Сәуди әрәбистанда 11 шаһзадә чириклик гумани билән тутқун қилинди

Мухбиримиз үмидвар
2017-11-05
Share

Сәуди әрәбистанниң йеқинқи мәзгилләрдики бир қетимлиқ көлими чоң чирикликкә зәрбә бериш һәрикити башлинип, бирақла 11 шаһзадә, төт вәзипә өтәватқан министир вә онлиған сабиқ министирлар чириклик қилмишлири гумани билән тутқун қилинған.

Б б с агентлиқиниң хәвәр қилишичә, сәуди әрәбистан падишаһлиқи мәхсус чирикликкә қарши күрәш қилиш комитети тәсис қилған болуп, мәзкур комитет қурулуп ишқа киришиши билән тәңла 11 шаһзадини өз ичигә алған бир қисим вәзипә өтәватқан вә сабиқ министирларни тутқун қилған. Әмма һазирчә бу тутқун қилинған шаһзадиләр вә башқиларниң исимлири елан қилинмиған. Мәзкур комитет йәнә 2009-йили җиддә шәһиридә йүз бәргән 10 адәмниң җениға замин болған су апити вә 2012-йили тарқалған оттура шәрқ нәпәс йоллири кесәллик вируси мәсилиси қатарлиқлар үстидин тәкшүрүшни күчәйтидиғанлиқини билдүргән. 

Мәзкур комитетниң башлиқлиқиға тәхт вариси қилип бекитилгән шаһзадә муһәммәд бин салман тәйинләнгән болуп, униңға қолға елиш, саяһәт чәклимиси қоюш, банка һесабини тәкшүрүш вә тоңлитиш һоқуқи берилгән. Сәуди падишаһи салман шәнбә күни болса йәнә сәуди миллий муһапизәт армийиси вә деңиз армийә қоманданлирини алмаштурған болуп, бу һәқтә һечқандақ изаһат берилмигән вә охшаш вақитта чирикликкә қарши туруш комитетиму ишқа киришкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт