Америка қорал сетивелиш вә тәтқиқ қилиш хамчотини ашурмақчи икән

Хитайниң күнсери күчийиватқан һәрбий тәһдитигә тақабил туруш  вә украинаға ярдәм беришни давамлаштуруш үчүн америка һөкүмити америка дөләт мудапийәсигә аҗритидиған хамчотини өстүрмәкчи болған.

“бломберг хәвәрлири” ториниң хәвәр беришичә, америка президенти җов байден 3-айниң 9-күни американиң тинчлиқ дәвридики әң көп һәрбий хамчотини елан қилидикән. Бу хамчотниң ичидә 170 милярд доллар қорал сетивелишқа, 145 милярд доллар һәрбий қорал тәтқиқатиға ишлитилидикән.

Хәвәрдә ейтилишичә, украинаға қорал тошуватқан американиң һәрбий хираҗити ешип кәткән, шундақтиму америка зелинискиға ярдәм қилип русийәни украинадин қоғлап чиқириш үчүн айрим мәбләғ аҗратқан. Йеңидин елан қилинидиған хамчот болса асасән хитайниң һәрбий тәһдитигә тақабил турушқа ишлитилидикән.

Америка дөләт мудапийә министирлики америкадики һәрбий санаәт карханилиридин сетивалидиған һәмдә иқтидарини ашурушқа мәбләғ салидиған қораллар асасән йеңи типтики F-35 күрәшчи айропилани, қитәләр ара һуҗум қилидиған башқурулидиған бомба, хитайниң йошурун һуҗумиға тақабил турушқа керәклик йирақ мусапилиқ бомба қатарлиқларни өз ичигә алидикән.