Бир уйғур яш лагердики аилә әзалиридин тапшурувалған хәтни ашкариливәткәнликтин тутқун қилинған

Мухбиримиз сада
2019-08-14
Елхәт
Пикир
Share
Принт

Турпанда саяһәт йетәкчиси хизмити билән шуғуллинидиған уйғур яш абдурахман мәмәт лагердики ата-аниси вә инисидин тапшурувалған хәтниң мәзмунини ашкариливәткәнликтин тутқун қилинған.

«Муһапизәтчи» гезитиниң 13-авғусттики санида елан қилинған бу һәқтики хәвәрдә дейилишичә, абдурахман мәмәтниң ата-аниси вә иниси нөвәттә уйғур дияридики мәлум бир тутуп туруш лагериға қамалған. Улар өткән йили абдурахман мәмәткә айрим-айрим хәт әвәтип, өзлириниң лагерда наһайити яхши турмуш кәчүрүватқанлиқини, өзлириниң һәҗгә берип хитай қануниға еғир хилаплиқ қилғанлиқини, һалбуки хитай һөкүмитиниң уларға җаза һөкүм қилишниң орниға уларни толуқ әслиһәләнгән бир «кәспий техника тәрбийә мәктипи» гә «тәрбийәлинишкә» әвәтилгәнликини баян қилған.


Абдурахман мәмәт хәтни тапшурувалғандин кейин, бу йил июлда уни инглиз тилиға тәрҗимә қилип, нөвәттә уйғур тили тәтқиқати билән шуғуллиниватқан америкалиқ тәтқиқатчи җени бонн қурған «шаһит биз» ториға йоллиған. Шуниң билән бу хәт торда әң тез сүрәттә тарқалған. Нәтиҗидә қисқиғичә бир һәптә ичидила абдурахман мәмәт йоқап кәткән.

«Муһапизәтчи» гезитиниң хәвиридә дейилишичә, абдурахман мәмәт шу хәтни чәтәлдә яшайдиған туғқини муһәррәм муһәммәд елигә лагерларниң һәқиқий әпти-бәширисини испатлайдиған пакит сүпитидә әвәтип бәргән. Муһәммәд елиниң билдүрүшичә, хәт «шаһит биз» тори арқилиқ ашкарилинип икки күндин кейин сақчилар абдурахман мәмәт билән алақилишип, бу хәтни йәнә кимләр билән ортақлашқанлиқини сориған. Июл ейиниң ахириға кәлгәндә муһәррәм муһәммәд ели сүрүштүрүш арқилиқ тағисиниң турпанда тутқун қилинғанлиқидин хәвәр тапқан.

Мәзкур хәвәрдин мәлум болушичә, «муһапизәтчи» гезити абдурахман мәмәтниң әһвали һәққидә турпандики йәрлик сақчи даирилири билән алақиләшкән болсиму, улардин һечқандақ инкас болмиған.

Пикирләр (0)
Share
Толуқ бәт