Кишилик һоқуқ адвокати җу шифең ағдурмичилиқ җинайити билән 7 йиллиқ қамақ җазасиға учриди

Ройтерсниң хәвәр қилишичә, хитай кишилик һоқуқ адвокати җу шифең "һакимийәтни ағдурушқа урунуш җинайити" билән 7 йиллиқ қамақ җазасиға һөкүм қилинған. Бу йил 51 яшқа киргән җу шифең бейҗиңдики "феңруй адвокатлиқ шеркити"ниң дериктори болуп, у өткән йили хитай һөкүмити тәрипидин тутқун қилинған 300 дин артуқ кишилик һоқуқ адвокатлириниң ичидики бири иди.

Хитайниң шинхуа агентлиқи бу һәқтики хәвиридә җу шифеңниң хитайға қарши күчләрниң тәсиригә учрап, делоларни көптүрүп тәшвиқ қилғанлиқини, интернет торида вә сиртта "һөкүмәтни ағдуруш" тоғрилиқ сөз қилғанлиқини илгири сүргән.

Җу шифеңниң адвокатлиқ шеркити нурғун муһим делоларни, җүмлидин уйғур зиялийси илһам тохтиниң делосиниму үстигә алған иди. Хәвәрдин мәлум болушичә, даириләр җу шифеңни "наразилиқ намайишлирини тәшкилләп, делоларни сиясийлаштурған вә хәлқара җамаәт пикри топлашқа урунған" дәп әйиблигән. Мәлум болушичә, җу шифең өзиниң юқири сотқа әрз сунмайдиғанлиқини ейтқан.

Хитай һөкүмити техи алдинқи күнила җу шифеңниң адвокатлиқ шеркитидә ишләйдиған вә йәнә шу өткән йили тутқун қилинған адвокатлардин бири болған ваң йүниң телевизийидә аталмиш иқрарнамисии елан қилип, униң чәтәлләрдики хитайға қарши күчләрниң алдам халтисиға чүшүп кәткәнликини илгири сүргән, шундақла йәнә, адвокат җәй йәнменни ағдурмичилиқ қилишқа урунуш җинайити билән 3 йиллиқ қамақ җазасиға һөкүм қилған иди. юқиридики вәқәләр кишилик һоқуқ органлириниң күчлүк тәнқидигә учримақта. Хәлқара кәчүрүм тәшкилати бу һәқтики баянатида, бу сотларни сахта, дәп тәнқид қилған.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар