བལ་ཡུལ་ནང་གནས་སྡོད་རྒྱ་མི་ཁག་གཅིག་དང་ཉེན་རྟོག་པའི་དབར་འཁྲུག་འཛིང་ཤོར་ནས་མི་དྲུག་ལ་རྨས་སྐྱོན་ཕོག་འདུག
ཕྱི་ཟླ་ ༥ ་ཚེས་ ༨་གཟའ་པ་སངས་ཉིན། བལ་ཡུལ་གྱི་རྒྱལ་ས་ཀཐ་མཱན་ཊོའུ་ལ་ཡོད་པའི་བལ་ཡུལ་གྱི་སྲིད་བློན་བཞུགས་གནས་དང་སྲིད་གཞུང་ལས་ཁུངས་མདུན། བལ་ཡུལ་ནང་གནས་སྡོད་རྒྱ་ནག་གི་མི་སེར་ཚོགས་ཁག་ཞིག་གིས་ཁོང་ཚོི་རྒྱ་ནག་ཏུ་ཕྱིར་ལོག་བྱེད་དུ་འཇུག་དགོས་པའི་དགོས་འདུན་བཏོན་ཆེད་ངོ་རྒོལ་གྱི་ལས་འགུལ་སྤེལ་ཡོད་པ་དང་། བལ་ཡུལ་གྱི་ཉེན་རྟོག་པས་ངོ་རྒོལ་གྱི་ལས་འགུལ་འདི་ནི་རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་ནད་ཡམས་ཁྱབ་གདལ་སྔོན་འགོག་གི་ཁྱིམ་སྡོད་བཀའ་རྒྱ་དང་འགལ་བ་མ་ཟད། སྐབས་ཐོག་ཁྲིམས་སྒྲིག་དང་འགལ་བ་ཞིག་ཡིན་པར་བརྟེན་རྒྱ་མི་དེ་དག་ས་གནས་དེ་ནས་ཕྱིར་འབུད་བྱེད་ཐབས་བྱས་སྐབས་ངོ་རྒོལ་བ་དང་ཉེན་རྟོག་པའི་དབར་ལག་འཛིང་བྱུང་ནས། རྒྱ་མིའི་མི་སེར་བཞི་དང་བལ་ཡུལ་གྱི་སྲིད་གཞུང་ལས་ཁུངས་ཁུལ་གྱི་ཉེན་རྟོག་པའི་སྤྱི་ཁྱབ་པ་གཞོན་པ་ཧ་རི་སྦསི་ནེཏ་སོགས་མི་དྲུག་ལ་རྨས་སྐྱོན་ཕོག་འདུག་ལ་བརྙན་ནང་རྒྱ་མིའི་མི་སེར་དེ་དག་གིས་བལ་ཡུལ་གྱི་ཉེན་རྟོག་པར་ཕར་རྒོལ་བྱས་པ་གསལ་པོར་མཐོང་རྒྱུ་འདུག
རྗེས་སུ་བལ་ཡུལ་ཉེན་རྟོག་པས་རྒྱ་མིའི་མི་སེར་བཞི་བཅུ་ལྷག་འཛིན་བཟུང་གིས་ཀཐ་མཱན་ཊོའུ་(Exhibition)་ལམ་དུ་ཡོད་པའི་ཉེན་རྟོག་པའི་སྐྱིད་སྡུག་ཚོགས་ཁང་དུ་ཁྲིད་འདུག
བལ་ཡུལ་ནང་ལས་རིགས་འདྲ་མིན་ཐོག་གནས་སྡོད་བྱེད་མཁན་རྒྱ་ནག་གི་མི་སེར་ཧ་ཅང་གི་མང་པོ་ཡོད་པ་དང་། དེང་སྐབས་ཏོག་དབྱིབས་ནད་ཡམས་སྔོན་འགོག་ཆེད་བལ་ཡུལ་རྒྱལ་ཡོངས་སུ་འགྲོ་བསྐྱོད་བཀག་སྡོམ་དང་ཁྱིམ་སྡོད་བཀའ་རྒྱ་བཏང་ཡོད་པར་བརྟེན། ཉེ་སྔོན་སྤྱི་ཟླ་༣་པའི་ཚེས་༣༠་ཉིན། བལ་ཡུལ་ནང་ཚོང་ལས་དང་ཡུལ་སྐོར་སོགས་ཀྱི་ཆེད་ཡོད་པའི་རྒྱ་རིགས་གཙོས་རྒྱ་ནག་གི་མི་སེར་མང་པོ་ཞིག བལ་ཡུལ་གྱི་རྒྱལ་སའི་རྒྱ་ནག་གཞུང་ཚབ་ཁང་གི་མདུན་དུ་འཛོམས་ནས་ང་ཚོ་ཕ་ཡུལ་དུ་ལོག་དགོས་ཞེས་རྔམ་སྟོན་སྐད་འབོད་བྱས་ཡོད་པ་རེད།
ཕྱི་ལོ་༢༠༠༨་དང་། ༢༠༠༩ དེ་བཞིན་༢༠༡༡་སོགས་སུ་བལ་ཡུལ་ནང་གནས་སྡོད་བོད་མི་ཚོས་རྒྱ་ནག་གཞུང་ལ་ངོ་རྒོལ་གྱི་ལས་འགུལ་སྤེལ་སྐབས། བལ་ཡུལ་གྱི་ཉེན་རྟོག་པས་བོད་མི་སྐྱ་སེར་ཕོ་མོ་དབྱེ་བ་མེད་པར་གཅར་རྡུང་བཏང་པ་དང་། འཛིན་བཟུང་བཀག་ཉར་བྱས་ཡོད་པ་རེད། ཡིན་ཡང་བོད་མི་དེ་དག་གི་ངོ་རྒོལ་ནི་རྒྱ་ནག་གཞུང་གིས་བོད་ནང་བཟུང་བའི་སྡུག་རྩུབ་ཅན་གྱི་སྲིད་ཇུས་ལ་ངོ་རྒོལ་བྱས་བ་ལས་བལ་ཡུལ་གཞུང་ལ་དམིགས་པ་ཞིག་མིན་པ་རེད།
