རྒྱ་ནག་དམར་ཤོག་གཞུང་འདི་བཙུགས་ནས་ལོ་ངོ་༧༥དུས་ཚོད་ནང་གི་བོད་དང་བོད་མིའི་གནས་སྟངས། མའོ་ཙེ་ཏུང་གི་དུས་སྐབས།

༡༩༤༩ལོའི་ཟླ་༡༠ཚེས་༡ཉིན་རྒྱ་ནག་དམར་ཤོག་གཞུང་འདི་གསར་འཛུགས་བྱས་པའི་གསལ་བསྒྲགས་སྐབས་དེ་དུས་ཀྱི་དབང་འཛིན་པ་མའོ་ཙེ་ཏུང་གིས་བྱས་ཡོད།   དུས་དེ་ནས་བཟུང་གནའ་བོའི་རྒྱ་ནག་གི་ཡུལ་གྲུ་འདིའི་ལོ་རྒྱུས་གསར་པ་ཞིག་འགོ་བཙུགས་ཡོད་ལ།   དམར་ཤོག་གིས་གཞུང་འཛིན་བྱས་པའི་བོད་ཀྱི་ཁྱིམ་མཚེས་རྒྱལ་ཁབ་གསར་པ་རྒྱ་ནག་མི་དམངས་སྤྱི་མཐུན་རྒྱལ་ཁབ་འདིས་བོད་གངས་ཅན་ལྗོངས་འདིར་དྲག་པོའི་བཙན་འཛུལ་བྱས་ཏེ་བོད་འདི་དབང་བསྒྱུར་བྱས་ཡོད། 

བཞུགས་སྒར་རྡ་རམ་ས་ལར་ཡོད་པའི་བོད་ཀྱི་སྲིད་ཇུས་ཉམས་ཞིབ་ཁང་གི་དབུ་འཛིན་ཟླ་བ་ཚེ་རིང་ལགས་ཀྱིས་རྒྱ་ནག་དམར་ཤོག་ཚོགས་པས་ཐོག་མ་ནས་བོད་ལ་དབང་བསྒྱུར་བྱ་རྒྱུའི་དམིགས་ཡུལ་བཅངས་ནས་ཡོད་པ་དང་།  དམར་ཤོག་གཞུང་འདི་གསར་བཙུགས་བྱས་པའི་རྗེས་དབང་འཛིན་པ་མའོ་ནས་བོད་ལ་དཔུང་འཇུག་བྱ་རྒྱུའི་བཀའ་བཏང་སྐོར་གསུངས་བྱུང་།   

མའོ་ཙེ་ཏུང་ཨུ་རུ་སུར་སྐྱོད་པའི་སྐབས་ཤིག་འཁེལ་ཡོད་པ་དང་།  དེ་དུས་སི་ཌ་ལིན་དང་ཧེ་རོ་ཆའོ་ཧྥུ་ཡིས་བོད་ལ་བཅིངས་འགྲོལ་གཏོང་དགོས་ཞེས་མའོ་ཙེ་ཏུང་ལ་བཤད་སྐོར་བརྗོད་ཀྱི་ཡོད།  དེ་དུས་རྒྱ་དམག་ཆབ་མདོ་ཁུལ་དུ་སླེབས་མེད།  དར་རྩེ་མདོ་དང་ཟི་ལིང་ལ་འབྱོར་ཡོད།  མའོ་ཡིས་ཏར་འཕྲིན་བཏང་ནས་ལྷོ་ནུབ་དམག་ཁུལ་ཁང་ལ་ཏེང་ཞའོ་ཕིང་གི་འགོ་ཁྲིད་ནས་ཡོད་པ་དེར་བོད་ལ་དཔུང་འཇུག་བྱ་རྒྱུའི་ལས་འགན་སྤྲད་པ་དང་།  དེ་ནས་དམག་ཤོག་བཅོ་བརྒྱད་འདི་དར་རྩེ་མདོ་ནས་ཆབ་མདོར་དཔུང་འཇུག་བྱས་ཏེ་དམག་འཁྲུག་བྱུང་ཡོད།  

སུད་སིའི་བོད་ཀྱི་སྐུ་ཚབ་དོན་གཅོད་ཁང་གི་ཡོ་རོབ་ཀྱི་རྒྱ་རིགས་འབྲེལ་མཐུད་པ་སངས་རྒྱས་སྐྱབས་ལགས་ཀྱིས་རྒྱ་ནག་དམར་ཤོག་གཞུང་འདི་གསར་བཙུགས་བྱས་པའི་རྗེས་ལམ་སེང་བོད་ཀྱི་མདོ་སྟོད་སྨད་ལ་བཅིངས་འགྲོལ་དམག་གིས་དཔུང་འཇུག་བྱེད་འགོ་བཙུགས་པ་གསུངས་ཀྱི་འདུག  

མའོ་ཡི་སྐབས་ཀྱི་རྒྱ་ནག་དམར་ཤོག་གཞུང་གི་སྲིད་ཇུས་དང་པོ་འདི་ནི་གང་འདྲ་བྱས་ནས་མགོ་སྐོར་བཏང་སྟེ་བོད་ཀྱི་ས་ཆ་ཟིན་རྒྱུ་འདི་ཆགས་ཡོད།   རྒྱལ་སྤྱིའི་ཐོག་གང་འདྲ་བྱས་ནས་མགོ་སྐོར་གཏོང་རྒྱུ་དང་།  དེ་བཞིན་དང་པོ་མདོ་སྟོད་སྨད་ཀྱི་བོད་པར་མགོ་སྐོར་བཏང་སྟེ་བཅིངས་འགྲོལ་གཏོང་རྒྱུ་ཡིན་ཟེར་བ་དང་།   གོ་མིང་ཏང་ཚོགས་པའི་སྟོབས་ཤུགས་རྩ་མེད་གཏོང་རྒྱུ་ཡིན་ཟེར་བ།  ཇག་པ་རྩ་མེད་བཟོ་རྒྱུ་ཡིན་ཟེར་བ་སོགས་ཀྱི་ཐོག་ནས་མགོ་སྐོར་བཏང་སྟེ་ས་ཆ་གང་ཙམ་ཞིག་ཟིན་པ་དང་།   དེ་ནས་གོམ་པ་གཉིས་པ་འདི་དབུས་གཙང་ཕྱོགས་ལ་སྐྱོད་རྒྱུ་འདི་ཡིན་ཞིང་།   དེ་ཡང་བོད་གཞུང་གི་ཁྱབ་ཁོངས་སུ་བཙན་འཛུལ་བྱ་རྒྱུའི་གྲ་སྒྲིག་བྱས་ཏེ་དེ་ནས་བོད་ཀྱི་ས་ཆ་ཡོངས་སུ་གང་འདྲ་བྱས་ཏེ་རྒྱ་ནག་དམར་ཤོག་གི་བཙན་བཟུང་བྱེད་དགོས་ཀྱི་ཡོད་པ་འདི་མའོ་ཡི་སྐབས་ཀྱི་སྲིད་ཇུས་དང་པོ་འདི་ཆགས་ཡོད།  

རྒྱ་ནག་དམར་ཤོག་གཞུང་གི་མི་རབས་དང་པོའི་ཆེས་མཐོའི་དབང་འཛིན་པ་མའོ་ཙེ་ཏུང་གིས་བོད་ལ་དྲག་པོའི་བཙན་འཛུལ་བྱས་པའི་རྗེས་༡༩༥༡ལོའི་ཟླ་༥ཚེས་༢༣ཉིན་དོན་ཚན་བཅུ་བདུན་ཟེར་བའི་ཆིངས་ཡིག་འདི་བཙན་དབང་འོག་འཇོག་དགོས་བྱུང་ཡོད།   

