Xitay hökümiti Uyghur élida ottura asiyani öz ichige alghan aliy ma'arip yadroluq rayoni berpa qilishqa küchimektiken

Xitay da'iriliri özining “Bir belwagh,bir yol” istratégiyeside Uyghur élidiki uniwérsitétlarning xitay tili kespige zor meblegh sélip, ottura asiya elliridin türkümlep oqughuchi qobul qilishqa bashlighan.

Shinxwa torining bügünki xewirige qarighanda, xitay da'iriliri Uyghur élida ürümchini baza qilghan ottura asiya aliy ma'arip yadroluq rayoni qurup chiqidighanliqini bildürgen.

Xewerde déyilishiche, yéqinqi birqanche yildin buyan xitay hökümiti ottura asiya elliridin Uyghur élidiki aliy mekteplerge oqushqa kélidighan oqughuchilargha mexsus hökümet oqush mukapat puli tesis qilghan.

Shinjang uniwérsitéti, shinjang pédagogika uniwérsitéti, shinjang maliye-iqtisad uniwérsitéti qatarliq aliy mekteplerde xitay tili kespi boyiche oquydighan ottura asiyaliq oqughuchilar 4 yilliq heqsiz oqush, heqsiz yataq we ayda 3000 somdin turmush puli bilen teminlenmektiken.

Xewerde yene, xitayning oqush mukapat puli bilen ürümchide aliy mektepni tamamlighan ottura asiyaliq oqughuchilarning öz dölitige qaytip, xitayning qirghizistan, tajikistan, özbékistan qatarliq ellerdiki chégra halqighan chong tiptiki shirketliride ishqa orunlishiwatqanliqi ilgiri sürülgen.

Uyghur aptonom rayonluq ma'arip nazaritining ilgiri sürüshiche, rusiye, pakistan we asasliqi ottura asiya döletliride jem'iy 10 orunda kungzi instituti tesis qilin'ghan iken. Nöwette Uyghur élidiki aliy mekteplerde ottura asiya elliridin kelgen 20 ming oqughuchi oqumaqtiken.

Közetküchiler, bu, xitayning atalmish “Qosh tilliq ma'arip” wiwiskisi bilen Uyghur ma'aripini xitaylashturush pilanini deslepki qedemde yolgha qoyup bolghandin kéyin, ikkinchi qedimini ottura asiya döletlirige qaritiwatqanliqining bir ipadisi, dep qarimaqta.