Sékularizm Uyghur musulmanlirining ijtima'iy - iqtisadi tereqqiyatigha purset yaritamdu ?

Bu yil 2 - yanwar, amérika “Nyu york waqti géziti”de andréw yakubsning “Xitayning yuqiri bésimliq teqibide ghezep oti qaynighan shinjang” serlewhilik maqalisi élan qilinip, küchlük tesir qozghighan idi. Maqalide aptor xitayning yuqiri bésimliq siyasiti astidiki Uyghur jem'iyitini goya ghezeptin “Qaynawatqan qazan”gha oxshatqan idi.

Lékin xitayning“Yer shari waqti géziti” ötken heptining axiri maqale élan qilip, andréw yakubisni tenqid qilghan. Maqalide körsitishiche, Uyghur rayonining hazirqi weziyitide hökümetning cheklesh xaraktérlik bezi tedbirlerni élishi bir zörüriyet. U, rayondiki musulmanlarning sékularlishishini algha sürüp, musulmanlarning ijtima'iy - iqtisadi tereqqiyatigha purset yaritidu.

Xitay “Xelq géziti”ning ali derijilik muherriri ding gang “Yer shari waqti géziti”ning 6 - yanwar sanidiki maqalisida, “Nyuyork waqti géziti” muxbiri andréw yakubsni tenqidlep, u Uyghur weziyitige yüzeki baha bergen, dep eyipligen.

Ding gangning qarishiche, andréw yakubs xitayning Uyghur rayonida alghan her xil diniy tedbiri musulmanlarning ijtima'iy - iqtisadi tereqqiyat qedimige maslishishigha purset yaritip béridighanliqini nezerge almighan.

Biz shu munasiwet bilen mezkur mesile heqqide se'udi erebistanda turushluq zhornalist we jama'et erbapi sirajiddin ezizi ependi bilen amérikida turushluq yipek yoli tetqiqatchisi, doktor qahar baratni ziyaret qilduq.