་བོད་དང་བོད་ཀྱི་རིག་གཞུང་རྩ་མེད་གཏོང་ཐབས་བྱེད་བཞིན་པ་དང་། བོད་མི་རྒྱ་མི་རིགས་སུ་བསྒྱུར་ཐབས་བྱེད་བཞིན་པ་སོགས་རྒྱ་ནག་གཞུང་གི་སྲིད་ཇུས་བྱེད་བབ་ཐད། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ལྷན་ཚོགས་ཀྱི་ངོས་ནས་བོད་དོན་ཉན་ཞིབ་ཞིག་ཀྱང་འཚོགས་རྒྱུ་ཡིན་པའི་ཐོག དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དྲྭ་ལམ་བརྒྱུད་མཉམ་ཞུགས་གནང་རྒྱུ་ཡིན་འདུག

བོད་དོན་ཞུ་གཏུག་ལས་འགུལ་འདི་བཞིན་བོད་མི་ཨ་མི་རི་ཀའི་མི་སེར་ཡིན་པ་ཚོས། མང་གཙོའི་ལམ་ལུགས་ཁྲོད་སོ་སོའི་རང་དབང་དང་ཐོབ་ཐང་ལོངས་སུ་སྤྱད་ནས་སོ་སོ་གནས་ཡུལ་ཨ་རིའི་མངའ་སྡེ་ཁག་གི་གྲོས་ཚོགས་འཐུས་མི་ཚོར་བོད་དོན་ཞུ་གཏུག་གནང་རྒྱུ་ཕྱི་ལོ་༢༠༠༩ནས་དབུ་འཛུགས་གནང་པ་ཞིག་ཡིན་པ་དང་། ད་རེས་ཞུ་གཏུག་སྟེང་ཨ་མི་རི་ཀའི་ས་གནས་ཁག་ཉི་ཤུ་ལྷག་གི་བོད་མི་དང་བོད་དོན་རྒྱབ་སྐྱོར་བ་༡༥༠ལྷག་རྒྱལ་ས་ཝ་ཤིན་ཀྲོན་དུ་འཛོམས་ནས་གྲོས་ཚོགས་འཐུས་མི་དང་ལས་བྱེད་བརྒྱ་ལྷག་ལ་དངོས་སུ་ཐུག་འཕྲད་བྱས་ནས་བོད་དོན་ཞུ་གཏུག་གནང་གི་ཡོད་པ་རེད།

གསར་འགོད་པ། བསྟན་འཛིན་བདེ་སྐྱིད། ཀླུ་འབུམ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།