མའོ་ཡི་སྐབས་སུ་མི་ཚེའི་རིང་དམག་འཁྲུག་མཁོ་ན་རྒྱབ་ནས་ཡོད་པས།  དམག་འཁྲུག་རྒྱག་མཁན་མི་འདི་ཡི་དངོས་གནས་ཁྲིམས་དང་སྒྲིག་གཞི།  ལམ།  ལུགས་སྲོལ་སོགས་ལ་བརྩི་བཀུར་གང་ཡང་མེད།   དེ་བཞིན་ཁོང་ཚོས་དོན་ཚན་བཅུ་བདུན་གྱི་ཆིངས་ཡིག་བཞག་པའི་དམིགས་ཡུལ་འདི་ནི་གནས་སྐབས་ལ་དམིགས་ཏེ་རྒྱལ་སྤྱིའི་ནང་སྐྱོད་ཐུབ་པ་དང་།   བོད་ནང་དམག་མི་གཏོང་ཐུབ་པ་སོགས་ལ་དམིགས་པ་ཞིག་ཡིན་པ་ལས།  དངོས་གནས་ཁྲིམས་ལ་བརྩི་སྲུང་བྱས་ཏེ་བོད་ལ་རོགས་སྐྱོར་བྱེད་དགོས་བསམ་པ་མི་འདུག  ཁོང་ཚོས་མགོ་ནས་མཇུག་བར་དམིགས་ས་འདི་བོད་ལ་བཙན་འཛུལ་བྱས་ཏེ་བཟུང་པ་དང་།  དེ་རྗེས་སོ་སོའི་གཞུང་གསར་འཛུགས་བྱ་རྒྱུ་དེ་རང་ལ་དམིགས་པ་ཞིག་རེད།  དེ་བཞིན་ཁོང་ཚོས་ལོ་བདུན་བརྒྱད་ནང་མི་དམངས་ལ་སྐུལ་སློང་བྱས་པ་སོགས་ལས་དོན་འདྲ་མིན་སྤེལ་ནས་ལམ་སེང་དམངས་གཙོའི་བསྒྱུར་བཀོད་ཀྱི་མིང་ཐོག་ནས་བོད་ཀྱི་སྔོན་མའི་ལུགས་སྲོལ་དང་སྲིད་དབང་།  གཞུང་།  སྐུ་དྲག  གྲྭ་པ།  བླ་མ་ཚང་མ་བཙོན་ཁང་ལ་བཅུག་ཡོད། 

རྒྱ་ནག་གི་དབང་འཛིན་པ་མའོ་ཡི་སྐབས་ནས་བཟུང་དམིགས་ཡུལ་ཆེན་པོ་གཅིག་ནི་བོད་མི་རིགས་རྩ་མེད་དང་རྒྱ་བསྒྱུར་གྱི་སྲིད་ཇུས་འདི་ཡིན་དུས་བོད་ཀྱི་མདོ་སྟོད་སྨད་ནས་འགོ་བཙུགས་ཏེ་རྒྱ་ནག་ནས་རྒྱ་མི་རིགས་གནས་སྤོས་འགོ་བཙུགས་བྱས་ཡོད་འདུག   

སངས་རྒྱས་སྐྱབས་ལགས་ཀྱིས་གསུངས་པར། མའོ་ཡི་སྐབས་སུ་སྤྱི་བཏང་རྒྱ་ནག་དམར་ཤོག་གིས་རིག་པའི་གཞུང་ལུགས་ཡིན་ན་ཡང་འདྲ།   རྒྱ་ནག་དམར་ཤོག་གི་སྲིད་ཇུས་ཡིན་ན་ཡང་འདྲ།   ཕུགས་རྒྱང་རིང་པོར་གཏན་འཁེལ་བའི་སྲིད་ཇུས་འདི་གྲངས་ཉུང་མི་རིགས་རྩ་མེད་བཟོ་རྒྱུ་དང་དེའི་ནང་ནས་བོད་ཀྱི་ས་ཆ་ནས་བོད་མི་རིགས་རྩ་མེད་བཟོ་རྒྱུ་འདི་ཁོང་ཚོའི་སྲིད་ཇུས་རེད   ཡིན་ན་ཡང་མའོ་ཡི་སྐབས་སུ་མི་རིགས་གཞན་བསྒྱུར་གྱི་སྲིད་ཇུས་འདི་ཞི་ཅིང་ཕིན་ནང་བཞིན་རིག་གཞུང་ཡོངས་སུ་རྩ་མེད་བཟོ་བའི་སྲིད་ཇུས་འདི་མིན་པར།   མའོ་ཡི་སྐབས་སུ་གཙོ་བོ་འདི་རྒྱ་ནག་གི་མི་སེར་སྤེལ་ཡུལ་དང་།  རྒྱ་མི་མང་པོ་བོད་ཀྱི་ས་ཆར་གནས་སྤོ་བྱ་རྒྱུ་འདི་མའོ་ཡི་སྐབས་སུ་སྲིད་ཇུས་གལ་ཆེ་ཤོས་འདི་རེད།   དཔེར་ན།  མདོ་སྟོད་སྨད་ཀྱི་བོད་ཀྱི་ས་ཆ་ལ་རྒྱ་མི་མང་པོ་གནས་སྤོ་བྱས་པ་འདི་མའོ་ཡི་དུས་སྐབས་ལ་རེད།  དཔེར་ན་ང་ཚོ་ཁྲི་ཀ་རྫོང་ལ་རྒྱ་ནག་གི་ཞིང་ཆེན་བཅོ་ལྔ་ནས་རྒྱ་མི་གནས་སྤོས་བྱས་ཏེ་རྒྱ་གྲོང་མང་པོ་བཙུགས་ཏེ་དེ་ཡི་མི་འབོར་ཐོག་ནས་གཞན་བསྒྱུར་བྱ་རྒྱུའི་སྲིད་ཇུས་འདི་རེད།   

