Қирғизистан пайтәхти бишкәк шәһиридә уйғур яшлири уйғур мәсилисигә аит муһакимә паалийити өткүзди

Ихтиярий мухбиримиз ферузә
2018-12-20
Елхәт
Пикир
Share
Принт
Қирғизистандики уйғур яшлириниң «яшлиқ авази» гурупписи уюштурған «дәвр сөһбити» паалийити миллий марш билән башланди. 2018-Йили 16-декабир, қирғизистан.
Қирғизистандики уйғур яшлириниң «яшлиқ авази» гурупписи уюштурған «дәвр сөһбити» паалийити миллий марш билән башланди. 2018-Йили 16-декабир, қирғизистан.
RFA/Féruze

Қирғизистандики уйғур яшлириниң «яшлиқ авази» гурупписи 16-декабир күни бишкәктики «парк хотел» намлиқ меһманханиниң йиғин залида «дәвр сөһбити» паалийити уюштурди. Паалийәткә бишкәк шәһири вә униң әтрапидики йезилардин кәлгән уйғур яшлиридин 150 кә йеқин киши қатнашти.

Мурасим паалийити 3 қисимдин тәшкил қилинған болуп, булар: «дуня уйғур қурултийи һәрикити вә униң рәһбәрлири», «қирғизистан яшлири арисида уйғур тилини тәрәққий қилдуруш» вә «яшлиқ авази-2018» мукапатини тәқдим қилиш дегәнләрдин ибарәттур.

Ноябир ейида җәнвә вә мюнхен шәһәрлиридә өткүзүлгән паалийәтләргә қирғизистандин қатнашқан пәрһат ибраһимоф, әхмәт шамийеф вә нуршат әбәйдуллайефлар «дәвр сөһбити» паалийитиниң биринчи қисми, йәни «дуня уйғур қурултийи һәрикити вә униң рәһбәрлири» да доклат бәрди шуниңдәк уйғур яшлирини өз миллитиниң мәсилилиригә көңүл бөлүшкә чақирди.

Пәрһат ибраһимоф дуня уйғур қурултийиниң асасий принсиплири вә униң явропа парламенти, явропа комиссийәси, бирләшкән дөләтләр тәшкилати вә башқа хәлқаралиқ тәшкилатлар билән һәмкарлишиши һәққидә тәпсилий доклат бәрди.

Әхмәт шамийеф болса 6-ноябир күнидики намайиш һәққидә тохтилип, өз тәсиратлирини баян қилди. Йәнә доклат бәргүчи нуршат әбәйдуллайеф дуня уйғур қурултийи рәһбәрлири вә намайишқа қатнашқан уйғур алимлири-зиялийлири билән тонушуп, улар билән сөһбәтләшкәндә уларниң миллий роһиниң өзигә күчлүк тәсир көрсәткәнликини ейтти шуниңдәк дуня уйғур қурултийи рәиси долқун әйса әпәндиниң қирғизистан уйғур яшлириға әвәткән мураҗиитини йәткүзди.

Радийомиз зияритини қобул қилған нуршат әбәйдуллайеф дуня уйғур қурултийиниң паалийәтлиригә қатнашқандин кейинки өз һессиятлирини баян қилди.

Паалийәт давамида қирғизистанда уйғур тилини тәрәққий қилдуруш мәсилиси алаһидә муһакимә қилинди. Қатнашқучилар өз пикирлирини баян қилишти. Бу пикирләр ичидә уйғур тилида луғәтләрни нәшр қилиш, телефон арқилиқ тил өгиниш программилирини тәсис қилиш, мәктәп вә йәслиләрни ечиш вә башқилар бар.

Радийомиз зияритини қобул қилған орта асияда даңлиқ нахшичи шөһрәт яқубоф, ана тилни сақлап қелишта әдәбият вә нахша муһим орунни игиләйдиғанлиқини тәкитлиди.

Бу йиғинға актип қатнашқан уйғур яш қурбанҗан өзиниң һес туйғулирини изһар қилип, долқун әйса әпәндиниң мураҗиити вә нуршат әбәйдуллайефниң доклати, униң миллий роһини техиму күчәйткәнликини билдүрди.

Мәзкур мурасим рус тилида өткүзүлгән болсиму, әмма униң нәтиҗиси зор болди. «яшлиқ авази» ниң әзалири өзлиридин башлап яшларни қанчилик мумкинчилик болса шунчилик тиришип уйғур тилида сөзләшкә дәвәт қилишти,

Радио зияритимизни қобул қилған яшлиқ авази топиниң әзаси йүнүсҗан, паалийәтниң мәқсити вә нәтиҗилири тоғрисида тохтилип, «дәвр сөһбәтлири'ни һәр үч ай ичидә бир қетим уюштурушни қарар қилғанлиқини ейтти.

Мурасимниң ахирида яшлиқ авази йиллиқ мукапати тәқдим қилинди.

«яшлиқ авази» 2014-йилдин буян қирғизистанда йетишип чиққан уйғур яшларни қоллап, уларға мукапатларни тарқитип кәлмәктә. Өткән йиллири бу мурасимлар тәнтәнилик нахша-уссуллар билән өткүзүлгән болса, бу йили улар уйғур дияридики еғир вәзийәт түпәйлидин, оюн-тамашини чәткә қоюп, «дәвр сөһбити» шәклидә «яшлиқ авази-2018» мукапатини тәқдим қилишти. Мәзкур мукапатқа үч киши еришти. Улар; «юлтуз» ансамбили, ютуб интернет қанилида уйғур таамлирини тонуштурған вә сочи шәһиридә уйғур таамлирини омумлаштурушқа һәссә қошқан салават әбдуләзиз вә дуня көчмән хәлқләр тәнһәрикәт мусабиқисигә қатнашқан қурбантай билалдинофтур.

Пикирләр (0)
Share
Толуқ бәт