23-Aprél musteqilliq we balilar bayrimigha Uyghurlarmu qatnashti

Bu yilqi balilar bayrimigha yawropa döletliri, ottura asiya türkiy jumhuriyetliri, ereb döletliri, yaponiye, koriye, rusiye we xitay qatarliq 40 dölettin 400 etrapida yash-ösmür qatnashti.
Ixtiyariy muxbirimiz erkin tarim
2012.04.24
Share on WhatsApp
Share on WhatsApp
mujahit-qeshqerli-bayramda-305.jpg Musteqilliq we balilar bayrimida müjahit qeshqerli shé'ir oqushqa teklip qilindi. 2012-Yili 23-aprél, türkiye.
RFA/Erkin Tarim

23-Aprél balilar bayrimi türkiyide tentenilik ötküzülmekte. Uyghurlar mezkur bayram pa'aliyitige téxiche qatniship baqmighan idi. Bügün tunji qétim 4 yashtiki mujahit qeshqerli Uyghur balilargha wakaliten türkiye dölet téléwiziyisidiki balilar bayrimi üchün hazirlan'ghan mexsus programmigha qatniship Uyghur balilirining salimini yetküzdi.

Mujahit qeshqerli 23-aprél küni etigen sa'et 7 de “Yéngi kün” namliq programmigha qatniship, Uyghur baliliri namidin pütün dunyadiki balilarning bayrimini tebriklidi we sha'ire nür'ela göktürk yazghan “Biz kim” dégen shé'irni déklamatsiye qilip berdi. Programma riyasetchisi lewetn qol ependi bilen shax xanim aldi bilen pütün dunya balilirining bayrimini tebrikligendin kéyin, mujahit qeshqerlini töwendiki sözler bilen shé'ir oqushqa teklip qildi:
“Dunyaning her teripide 23-aprél musteqilliq we balilar bayrimi tentene bilen tebrikliniwatqan bügünki künde, dunyada öz musteqilliqi we eqelliy heq-hoquqliridin ayrilip yashawatqan, peqetla bayramnila emes, belki baliliq chaghlirini ötküzelmeywatqan, zulum we bésim tüpeyli közliridin da'im yash éqiwatqan balilar bar döletler mewjut, bularning biri sherqiy türkistan. Sherqiy türkistanliq ewladimiz mujahit qeshqerli hazir ularning awazini bizge yetküzidu. U hazir sha'ire nur'ela göktürk xanim yazghan “Biz kim?” dégen shé'irini déklamatsiye qilish arqiliq sherqiy türkistanliq balilarning derd -elemlirini biz bilen ortaqlishidu” dédi. 4 Yashliq Uyghur balisi mujahit qeshqerli shé'irini bashlidi.

Türkiye parlaménti, 1921-yili 23-aprél künini milliy bayram, dep élan qilghan. 1927-Yiligha kelgende 23-aprél künini milliy musteqilliq we balilar bayrimi qilip békitken. 1979-Yilighiche bolghan ariliqta peqetla türkiye boyiche tebriklen'gen bu bayram, 1979-yilidin kéyin xelq'araliq balilar bayrimi süpitide tebriklenmekte. Bu yil 40 dölettin kelgen balilar bayram pa'aliyitige qatnashqan bolup, bu yilqi bu bayramning sho'ari “Urush-jédelsiz tinch bir dunya berpa qilish” dep atalghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.