B d t kishilik hoquq kéngishining 15 - nöwetlik yighinida Uyghurlar mesilisi otturigha qoyulamdu?

Sürette, dunya uyghur qurultiyining bash katipi dolqun eysa ependi bu qétimqi wakaletsiz milletler teshkilatining italiyide ötküzülüwatqan qurultiyida.

B d t gha eza döletler we b d t ni közitish salahiyitige érishken 200 din artuq kishilik hoquq teshkilatlirining wekillirining qatnishishi bilen, döletlerning kishilik hoquq weziyiti heqqide yilda üch qétim muzakiriler élip bérilidighan we munasiwetlik qararlar qobul qilinip, kishilerning insaniy heq - hoquqliri depsendichilikke uchrawatqan döletler hökümetliri üstidin xelq'araliq bésim peyda qilidighan bu yighinda, Uyghurlar mesilisini küntertipke élip kirish, d u q ning uzundin buyanqi muhim xizmetlirining biri bolup kelgenliki melum.
 
Bu qétimqi kishilik hoquq kéngishi yighini 9 - ayning 13 - künidin 10 - ayning 1 - künige qeder shiwétsariyining jenwe shehiridiki b d t bash shitabida dawam qilidighan bolup, d u q mezkur yighinda Uyghurlar mesilisining otturigha qoyulushi üchün bir qanche aylardin buyan pa'al teyyarliq qilghan.

8 - Ayning 30 - künidin 9 - ayning 2 - künige qeder jenwede turup, b d t ning munasiwetlik xadimliri hem herqaysi döletlerning elchixana mes'ulliri, nopuzluq xelq'araliq teshkilatlar bilen uchrishishlar ötküzgen d u q bash katipi dolqun eysa ependi bu munasiwet bilen ziyaritimizni qobul qilip, aldi bilen bu qétimqi yighinning ehmiyiti toghrisidiki köz qarashlirini we d u q ning élip barghan pa'aliyetliri bayan qilip ötti.
 
Dolqun eysa ependi bu qétimqi pa'aliyiti jeryanida bir qisim gherb démokratik döletlirining elchiliri we xelq'ara kechürüm teshkilatigha oxshash tesirlik teshkilatlarning wekilliri bilen körüshüp, sherqiy türkistanning nöwettiki weziyiti heqqide melumatlar bergenlikini, xitayning künséri esheddiliship bériwatqan kishilik hoquq depsendichilikini pakitliri bilen otturigha qoyup, b d t 15 - nöwetlik kishilik hoquq kéngishi yighinida Uyghurlar mesilisini otturigha élip chiqish toghriliq meslihetler élip barghanliqini tekitlidi.
 
D u q bash katipining bildürüshiche, bu yil 6 - ayda chaqirilghan b d t kishilik hoquq kéngishining 14 - nöwetlik omumi yighinida Uyghurlar mesilisi otturigha qoyulghan bolup, gherb démokratik ellirige wekaliten Uyghurlar mesilisini küntertipke élip kirgen ispaniye hökümet wekili xitay hökümiti wekillirini qéyin ehwalda qaldurghan.
 
Dolqun eysa ependining éytishiche, xitay hökümitining nöwette Uyghurlar üstidin yürgüzüwatqan basturush siyasiti gherb elliri hem kishilik hoquq teshkilatliri jiddiy diqqitide tutuwatqan bir mesile bolup, 15 - nöwetlik kishilik hoquq kéngishi yighinida xitay terepni yene bir qétim osal ehwalgha chüshürüp qoyushi mumkin iken.

Yuqiridiki awaz ulinishidin, bu heqtiki melumatimizning tepsilatini anglaysiler.