Esed texttin chüshemdu?

Süriye krizisi 17 aydin biri dawam qilmaqta. Axiri ereblermu süriyining liwiyige oxshimaydighanliqini we süriye re'isi beshshar el esedni kazafiyni yoqatqandek yoqatqili bolmaydighanliqini chüshinip yetmekte.
Ixtiyariy muxbirimiz ömerjan
2012-07-25
Share
gollandiye-suriye-beshshar-esed-305.png Rusiyining süriyini qollishigha qarshi gollandiyidiki namayishtin bir körünüsh.
AFP

Chünki, pütün dunya süriye xelqi terepte turghan bolsimu, esedni rusiyige oxshash küchlük bir dölet qollap kelmekte. Rusiyining esliheliri bilen iranning eskerliri süriye xelqini öltürüshke yardemleshmekte.

Ereb dunyasi süriye krizisini qandaq hel qilish mesiliside qattiq bash qaturuwatqan mushu peytte, ereb döletliri tashqi ishlar ministirlirining qatar paytexti dewhe shehiride chaqirilghan chong yighinida, esedni texttin chüshüshke qistash pikri otturigha qoyulghan. Bu pikir rusiyining parizhdiki bash elchisining "Esed textni medeniylik bilen ötküzüp béridu" dégen bayanatigha asaslan'ghan bolushi mumkin. Qandaqla bolmisun, erebler esedni kazafiydek yoqitishning ornigha mubarek we éli abdulla salihtek texttin chüshürüsh pikride ittipaqlashqan.

Tehlilchilerge köre, moskwaning "Esed texttin chüshüp béridu" dégen bayanatimu bir xil hiyle-mikir bolup, ereblerni aldap turup waqit qazinish meqset qilin'ghan bolushi éhtimal. Chünki, erebler qatarda esedke texttin chüshüsh teklipini bérish qararini alghan peytning özide, beshshar el esedning qérindishi mahir esed demeshiq kochilirida süriyilik yashlarni tutqan yerde öltürüsh jinayitini sadir qiliwatatti.

Londonda chiqidighan "Ottura sherq" gézitining 2012-yili 24-iyul sanida, yazghuchi tariq hemid teripidin "Esed texttin chüshemdu?" dégen témida bir maqale élan qilin'ghan bolup, maqalide mundaq dep yézilghan: "Beshshar esedning erebler qoyghan teklipni qobul qilishi éhtimaldin yiraq. Eger moskwa küch ishletse ish bashqiche bolushi mumkin. Eng yaxshisi ereb döletliri amérikidiki bash elchilirini birleshken döletler teshkilatining omumiy yighinigha chaqirip, süriyide xelqni himaye qilidighan alahide rayon qorush we süriye armiyisidin xelq terepke ötken eskerlerni qoghdash toghriliq qarar élishni telep qilghini tüzük. Chünki, süriyiliklerni himaye qilish ishini arqigha sozghanning ziyini köp bolidu. Héch bolmighanda, süriyidiki xelqchil qoshunlarning qolida bolghan rayonlarni bolsimu qoghdilidighan rayon qilish zörürdur. Ereblerning esed hakimiyitidin birer ijabiy jawab kélishini kütüshining paydisi yoq. Chünki esed küchliri süriye xelqidin intiqam élish üchün yash-qéri démestin öltürüp kelmekte. Wehshiylerche öltürülgen naresidilerning sanimu az emes. Hazir süriye xelqi üchün qilishqa tégishlik eng zörür ish ulargha süriye ichide qoghdilidighan, xatirjem rayon qurup bérishtur. Shundaq qilghandila süriye xelqini ölümdin qutuldurup qalghili bolidu."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet