Jon molénar:“Besh türlük xitay tehditige sel qarashqa bolmaydu!”

Yéqinda amérika dölet mejlisi ezasi jon molénar xitay kompartiyesidin kéliwatqan tehditlerning dawamliq küchiyiwatqanliqini, shunga amérika bilen xitay kompartiyesi otturisidiki riqabette amérikining qet'iy boshiship qalmasliqi lazimliqini ilgiri sürgen.

Amérika-xitay istratégiyelik riqabet pewqul'adde komitétining yéngi re'isi, jumhuriyetchiler partiyesining ezasi jon molénar (John Moolenaar)  2024-yili 4-ayning 29-küni “Fokés xewerliri”  (FOX News) de élan qilin'ghan “Amérikining sel qarashqa bolmaydighan besh türlük xitay tehditi” namliq mulahize maqaliside mushu sahediki mesililerni nuqtiliq sherhlidi.

U maqaliside xitayning bazarni kontrol qilip amérika sana'itige ziyan séliwatqanliqini alahide tilgha élip “Biz duch kéliwatqan xewp-xeter ashu qeder küchiyiwatqanda démokratchilar we jumhuriyetchilerning bu shumluqqa birlikte taqabil turushi bekmu muhim” dep körsetti.

U maqaliside amérika duch kéliwatqan besh türlük xitay tehditini sanap ötidu. Bular amérika bilen ittipaqdash boluwatqanlarni, jümlidin teywenni xitayning herbiy ishghaliyitidin qoghdap qélish, xitay kompartiyesining amérika tewesige féntanilni tökme qiliwétishige chek qoyush, xitay kompartiyesining dunya iqtisadidiki liti bataréyesi qatarliq achquchluq sahelerge hökümran boluwélishining aldini élish, amérika teweside xitay kompartiyesining tesirini kéngeytish shumluqini tosush, xitay kompartiyesining teshwiqat urushigha qarshi turush qatarliqlar bolup, bularning hemmisi amérika duch kéliwatqan eng jiddiy mesililer hésablinidu.