བོད་མིའི་བླ་སྲོག་དང་འབྲེལ་བའི་ནང་པ་སངས་རྒྱས་པའི་ཆོས་ལུགས་འདི་བཞིན་བོད་མིའི་ཉིན་རེའི་འཚོ་བའི་ནང་འཐིམ་ནས་ཡོད་དུས་རྒྱ་ནག་དམར་ཤོག་གཞུང་འདིས་ཐོག་མ་ནས་ཆོས་ལུགས་སྲིད་ཇུས་འདི་གལ་ཆེ་ཞིག་ལ་རྩིས་ཡོད་པས་བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་ཕན་ཐོགས་ལགས་ནས་གསུངས་པར།  

བསྟན་དགྲ་ཟེར་བོད་མིས་དོ་སྣང་ཆེན་པོ་བྱེད་ཀྱི་ཡོད།  ཆོས་ལུགས་ཐོག་སྲིད་ཇུས་རིམ་པས་གྱུར་བ་མང་པོ་ཕྱིན་ཡོད།   སྲིད་དབང་འཛིན་རྒྱུའི་ཆེད་དུས་༥༡ལོར་དོན་ཚན་བཅུ་བདུན་གྱི་ཆིངས་ཡིག་བཞག་ཡོད།   དེ་དུས་༤༩ལོ་ནས་༥༥ལོ་བར་ཆོས་ལུགས་མི་སྣ་སླུ་ཁྲིད་དང་ལྐོག་རྔན་སྤྲད་པའི་སྲིད་ཇུས་གཏིང་པ་དང་།   དེ་ནས་༥༥ལོ་དང་༥༦ལོར་བོད་ཀྱི་ཁམས་ཁུལ་དང་།  ཡང་༥༧ལོ་དང་༥༨ལོར་ཀན་སུ་དང་མཚོ་སྔོན་ཟེར་བའི་བོད་ཀྱི་ཨ་མདོ་ཁུལ་དུ་ས་གནས་དཔོན་རིགས་ཀྱི་དབང་ཆ་འཕྲོག་པ་དང་ཆོས་ལུགས་མི་སྣའི་དབང་ཆ་འཕྲོག་པ།   དགོན་པ་གཏོར་བཤིག་གཏོང་རྒྱུ་འགོ་བཙུགས་ཡོད།   ༥༩ལོ་ནས་བཟུང་བོད་རང་སྐྱོང་ལྗོངས་ཟེར་བའི་དབུས་གཙང་ཁུལ་དུ་བསྒྱུར་བཅོས་བཏང་པ་སོགས་བྱས་ཏེ་གནོད་འཚེ་བཏང་ཡོད།   ལྷག་པར་དུ་མའ་ཙེ་ཏུང་གི་སྐབས་སུ་ལྔ་བཅུ་ང་གྲངས་ནས་བྱས་ཏེ་ཆོས་ལུགས་འདི་དུག་ཡིན་པའི་ལྟ་བའི་འོག་བོད་ལ་མཚོན་ན།  བོད་ལ་དགོན་པ་དྲུག་སྟོང་ལྷག་ཙམ་ཡོད་པ་གཏོར་ནས་སྟོང་པ་བཟོས་ཏེ་གྲ་བཙུན་ཕྱིར་ཕུད་དང་།   དགོན་པ་བཤས་རྭ་བཟོས་པ།   རྒྱ་ནག་གཞུང་གིས་གཙུག་ལག་ཁང་དང་བཀྲ་ཤིས་ལྷུན་པོ་སོགས་དགོན་པ་ཁ་ཤས་ཤིག་ཕྱི་ལ་སྟོན་ཆེད་བཞག་པ་ལས་དེ་མིན་ཚང་མ་གཏོར་བཤིག་རྩ་མེད་བཏང་ཡོད།   མའོ་ཙེ་ཏུང་སྐབས་སུ་ཁོང་ཚོས་དབང་ཆ་འཕྲོག་པའི་རྗེས་ལ་ཆོས་འདི་དུག་རེད་ཅེས་དང་།  སེམས་ཀྱི་ཁ་ཕྱོགས་དམར་ཤོག་ཕྱོགས་སུ་སྒྱུར་པའི་ཆེད་དུ་ཆོས་མེད་པ་བཟོ་རྒྱུ་དང་།  བོད་ནང་རིག་གནས་གསར་བརྗེ་བར་དུ་ཆོས་བྱེད་མི་ཆོག་པའི་དམ་བསྒྲགས་བྱས་ཡོད།  

