Üch kün ichide némiler bolup ötti?

1-Ayning 26-künigiche üch kün burun dégüdek, xitayning re'isi xu jintaw washin'gtonni ziyaret qildi. Daghdughiliq kütüp élindi. Gerche, xitayperes sumurgh téléwiziyisining muhakimichiliri ichki sewebler tüpeyli xu jintawning amérika ziyaritini "déhqan karxanichining sheherge kirip qassapning yénida turushi" dep haqaretligen bolsimu, lékin xu jintaw amérikida qizil gilemge put qoydi, amérikidin kütken yüz xatirigimu érishti.

24-Küni moskwada partlash yüz bérip démokratik rusiyige éghir talapet yetküzdi. Yene 24-küni yéngila washin'gtondin qaytip kelgen xitay dölet komissari dey bin'go ependi. Rusiye, xitay 5-qétimliq "istratégiyilik chüshenche hasil qilish " uchrishishigha qatnishish üchün moskwada peyda boldi. 28-Küni dey bin'go yene ziyaret üchün béyjinggha yitip kelgen amérikining mu'awin dölet ishlar katipi sitan borg bilen jungnenxeyde yüz körüshti.

Tunista partlighan yasimen'gül inqilabidin kéyin, misir, i'ordaniye, marakesh, mawritaniye qatarliq ereb döletliride özini köydürüwalghuchilar otturigha chiqti. Ottura asiyada afghanistan, ottura sherqte yemen, iraq qatarliq döletlerde hökümetke qarshi hepirenggül inqilabi partlidi.

25-Küni misirning qahire shehiride partlighan aqchaygül inqilabi 27 ‏-küni 1000din artuq kishi qolgha élinsimu bésiqmay 28-künige yitip kelgende namayish misirda omumyüzlük aqchaygül inqilabigha aylinip hökümet, tor biti we téléfon alaqilirini üzüp tashlidi.

Dölet ishlar katipi hilariy xanim 2009-yili ürümchide Uyghurlar qozghighan, xitaylar basturghan namayishqa ipade bildürüp, "her ikki terepning özini tutuwélishini telep qilghan " dek, bu qétimmu misirdiki namayishqa baghliq her qaysi tereplerning éghir-bésiq bolushini telep qildi.

1-Ayning 26-küni "duwiy tor biti" xu jintaw bilen obamaning uchrishishi amérikining neziride emeliy ehmiyetke ige bolmidi" mawzuluq maqale élan qilip, 1-ayning 24-küni" washin'gton pochtisi géziti"ge imzaliq maqale yazghan robért samilsunning köz qarashlirini tonushturdi. Aptor : amérika bilen xitayning nishani tüptin oxshimaydu, amérika soda-tijaret qilish arqiliq ikkinchi dunya urushidin kéyinki dunyaning tertipini kéngeytmekchi bolidu, xitay bolsa, yéngi, belki özi xojayin bolidighan dunya tertipini turghuzmaqchi boluwatidu"dep körsetti.

Yemende inqilabchilar prézidént memet salihning texttin chüshüshini, misirda inqilabchilar hösni mubarekning texttin chüshüshini telep qilishti.

Béziler, tunista partlighan yasimen'gül inqilabini, yemende partlighan hepirenggül inqilabini, misirda partlighan aqchaygül inqilabini, marakesh, i'ordaniyide partlighan namazshamgül inqilabini "medeniyetler toqunushi" mawzuluq kitabta körsitilgendek, "4-qétimliq démokratiye dolquni "yitip keldi déyishse, yene béziler, bu inqilablarning xantingtün otturigha qoyghan "démokratiye dolquni" bilen héchqandaq alaqisi yoq, bu inqilablarni yaxshisi "bir qacha qordaq" üchün kötürülgen inqilab déginimiz tüzük déyishti.