Уйғур әмәлдарларниң 3 хил күчләргә қарши баянати чақириқнамидин вәдинамә шәклигә қарап өзгәрмәктә

Мухбиримиз шөһрәт һошур
2017-08-21
Share

Уйғур районида керийәлик йеза башлиқи обулқасим мәттурсун билән башланған үч хил күчләргә қарита очуқ хәтләр илгирики чақириқнамә шәклидин вәдинамә шәклигә қарап өзгәрмәктә.

Мәлум болушичә, обулқасим вә униңдин кейинки әгәшкүчиләр, хитай дөлитиниң аталмиш әвзәлликлиригә апирин оқуш билән бирликтә уйғур хәлқини хитай һакимийитигә шәртсиз бойсунушқа чақириқ қилип кәлгән иди. Бүгүн хитайниң тәңритағ тори вә шинҗаң гезитидики очуқ хәтләрдә, тәйинләнгән әмәлдарлар өзлириниң буниңдин кейин үч хил күчләргә қандақ қарши туридиғанлиқи һәққидә вәдә бәргән.

Қарамай шәһәрлик партком даимий комитетиниң әзаси абликим езиз "дөләт хәвпсизлики, иҗтимаий муқимлиқ вә милләтләр иттипақлиқиға зиян йәткүзидиған барлиқ сөз-һәрикәтләрниң мәйли қандақ шәкилдә ниқаблинивелиши, қандақ байрақни көтүрүвелишидин қәтийнәзәр, көзүмни йоған ечип, уни қәтий паш қилимән, униңға қәтий қарши туримән, уни қәтий тосимән" дегән болса, хитай мәмликәтлик сиясий кеңәш даимий комитетиниң әзаси, аптоном районлуқ әвладларға көңүл бөлүш хизмити комитетиниң муавин мудири җүрәт мәмтимин: "икки йүзлимиликкә қарши қәтий күрәш қилип, уларға һәр қандақ мәвҗутлуқ бошлуқи вә яшаш туприқи қалдурмай, вәтәнниң бирликини қоғдаш үчүн әмәлий һәрикитим билән төһпә қошимән" дәп вәдә бәргән.

Муһаҗирәттики уйғур көзәткүчиләр, бу өзгиришкә асасән, уйғур әмәлдарларниң очуқ хәт йезишқа барғансери қаттиқ зорлиниватқанлиқини илгири сүрүшмәктә вә бу вәдинамиләрни хитай даирилириниң уйғур әмәлдарларға қарита ишәнчисиниң пүтүнләй дегүдәк йоқлуқиниң испати дәп қарашмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт