Amérika pakistan'gha bérilidighan bixeterlik yardimini toxtatti

Amérika hökümiti aldinqi küni bayanat élan qilip, pakistanning talibanlargha qarshi keskin heriket élip barmighanliqini, shu wejidin pakistan'gha bérilidighan 250 milyon dollar bixeterlik yardimini toxtatqanliqini élan qildi.

Amérika dölet ishliri ministirliqining bayanatchisi héyzér néyurt peyshenbe künidiki axbarat élan qilish yighinida qilghan sözide, gerche amérika terep pakistan hökümiti bilen yuqiri derijilikler söhbiti élip barghan bolsimu, lékin “Talibanlar we heqqaniy guruhi dawamliq türde pakistan'gha yoshurunup, afghanistan'gha buzghunchiliq qilish, amérika we uning ittipaqdashlirigha hujum qilish herikiti bilen shughullinip keldi,” dégen.

Héyzér nyurtning tekitlishiche, pakistan yuqiriqi guruhlargha qarshi “Keskin heriket” qollanmighiche, amérika hökümiti pakistan'gha bérilidighan bixeterlik yardimini toxtitip turidiken.

Igilinishiche, amérikining pakistan'gha béridighan bixeterlik yardimini toxtitishi del amérikining pakistanni 2018‏-yilliq “Diniy erkinlik weziyiti alahide közitilidighan eller tizimlikidiki dölet”, dep jakarlighan oxshash bir künde yüz berdi.

Amérika dölet ishliri ministirliqi aldinqi küni élan qilghan tizimlikke xitaynimu kirgüzgen idi.

Amérika hökümiti pakistan'gha bérilidighan 250 milyon dollar yardemni toxtitishtin bir qanche kün awwal prézidént donald tramp amérikining pakistan'gha yéqinqi 15 yil ichide 33 milyard dollar yardem bergen bolsimu, lékin amérikining héchnémige érishelmigenlikini bildürgen. U, pakistanni “Yalghanchiliq we saxtipezlik” bilen eyiblep, pakistanning afghanistandiki térrorchilarni makan bilen teminlewatqanliqini tekitligen idi.

Lékin chet'el axbarat wasitilirining qeyt qilishiche, bezi közetküchiler “Amérikining herikiti pakistanni xitaygha téximu yéqinlashturuwétishi mumkin,” dep körsetken. Közetküchilerning ilgiri sürüshiche, pakistan bir tereptin “Afghanistandiki térrorchilargha yan tayaq bolup”, yene bir tereptin, xitay bilen “Sherqiy türkistan islam herikiti” ge qarshi zich hemkarliship kelgen.