ཡང་རྒྱ་ནག་དམར་ཤོག་གཞུང་གིས་བཙན་འཛུལ་དབང་བསྒྱུར་བྱས་པའི་རྗེས་མའོ་ཡི་ལག་བསྟར་བྱས་པའི་སྲིད་ཇུས་གཞན་ཞིག་ནི་བོད་གཞུང་དགའ་ལྡན་ཕོ་བྲང་གི་སྒྲོམ་གཞི་འདི་རྩ་མེད་བཟོ་བའི་ཆེད་དུ་བོད་པ་ནང་ཁུལ་དུ་གྲལ་རིམ་གྱི་དབྱེ་བ་བཟོས་ཏེ་འགལ་ཟླ་སློང་རྒྱུ་འགོ་བཙུགས་ནས་མཐར་ཡོད་ཚད་རྩ་མེད་བཏང་སྟེ་བོད་པའི་མི་རབས་གསར་པའི་ཁྲོད་ལོ་རྒྱུས་སོགས་གང་ཡང་མཐོང་རྒྱུ་མེད་པ་བཟོས་སྐོར་ཟླ་བ་ཚེ་རིང་ལགས་ཀྱིས་གསུངས་བྱུང་།   རྒྱ་ནག་གི་བོད་ལ་དབང་བསྒྱུར་བྱས་ཏེ་མི་རིགས་ཀྱི་དབྱེ་བ་འདི་གལ་ཆེ་མིན་པ་དང་རྒྱལ་ཁབ་ཀྱི་དབྱེ་བ་འདི་ཡང་གལ་ཆེན་པོ་མིན་པར།  གྲལ་རིམ་འཐབ་རྩོད་ཀྱི་དབྱེ་བའི་ཐོག་ནས་ང་ཚོ་འབྱོར་མེད་གྲལ་རིམ་གྱིས་གཉའ་གནོན་གྱི་གྲལ་རིམ་རྩ་མེད་གཏོང་རྒྱུ་ཡིན་ཟེར་བ་དང་།  ང་ཚོ་བོད་ཀྱི་གཏམ་དཔེ་བཞིན་བཙན་པོའི་གཉའ་གནོན་དང་ཉམས་ཆུང་གི་ལྕགས་སྐུལ་ཟེར་བ་བཞིན་བོད་པ་མང་པོ་ཞིག་གིས་རྒྱ་ནག་འདི་བཙན་པོའི་སྒང་གི་སྟ་རི་དང་ཉམས་ཆུང་སྒང་གི་ལྕགས་སྐུལ་བཞིན་ཕ་མ་འདྲ་པོ་མཐོང་མཁན་བོད་པ་མང་པོ་བྱུང་འདུག  སྐབས་དེ་དུས་མགོ་སྐོར་བཏང་ནས་སྐྱོད་བཞིན་ཡོད།  འོན་ཀྱང་རྒྱ་ནག་གཞུང་གིས་དོན་ངོ་མའི་བསམ་ཚུལ་ནི་རྒྱ་ནག་གཞུང་གིས་བོད་ནང་གཞུང་གི་ལས་ཁུངས་གསར་བཙུགས་དང་བོད་གཞུང་གི་ལས་ཁུངས་མེད་པ་བཟོ་རྒྱུ།  བོད་ཀྱི་ཆོས་དང་ལོ་རྒྱུས།  རིག་གཞུང་སོགས་མེད་པ་བཟོ་རྒྱུ།   ཐ་ན་ཁང་པ་སོགས་ཚང་མ་གཏོར་བ་རེད།  གཙུག་ལག་ཁང་དང་ཕོ་བྲང་པོ་ཏཱ་ལ་བཞག་པ་འདི་ཡང་རྒྱལ་ཁ་ཐོབ་པའི་དཔང་རྟགས་ལྟ་བུ་བྱས་ཡོད།  དེ་མིན་མཁར་སོགས་ཚང་མ་གཏོར་ཏེ་གང་ལྟར་ཕྱོགས་གང་ནས་བལྟས་ན་ཡང་བོད་ཀྱི་ལོ་རྒྱུས་མེད་པ་དང་མི་རིགས་ཀྱི་སོ་སོའི་སྤོབས་པ་མེད་པ།  ཆོས་དང་རིག་གཞུང་མེད་པ།   གཞུང་མེད་པ།  སྒྲིག་འཛུགས་མེད་པ།  ཚང་མ་མེད་པ་བཟོས་ནས་ཤོག་བུ་དཀར་པོ་ཞིག་གི་ཐོག་བཞག་པ་རེད།  

རྒྱ་ནག་དམར་ཤོག་གཞུང་གིས་རྒྱ་ནག་དང་ཉི་ཧོང་དམག་འཁྲུག་གླེང་སྟེ་ནན་ཅིང་དམར་གསོད་ཆེན་མོ་ཟེར་དུས་ད་ལྟ་ཡང་གླེང་ནས་ཡོད་པ་དང་།  ཡང་མའོ་ཡི་སྐབས་སུ་བོད་མི་དམར་གསོད་བཏང་བའི་གནས་སྟངས་འདི་ནན་ཅིང་དམར་གསོད་ཆེན་མོ་ལས་ཀྱང་ཚབས་ཆེ་བ་བྱུང་ནས་བོད་པའི་མི་འབོར་ཉུང་རུ་ཕྱིན་སྐོར་སངས་རྒྱས་སྐྱབས་ལགས་ཀྱིས་གསུངས་བྱུང་།

རྒྱ་མི་སླེབས་སོ་ང་ཚོ་སྡོད་ཀྱི་མིན་ཟེར་གནས་སྤོས་ཏེ་བྲོས་འགྲོ་མཁན་འདི་ཚོ་ངོ་ལོག་པ་རེད་ཟེར་དྲག་གནོན་བྱས་པ་དང་།   དུས་སྐབས་དེའི་ནང་བོད་པ་བསད་མཁན་ནི་རྒྱ་ནག་གི་ཚད་ལྡན་གྱི་དམག་མི་དང་སྐབས་དེ་དུས་ཨ་མི་ར་ཀར་ཁ་གཏད་བཅོག་པར་བཏང་པའི་གནམ་གྲུ་ཡག་ཤོས་འདི་ཡང་བོད་ལ་བེད་སྤྱོད་བྱས་ཏེ་གནམ་དམག་དང་སྐམ་དམག  རྟ་དམག་སོགས་བཏང་སྟེ་འབངས་མི་སེར་དམར་གསོད་བཏང་པའི་དུས་ཚོད་འདི་མའོ་ཡི་དུས་སྐབས་ལ་བྱུང་ཡོད་ལ།   འདི་ལོ་རྒྱུས་ཐོག་གཡོལ་ཐབས་མེད་པ་ཞིག་དང་།   སྐབས་དེའི་དམར་གསོད་ནི་ཧ་ལས་པའི་ཚབས་ཆེན་ཡིན་ཞིང་།  དུས་ཚོད་ངེས་ཅན་ཞིག་ནང་མི་འབར་ཉམ་རྒུད་ལ་སོང་བ་མ་ཟད།  སྐྱེས་པ་མེད་པར་གྲོང་པ་ཚང་མ་སྐྱེ་དམན་དང་ཕྲུ་གུ་ལས་ལྷག་མེད་པའི་ཡ་ང་བའི་གནས་སྟངས་ཆགས་ཡོད།  བོད་ལ་དམར་གསོད་ཆེན་པོ་བཏང་བའི་དུས་ཚོད་འདི་མའོ་ཡི་དུས་སྐབས་ལ་རེད།  ནན་ཅིང་གི་དམར་གསོད་ཆེན་མོ་ཟེར་བཤད་ཀྱི་ཡོད་པ་དང་།  འདི་རྒྱ་ནག་གཞུང་གིས་དྲིལ་བསྒྲགས་ཆེན་པོ་བྱས་ཏེ་འབུམ་གསུམ་དམར་གསོད་བཏང་ཡོད་པ་བཤད་ཀྱི་ཡོད།  རྒྱལ་སྤྱིའི་ཐོག་ནས་ཞིབ་འཇུག་བྱེད་མཁན་གྱི་ལྟ་དུས་རྒྱ་ནག་གཞུང་གིས་བཤད་པ་དང་ཉི་ཧོང་གིས་བཤད་པའི་བར་ལ་ཁྱད་པར་ཆེན་པོ་བྱུང་ཡོད་པ་དང་།  ཡང་རྒྱ་ནག་གིས་བོད་ལ་དམར་གསོད་བཏང་པ་དང་རྒྱུན་ལྡན་མ་ཡིན་པའི་ངང་ནས་བོད་མི་གྲོངས་པའི་གྲངས་འབོར་འདི་ས་ཡ་གཅིག་དང་འབུམ་གཉིས་ཆགས་ཞིང་།  ཡང་ནན་ཅིང་དམར་གསོད་ཆེན་མོ་ལས་ལྡབ་ཁ་ཤས་ཆགས་ཡོད།

རྒྱ་ནག་གི་དབང་འཛིན་པ་མའོ་ཡི་སྐབས་སུ་བོད་ལ་དམར་པོའི་རླུང་འཚུབ་ཆེ་ཤོས་ཤིག་ནི་ལོ་བཅུའི་རིག་གནས་གསར་བརྗེའི་ལས་འགུལ་འདི་ཆགས་ཤིང་།  ལས་འགུལ་འདི་ཡང་བོད་ལ་མུ་གེའི་སྒང་ལ་ཐན་པ་ཟེར་བའི་དཔེ་བཞིན་མི་རྒྱུ་གཉིས་ལ་དཀའ་ངལ་འཕྲད་ཡོད།

ཟླ་བ་ཚེ་རིང་ལགས་ཀྱིས་གསུངས་པར།  རིག་གནས་གསར་བརྗེ་ཆེན་མོ་འདི་དེའི་སྒང་ལ་ཤུགས་རྒྱབ་ནས་སྔོན་ལ་དམངས་གཙོའི་བཅོས་བསྒྱུར་སྐབས་གཙང་སེལ་བཟོ་ཐུབ་མེད་པ་འདི་ཚོ་ཚང་མ་གཙང་སེལ་བཟོས་ཏེ་བོད་ཀྱི་ཡུལ་དང་བོད་ཀྱི་ཆོས་དང་རིག་གཞུང་གོ་རྒྱུ་ཚོར་རྒྱུ་མེད་པ་བཟོས་པ་དང་།   བོད་ཀྱི་མཁར་དང་དགོན་པ་རིག་གནས་གསར་བརྗེའི་ནང་མང་ཆེ་བ་གཏོར་བཤིག་བཏང་ཡོད།  དེ་བཞིན་དམངས་གཙོའི་བཅོས་བསྒྱུར་ཟེར་ན་ཡང་འདྲ།  རིག་གནས་གསར་བརྗེ་ཟེར་ན་ཡང་འདྲ་མིང་འདྲ་མིན་བཏགས་པ་ལས་རྒྱ་ནག་གཞུང་གིས་དམིགས་ས་འདི་བོད་ཀྱི་ཆོས་དང་རིག་གཞུང་།  ལོ་རྒྱུས།  སོ་སོའི་མི་རིགས་ཀྱི་ཁྱད་ཆོས་ལྡན་པ།  སྤོབས་པ་ཡོང་ས་དང་།  བོད་པའི་མི་རབས་རྗེས་མའི་མཐོང་སྣང་ནང་བོད་ལ་ཡོད་པ་ཚང་མ་རྒྱ་ནག་གིས་འཁྱེར་ཡོང་བ་ལས་བོད་ལ་གནའ་སྔ་མོ་གང་ཡང་མེད་པ་འདྲ་པོའི་བཟོས་ཡོད།   དེ་བཞིན་མའོ་ཙེ་ཏུང་གིས་དུས་ཚོད་འདི་བཙན་དབང་དང་དྲག་གནོན།  དམག་འཁྲུག་གཅིག་པུ་ལས་དེ་མིན་གང་ཡང་ཡོད་པ་མ་རེད། 

