Австралийәдики уйғурлар җәм болуп бу йиллиқ рузи һейтни тәбриклиди

Ихтиярий мухбиримиз учқун
2019-06-06
Елхәт
Пикир
Share
Принт
Уйғур аилисидә һейтлишиш. 2019-Йили 5-июн, аделайд, австралийә.
Уйғур аилисидә һейтлишиш. 2019-Йили 5-июн, аделайд, австралийә.
RFA/Uchqun

Австралийә һәммимизгә мәлум болғинидәк җәнубий йерим шарда уйғурлар әң көп олтурақлашқан дөләт. Австралийәдики уйғурларниң көп қисми сейдний, мелборин, аделайд қатарлиқ чоң шәһәрләрдә топлишип яшиғандин башқа аз сандики уйғурлар йәнә канберра, бирисбен, голд кост, перс қатарлиқ шәһәрләрдиму яшимақта.

Ундақта, австиралийәдики уйғурлар бу йиллиқ роза һейтни қандақ өткүзди? биз бу һәқтә әһвал игиләш үчүн сейдний, мелборин вә аделайд шәһәрлиридә яшаватқан бир қисим уйғурларни зиярәт қилдуқ. Сиднейдики австралийә уйғур җәмийитиниң муавин рәиси җүрәт әпәнди зияритимизни қобул қилип мундақ деди: «биз сиднейдики уйғур җамаити 6-айниң 4-күни түркләрниң обин мәсчити вә бунрек мәсчитидә рузи һейт намизини оқудуқ. Намаздин чиқип бир йәргә йиғилип бир-биримизниң һейтини мубарәкләштуқ, ундин кейин үч түркүмгә бөлүнүп өрп-адитимиз бойичә өз-ара һейтлаштуқ.»

У йәнә һейтлишишниң наһайити көңүллүк болғанлиқи һәққидиму тохтилип мундақ деди: «биз аримиздин айрилғанлар вә пешқәдәмләрниң өйлиригә берип һал-әһвал соридуқ, һейтниң 1-күни әнә шундақ өтти. Бүгүнму яшлиримиз топ-топ болуп һейтлап келип бизни наһайити хушал қилди.»

Мелборин шәһиридә яшаватқан қасимҗан әпәнди рузи һейт намизида вәтән үчүн дуа қилғанлиқи һәққидә тохтилип мундақ деди: «биз мелборн шәһиридә 6-айниң 4-күни күни һейт қилдуқ. Һейт намизини дәнденоң районидики султан әхмәт мәсчитидә оқудуқ. Намазға аз дегәндә 70-80 дәк уйғур җамаити қатнашқан болуп, һейт намизида вәтән үчүн, хәлқимизниң һөрлүки үчүн дуаларни қилдуқ.»

У йәнә намаздин кейинки һейтлишиш һәққидиму тохтилип мундақ деди: «намаздин кейин мәсчит әтрапидики чоңларниң өйини һейтлап улардин әһвал соридуқ, ундин кейин балилиримизға өрп-адәтлиримиз вә миллий байрамлиримиз һәққидә чүшәнчә бәрдуқ шундақла уларға совғат тәйярлидуқ.»

Җәнубий австралийә ислам җәмийитиниң муавин рәиси шундақла австралийә шәрқий түркистан җәмийитиниң рәиси нурмәмәт түркистани әпәндим аделайд шәһиридики руз һейт һәққидә мәлумат берип мундақ деди: «биз австралийә дөләтлик имамлар шурасиниң қарари бойичә 6-айниң 5-чаршәнбә күни рузи һейт намизини оқудуқ. Рози һейт намизи әбубәкир сидиқ мәсчитидә 1500 дин артуқ җамаәтниң ичидә 300 дин артуқ чоң-кичик вә әр-аял шәрқий түркистанлиқ қериндашлар қатнашти. Намазға өзимиздин чиққан диний устазимиз абдусалам қари һаҗим имамәтчилик қилди, у намазниң хутбисидә шәрқий түркистанниң нөвәттики вәзийитини көпчиликкә тунуштурди шундақла шәрқий түркистан үчүн һәммимиз бирликтә дуаларни қилдуқ.»

Нурмәмәт әпәндим йәнә һейтлишиш һәққидиму тохтилип мундақ деди: «намаздин кейин биз җәмийитимизниң йетәкчиликидә чоңларни, мусибәт егилирини вә тул аялларни алди билән йоқлидуқ. Бүгүн пешин намизидин башланған бу һейтлишишимизни таки хуптән намизиғичә давамлаштурдуқ. Биз бу күнни бир-биримиз билән һал муң қилиш, көңүл сораш, әнәниви йемәк-ичмәкләрдин һузурлиниш, балилиримизға қиммәтлик өрп-адитимиз вә диний юсунлиримизни өгитидиған гүзәл паалийәтлиримиз арқилиқ һейт тәнтәниси билән өткүздуқ.»

Австиралийәгә йеңидин келип олтурақлашқан абдулезиз әпәндиму рузи һейт һәққидики тәсиратлирини биз билән ортақлишип мундақ деди: «мән австиралийәгә тунҗи қетим кәлгәндиму рузи һейтқа үлгүрүп кәлгән идим, шу вақиттиму наһайити көңүллүк һейтлашқан идуқ, бу қетимму худди вәтәндикидәк һейтлаштуқ, буниңдин интайин һаяҗанландим. Мән рози һейт мунасивити билән пүтүн дунядики вәтәндашлиримға қизғин салам йоллаймән.»

Австиралийәдә рози һейт гәрчә рәсмий дәм елиш күни болмисиму, уйғур җамаити йәнила қизғин һейтлишип, миллий әнәнимизни давамлаштурушта күчиниң йетишичә тиришмақта икән.

Пикирләр (0)
Share
Толуқ бәт