2012-Yili xitay üchün xeterlik yilmu?

Hélila xitayni ziyaret qilip qaytip kelgen amérika qoshma shtatliri awam palatasi xitay xizmet guruppisining ortaq re'isi charliz bostani mundaq körsetti:
 Xitayning rehberlik qatlimi iqtisadi, siyasiy, herbiy ishlar jehette endishe, sarasimige chüshüp qélip 2012-yili xitayda rehberler almishishining harpisida weziyet kontrolluqi qolimizdin chiqip kétidu, dep ensireshke bashlidi. Emeliy tekshürüshtin kéyin, bostani bayqidiki, xitay rehberlik qatlimining özige ishinishi 12-18 aydin burunqigha sélishturghanda köp derijide töwenlep ketken.

2011-Yili 6-ayning 3-küni teywen merkizi agéntliqining anglatqan xewirige asaslinip duwi tor biti mundaq körsetti: charliz bostani washin'gtonda “Bilim xezinisi-istratégiye we xelq'ara tetqiqat merkizi” uyushturghan “Amérika, xitay munasiwitining kelgüsige nezer” tetqiqat yighinida charliz ependi xitayni ziyaret qilish tesiratini otturigha qoydi.

Charliz ependining xitayning partiye, armiye rehberliri bilen söhbet ötküzgendin kéyin érishken tesirati shu boldiki, xitay rehberlirining özige ishinishi töwenlep ketken. Xitay rehberliri nurghunlighan ijtima'iy hadisiler aldida endishe, sarasime, wehime ichide qalghan.

Ular awwal kelgüside duch kélidighan mesile, iqtisadning 10% örlishi emes, belki 8 hetta 7% ge chüshüp qélishidur. Bu ehwal xitay iqtisadi tereqqiy qilghandin kéyinki tunji ehwal bolup, xitay rehberliri néme qilarini bilmey qaldi.

Uningdin bashqa shimali afriqa we ottura sherqte partlighan mustebit hakimiyetlerni aghduruwétish herikiti we amérikining bu jeryanda oynighan roli, xitay rehberlirini téximu endishige saldi. Zamaniwi axbarat wasitiliri sür'itining örlep ketkenliki, tosuwalghili bolmaydighanliqi, bu yüzlinish dawamlishiwéridighan bolsa, xitay rehberliri 2012-yili weziyet kontrolluqining qolidin chiqip kétidighan xewpidin ensireshke bashlidi.

Charliz ependi mundaq körsetti: buningdin bashqa yene xitay rehberliri éksport xaraktérlik iqtisadi tereqqiyat dewrining ötüp ketkenlikini étirap qildi. Xitay rehberliri duch kelgen intayin éghir ré'alliq shuki, éksport xaraktérlik iqtisadning yüzlinishni tertipke sélip, ichki éhtiyaj xaraktérlik yüzlinishni yolgha sélish, dölet iqtisadining muwazinet ichide tereqqiy qilishini qolgha keltürüshtin ibaret ré'alliqqa duch keldi.

Mustemlike Uyghuristanda déhqanlar tawuz satqan pul bilen ichki éhtiyajni peyda qilalishi we sétiwélish küchini yitishtürelishi mumkinmidu, xitay déhqanlirimu bashqiche emes. Yéqinda fujyenlik 6 neper déhqan béyjingda amérika elchixanisining aldida ölüwalmaqchi boldi. Mubada déhqanlarning sétiwélish küchi bolmisa xitay rehberliri ichki bazar éhtiyajini qandaq peyda qilalaydu?

18-Qurultay mesilisige kelsek, xiyanetchilik, parixorluq xitay emeldarlirining obrazi bolup qaldi. Töwendin yuqirighiche her qandaq kishining saylinishi we emeldar bolushi, nöwette xitay puqraliri üchün beribir. Bu qétim siyasiy byurogha kirish éhtimali bolghan kishiler wang yang, bö shiley, shi jinping, li kéchang qatarliq kishilermish. Bö shiley suyiqestchi, wang yang lükchek, shi jinping siyasiy qoymichi, li kéchang yaxshichaq bolidighan kishilerdur. Bularning kim bolushi xitaylar üchün beribir hésablansa, u chaghda 2012-yili xitaylar üchün heqiqeten xeterlik yil bolup qalidu.