སངས་རྒྱས་སྐྱབས་ལགས་ཀྱིས་གསུངས་པར།  རིག་གནས་གསར་བརྗེ་ཆེན་མོའི་ནང་བོད་པ་ལས་འགུལ་སྤེལ་ནས་བསད་པ་དང་རང་ཤི་བརྒྱབ་པ་སོགས་ཀྱི་གྲངས་འབོར་ནི་ཧ་ཅང་མང་པོ་རེད།  མའོ་མ་ཤི་བར་དུ་ཆབ་སྲིད་ཀྱི་ལས་འགུལ་འདྲ་མིན་སྤེལ་ནས་བོད་པ་ལ་ཆག་འཇིགས་ཆེན་པ་དང་།  ལྷག་པར་དུ་དམར་གསོད་དང་མི་ཡི་ཚེ་སྲོག་འདི་རྒྱུ་མཚན་མེད་པར་ཚེ་སྲོག་ཤོར་བའི་དུས་ཚོད་ཅིག་རེད།   

མདོར་ན་རྒྱ་ནག་དམར་ཤོག་གཞུང་འདི་གསར་འཛུགས་བྱས་པ་མ་ཐག་ཏུ་རྒྱ་ནག་གི་དབང་འཛིན་པ་མའོ་ཡི་སྐབས་སུ་བོད་ལ་བཙན་འཛུལ་གྱིས་དབང་བསྒྱུར་བྱས་ཤིང་།   དུས་དེ་ནས་བཟུང་བོད་ཀྱི་ཆོས་དང་རིག་གཞུང་།  ཁོར་ཡུག་དང་བཅས་པར་གཏོར་བཤིག་དང་།   དམིགས་བསལ་བོད་མི་རིགས་འདི་རྩ་གཏོར་གྱི་སྲིད་ཇུས་ཤིག་འགོ་བརྩམས་ཏེ་ད་ལྟ་བར་མུ་མཐུད་ལག་བསྟར་བྱ་མུས་ཡིན་པ་གོང་ཞུས་གནད་དོན་དབྱེ་ཞིབ་པ་ཚོས་ངོས་འཛིན་གནང་གི་འདུག

*རྒྱ་ནག་དམར་ཤོག་གཞུང་གི་འདས་པའི་ལོ་ངོ་ ༧༥ ནང་བོད་ལ་དབང་བསྒྱུར་བྱས་པ་དང་འབྲེལ་བའི་དེའི་སྔོན་གྱི་གནས་ཚུལ་ཁག མའོ་ཙེ་ཏུང་གི་དུས་སྐབས། ཏེང་ཞའོ་ཕིང་གི་དུས་སྐབས། ཅང་ཙེ་མིན་གྱི་དུས་སྐབས། ཧུའུ་ཇིང་ཐའོ་ཡི་དུས་སྐབས། ཞི་ཅིན་ཕིང་གི་དུས་སྐབས།

གསར་འགོད་པ། སྒྲོལ་དཀར།
རྩོམ་སྒྲིག་པ། བསྟན་འཛིན་པདྨ།
དྲྭ་ཐོག་སྤེལ་མཁན། ནོར་སྡེ་སྒྲོལ་མ།