Уйғур яш: хитай даирилири уйғур пәрзәнтлиригә системилиқ суйиқәст қиливатиду

Уйғур диярида уйғур пәрзәнтлириниң йоқап кетиш әһвали нормал әһвалға айлинип қалди. Йеқинда хитай даирилириниң һәр хил учур васитилиридә бала йитип кетишкә даир еланларни бәрмәслик, беришкә тоғра кәлсиму мунасивәтлик орунларниң тәстиқлиши билән бериш, әгәр хилаплиқ қилғучилар көрүлсә, уларға чарә көрүш қатарлиқ бәлгилимиләрни чиқирип йоқап кәткән пәрзәнтләрниң издәш васитилириғиму чәклимә қойған иди.

Йеқинда вәтәндин чиқип түркийәдә яшаватқан бир уйғур яш, уйғур диярида уйғур пәрзәнтлириниң йоқап кетиш әһвалида хитай даирилириниң қара қоли барлиқини илгири сүрди.

У өзиниң вәтәндики вақтида шаһит болған бәзи вәқәләрни сөзләп, буниң адәттики бала йоқап кетиш әмәс, бәлки пиланлиқ һалда елип бериливатқан әһвал икәнликини, буниңға уйғур җәмийитиниң җиддий қариши керәкликини оттуриға қойди.

Исмини ашкарилашни халимиған, зияритимизни қобул қилған бир уйғур яш үрүмчидә йәр асти диний мәктәптә оқуди дәп кесилгән 9 яшлиқ вә 6 яшлиқ икки уйғур пәрзәнтиниң вәқәсини аңлатти.

Ахирида у, уйғур пәрзәнтлириниң оғрилинишла әмәс, бәлки системилиқ һалда меңә ююш һәрикитигиму дуч келиватқанлиқини әскәртти.