Türkiyediki jama'et erbabi abduqadir yapchan shertlik qoyup bérildi

Ikki yérim yildin béri türkiye amanliq da'iriliri teripidin nazaret astida tutup turuluwatqan ataqliq jama'et erbabi abduqadir yapchan 3‏-may küni türkiye edliye tarmaqliri teripidin shertlik qoyup bérilgen. Abduqadir yapchan buningdin 2 yérim yil awwal xitay elchixanisining “Térrorluqqa chétishliq” dep erz qilishi bilen nezerbend astigha élin'ghan. U türkiyening bulghariye chégrasidiki edirne köchmenlerni tutup turush merkizide tutup turuluwatqan idi. Abduqadir yapqan bu 2 yérim yil jeryanida az dégende 3 qétim sot mehkimisige chiqirilghan. Birinchi qétimliq sotta u gunahsiz, dep élan qilin'ghan bolsimu, lékin da'iriler uni qoyup bérishni izchil arqigha sürüp kelgen. Türkiyediki “Sherqiy türkistan” teshkilatlirining ilgiri sürüshiche, uning 2 yérim yildin béri izchil tutup turulushi peqet siyasiy qarar bolup, xitayning bésimi bilen munasiwetlik iken.

Türkiyediki “Eynek tori” ning xewiride ashkarilinishiche, istanbuldiki bir sot mehkimisi 3‏-may küni uning shertlik qoyup bérilishini qarar qilip, uning sotini 9‏-aygha kéchiktürgen. Sotning qararida, uning shuningghiche istanbulning safaköy rayonidiki mehellisi etrapida heriket qilsa bolidighan, emma uning sirtigha chiqsa bolmaydighanliqi belgilen'gen. Abduqadir yapqan 3-may küni sot mehkimisining aldida ötküzülgen axbarat yighinida söz qilip, xitayning uninggha artqan “Jinayetliri” ni ret qilghan. U “Heqiqetke küch we qoralning ishlimeydighanliqi. . . . . . . . . Heqqaniyetning hamini ghelibe qilidighanliqi” ni bildürgen.