Хитай коммунистлири хитабнамиси

Ву баңго, көп партийилик түзүм билән шуғулланмаймиз, идийиви пикирләрни көп мәнбәләштүрүш билән шуғулланмаймиз, үч һоқуқни айриветиш билән шуғулланмаймиз, парламент түзүмини йолға қоймаймиз, җуңгони федиратсийәләштүрмәймиз, җуңгониң иқтисади қурулмисини хусусилаштурмаймиз” деди.

Хитайниң сиясий түзүми марксизмлиқ сиясий түзүмму яки хитайниң турмуш әнәнисидин кәлгәнму? хитайниң сиясий әнәниси феодал һакимийәтчилик, аиливи һакимийәтчилик болғандиму, бу хил әнәнә хитайларға моңғулларниң дөләт башқуруш әнәнисидин, манҗуларниң дөләт башқуруш әнәнисидин қалған әнәнә иди. Хитайда дөләт башқурушниң марксизмға тәәллуқ һечқандақ аламәтлири йоқ иди.

Маркис “коммунистлар хитабнамиси” дә, коммунистик инқилаб-өтмүштин мирас болуп қалған мүлки мунасивәтләр билән алақини үзүл- кесил үзүш дегән сөздур, коммунистик инқилабниң өз тәрәққияти давамида конидин мирас болуп қалған идийиләр билән алақини үзүл-кесил үзүши әҗәблинәрлик бир нәрсә әмәс” дәп көрсәткән. Ундақта хитай коммунистлири феодал һакимийәтчилик, аиливи һакимийәтчилик билән дөләт башқуруш әнәнисидин немә үчүн ваз кәчмәйду? еғизда марксизм әмәлийәттә дарвинизм, көп партийилик сиясий түзүмни рәт қилиш, идийиви пикирләрниң көп мәнбәлик болушини рәт қилиш- иҗтимаий дарвинизм болмай йәнә немә? феодал һакимийәтчилик болмай йәнә немә?

Марксизм 19-әсир явропа җәмийитиниң мәһсули иди. Адәмгәрчилик мәнбәлик шәхсийәтчилик; романтик милләтчилик, 19-әсирниң икки чоң сиясий хаһиши иди.

Бирақ, бу икки хил сиясий һәрикәт иҗтимаий, сиясий, миллий мәсилиләрни зораванлиқ билән һәл қилишқа ишәнгәнликтин, ақивәттә икки хил сиясий еқим тәрәққий қилип коммунизм вә фашизмға раваҗланди. Фашизм германийидә оттуриға чиқти, коммунизм русийидә оттуриға чиқти. Марксизм явропадин асияға -хитайға йөткәлгәндә, коммунизмму, фашизмму хитай туприқида йәрләшти вә хитай коммунистлири хитай империйисини қуруп чиқти. Шуңа ву баңго адәмләрдә һазирқи заман идийилириниң пәйда болушиға чәк қоюп, “идийиви пикирләрни көп мәнбәләштүрүш билән шуғулланмаймиз” деди.

Һазир дуняниң вәзийитини бәлгилигән, әрәб әллиридин башланған мустәбит түзүмдин демократик түзүмгә көчүш, демократик ойғиниш, демократик ясимән һәрикити вә демократик чақириқ хитайға йитип кәлгәндә, хитай коммунистлири хәлқ вәкилләр қурултийиниң башлиқи ву баңгониң еғзи арқилиқ, маркис билән инглизниң “коммунистлар хитабнамиси”ға қарши,“хитай коммунистлири хитабнамиси”ни елан қилди. Марксизм- ленинизмни еғиздин чүшүрмәй, әмәлийәттә маркисизм-ленинизмға қарши һәрикәт қилиш, пәқәт хитай коммунистлириниң қолидин келидиған йүзсизлик вә номуссизлиқниң аламәтлиридур.

Ву баңго йәнә: “хәлқ вәкилләр қурултийи қанун түзгәндә, партийиниң рәһбәрликидә чиң туруш лазим. Шундақ қилғанда коммунистик партийиниң тәшәббуси (сиясәтлири) қанун тәртиплири арқилиқ дөләтниң ирадисигә айлинип, бир гәвдиләшкән җәмийәт әмәл қилидиған һәрикәт қаидилири вә принсиплириға айлиниду” деди.

Ундақ болғанда, хитайда қанун бир партийиниң ирадиси боламду, хәлқниң ирадиси болмамду, ундақта, партийә демәк-қанун, қанун демәк-партийә боламду. Бундақ әһвалда, бундақ түзүлгән қанунға хитайда яшаватқан һәр қандақ пуқра қарши турушқа һоқуқлуқ!

Маркис 1843-йили 1-айда “реал обйектип мунасивәтләрни чиқиш қилғандила, андин һәрхил қанун вә кишилик һоқуқ һадисилирини чүшәндүргили болиду” дәп көрсәткән. Қарап бақайли, бүгүн марксизмни еғиздин чүшүрмәйдиған хитай коммунистлири немә қиливатиду?

Партийә демәк қанун, қанун демәк партийә дәватиду.

Ву баңго әпәнди, ялғанчилиқ, алдамчилиқ билән әмди хәлқни алдиғили болмайду. Худа һечқачан саңа хитай коммунистлар империйиси йимирилмәйду, дәп вәдә бәргән әмәс!