Weziyet közetküchiliri: "7-Nomurluq höjjet"-xitayning Uyghurlarni basturushtiki yol xeritisi

Muxbirimiz eziz
2016-03-22
Share
7-nomurluq-hojjet.jpg Buningdin yigirme yil ilgiri xitay kompartiyisi merkiziy komitéti "7-Nomurluq höjjet" namida tarqatqan "Qet'iy mexpiy" bir parche höjjet.
Social Media

Buningdin yigirme yil ilgiri xitay kompartiyisi merkiziy komitéti "7-Nomurluq höjjet" namida qet'iy mexpiy bir parche höjjet tarqatqan bolup, uning ichki jehette Uyghurlar diyaridiki siyasiy weziyetning kelgüsi xeritisi süpitide qollinilidighanliqini békitken. Aridin yigirme yil ötken bügünki künde mezkur höjjetning ijra bolush ehwali we uning Uyghurlarning siyasiy weziyitige körsetken her tereplime tesiri heqqide weziyet analizchiliri öz qarashlirini otturigha qoydi.

"7-Nomurluq höjjet" ning ashkarilan'ghan nusxisigha qarighanda, 1996-yili 19-mart küni xitay kompartiyisi merkiziy komitéti sabiq bash sékrétar jang zéminning riyasetchilikide bir yighin échip, Uyghurlar diyarining siyasiy weziyiti heqqide tepsiliy muhakime uyushturghan. Yighindin kéyin mezkur yighinda muhakime qilin'ghan mezmunlar asasidiki yighin xatirisi on türlük muhim nuqtigha yighinchaqlinip, xitay kompartiyisi merkiziy komitétining "7-Nomurluq höjjet" i dégen namda Uyghur aptonom rayonluq partkom we bashqa teng derijilik organlardiki yuqiri derijilik emeldarlargha "Qet'iy mexpiy" dégen tamgha bilen yollap bérilgen.

Kanadadiki Uyghur siyasiy pa'aliyetchilerdin memet toxti ependi bu heqte toxtilip, ötken yigirme yilda xitay kompartiyesining Uyghurlar diyaridiki pütkül siyasiy tedbirlirining mushu höjjetni eng aliy yétekchi idiye qilghan halda teyyarlinip kelgenlikini alahide tekitlidi. U bundaq bir muhim höjjetning tasadipiy otturigha chiqip qalghan bolmastin, uning keng arqa körünüshke ige ikenlikini mu'eyyenleshtürdi.

"7-Nomurluq höjjet" te Uyghurlar diyarining siyasiy jehettiki muqimliqi eng muhim orun'gha qoyulghan bolup, "Ichki düshmenler" we "Tashqi düshmenler" ning türlük "Buzghunchiliq" heriketlirige qandaq taqabil turushqa yéterlik yer ajritilghan.

Memet toxti ependi bu heqte toxtilip, bu höjjetning Uyghurlar mesilisini deslep bolup xitay hakimiyet yighinliridiki aliy küntertipke élip chiqqanliqini bayan qildi.

Mezkur mexpiy höjjette zörür bolghan diplomatiye chariliridin imkaniyetning bariche paydilinip, "Tashqi düshmen küchler" din bolghan Uyghur siyasiy pa'aliyetchilirini hemde chégra sirtidiki Uyghur milliy dawasini parchilash we cheklesh lazimliqi otturigha qoyulghan. Memet toxti ependi buning 'Uyghurlar mesilisining xelq'aralishishining aldini élish' dégen mezmunda ijra qilin'ghanliqini éytidu.

Dunya Uyghur qurultiyi ijra'iye komitétining re'isi dolqun eysa ependi bu heqte toxtilip, xitay döliti diplomatik wasitiler arqiliq ottura asiya rayonida jush urushqa bashlighan Uyghur siyasiy herikitining merkizini yawropa we amérikigha yötkilishke mejbur qilalighan bolsimu, dawaning sewiyisi we kölimini chekleshke qadir bolalmighanliqini éytti.

Mezkur höjjette alahide közge chéliqidighan bir nuqta shuki, uningda Uyghurlar rayonidiki yuqiridin töwen'giche bolghan her derijilik hakimiyet teshkilatlirigha atalmish "Shinjang ishlepchiqirish we qurulush bingtu'eni" din "Ishenchlik jengchi we kadirlarni rehbiriy qoshun" süpitide yötkesh, bingtu'en organlirigha bolsa ichkiridin xitay ishchilirini we partiyewiliki küchlük xitay oqughuchilirini köchürüsh shu waqittiki eng muhim xizmetler qatarida tilgha élin'ghan.

Memet toxti ependi bu nuqta heqqide gep bolghanda xitaylar belgilep chiqqan "Asasiy qatlam partiye we hakimiyet qurulushini kücheytish, meydani mustehkem, siyasiy jehette ishenchlik kadirlar qoshuni berpa qilish" nishanining zor derijide ijra bolghanliqini, shundaqla medeniy, ma'arip sahesiningmu bu höjjette belgilen'gen nishanlarning éghir zerbisige uchrighanliqini emeliy misallar arqiliq bayan qildi.

Weziyet közetküchiliri "7-Nomurluq höjjet" te belgilen'gen asasiy nuqtilar boyiche pikir bayan qilghanda, xitay hökümitining éghishmastin mezkur höjjettiki omumiy nishan asasida qedem-basquchluq rewishte özlirining Uyghurlar rayonigha qaratqan türlük siyasetlirini ijra qilip kéliwatqanliqini, emma xelq ammisining bu heqtiki ichki ehwallardin xewersiz bolushi mumkinlikini tilgha alidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet