Shi jinping amérikaning dölet xewpsizlik meslihetchisi jeyk sulliwan bilen uchrashqan

Amérikaning dölet xewpsizlik meslihetchisi jeyk sulliwan (Jake Sullivan) 27-awghust küni xitaygha yétip bérip, xitay tashqi ishlar ministiri wang yi bilen ikki terep otturisidiki riqabetni toghra idare qilishni meqset qilghan uchrishishini bashliwetken idi.

Melum bolushiche, bu ziyaret jeryanida xitay kompartiyesining bash sékrétari shi jinping jeyk sulliwanni tuyuqsiz kütüwélip, uning bilen biwasite sözleshken. Xitay taratqulirining bu heqtiki xewiride déyilishiche, shi jinpingning jeyk sulliwanni xelq sariyida kütüwalghanliqi hemde uninggha “Amérikaning xitayning tereqqiyatini ijabiy halette körüshini ümid qilidighanliqini we ikki chong döletning öz'ara masliship, hemkarlashqan asasta toghra yol tépishini ümid qilidighanliqi” ni éytqan.

Xitay xewerlirige qarighanda, shi jinping sulliwan'gha mundaq dégen: “Xitay we amérika ikki chong dölet bolush süpiti bilen tarix, xelq we dunyagha mes'uliyetchan bolushi, dunyaning tinchliqi üchün muqimliqning menbesi we ortaq tereqqiyatning heriketlendürgüch küchi bolushi kérek”.

Aqsarayning bu uchrishish heqqide tarqatqan yazma bayanatida, jeyk sulliwanning shi jinping bilen bolghan uchrishishida ikki terepning xewpsizlik söhbitini eslige keltürüshi mesilisidin sirt yene, rusiyening ukra'inagha qaratqan tajawuzchiliq urushi, jenubiy déngiz mesilisi, ikki terep arisida herbiy alaqini saqlap qélish we sün'iy eqil bixeterliki qatarliq mesililer üstidimu söhbetleshkenlikini bildürgen.

29-Awghust küni sulliwan yene, xitay merkizi herbiy komitétining mu'awin re'isi général jang yoshiya bilenmu körüshkenliki melum. Jeyk solliwan sözide, her ikki terepning aridiki riqabetning toqunush yaki urushqa aylinip kétishining aldini élish mejburiyiti barliqini tekitligen, shundaqla bu yighinlarning ehmiyetlik bolghanliqini bildürgen.

“Muhapizetchi” gézitining déyishiche, wang yi bilen jeyk sulliwan ikki terep söhbitide amérika pirézidénti jow baydin bilen shi jinping otturisida bir meydan téléfon söhbiti orunlashturushqa kélishken bolsimu, emma uning waqti téxi éniq békitilmigen iken.