Хәлқара диний әркинликни илгири сүрүш йиғини баянат елан қилип, хитайни уйғур районидики лагерларни тақаш вә тутқунларни қоюп беришкә чақирди

Мухбиримиз шөһрәт һошур
2018-07-27
Елхәт
Пикир
Share
Принт

Америкида дөләт ишлири министирлиқиниң уюштуруши билән ечилған хәлқара диний әркинликини илгири сүрүш йиғини 27-июл күни йиғин ахирида хуласә баянати елан қилип, хитай һөкүмитини уйғур районида қурған йиғивелиш лагерлирини дәрһал тақаш вә тутқунларни қоюп беришкә чақирди. Дуняниң һәрқайси җайлиридики аммиви тәшкилат вәкиллири, диний рәһбәрләр вә бир қисим дөләт ташқи ишлар министирлириниң қатнишиши билән ечилған бу йиғинниң баянатида алди билән йиғин әһлиниң хитайда яшаватқан уйғур, қазақ, туңган мусулманлири, тибәт буддистлири, католиклар, протестантлар вә фалунгоңчиларниң учраватқан диний бесим һәм чәклимиләрдин әндишә қиливатқанлиқи билдүрүлгән; андин болупму уйғур районида йүз бәргән диний паалийәтләрниң чәклиниши, мәсчитләрниң чеқилиши, чәтәлдики уйғурларниң мәҗбури қайтуруп әкитилиши, униң үстигә нәччә йүз миңлиған вә бәлки милйонлиған кишиниң сиясий тәрбийә лагериға солиниши вә лагерлардин өлүм хәвәрлириниң чиқиватқанлиқи қатарлиқ вәқәләрдин қаттиқ қайғуруватқанлиқи билдүрүлгән. Йиғин әһли баянатида хәлқара җамаәткә вакалитән хитайни диний әркинлик җәһәттә хәлқара әһдинамиләр бойичә бәргән вәдисигә әмәл қилишқа вә уйғур районидики йиғивелиш лагерлирини дәрһал тақашқа чақирған. Америка дөләт ишлири министирлиқиниң тор бетидә елан қилинған бу баянатқа америкидин башқа, канада, косово вә әнгилийәму имза қойған.

Пикирләр (0)
Share
Толуқ бәт