Майк помпейо һиндонезийәни уйғурлар учраватқан зулумға қарши турушқа чақирди

Америка ташқи ишлар министири майк помпейо һиндонезийәдә уйғурлар үчүн сөзлиди. У һиндонезийәгә қилған рәсмий зиярити мәзгилидә һиндонезийәликләрни хитай һөкүмитиниң уйғурларға қиливатқан муамилисигә қарши турушқа чақирған.

“вал-стрит журнили” гезитиниң хәвәр қилишичә, помпейо бу сөзләрни 29-өктәбир күни шәрқий-җәнубий асия дөлити болған һиндонезийәдики бир мусулман яшлар тәшкилатида нутуқ сөзлигәндә қилған. У мундақ дегән: “мән хитай компартийәсиниң һиндонезийәликләрни мусулман қериндашлири учраватқан зулум билән кари болмаслиққа чақирғанлиқини билимән, уларниң силәргә уйғурларниң қалтис хушал яшаватқанлиқини тәшвиқ қилғанлиқиниму билимән. . . Әмма мушундақ муназириләрни аңлиғиниңизда пакитни пәқәт қәлбиңиздин издәң. Пакитқа қараң, лагердин қутулуп чиққанларниң кәчмишлири вә уларниң аилә-тавабиатлириға йүз бәргәнләрни аңлаң.”

Майк помпейо сөзидә йәнә мундақ дегән: “биз рамазанда уйғур мусулманлирини чошқа гөши йейишкә мәҗбурлашниң вә уларниң қәбристанлиқлирини вәйран қилишниң террорлуққа қарши туруш билән алақиси йоқлуқини билимиз.”

Һиндонезийә мусулман нопуси көп санлиқни игиләйдиған дөләт болуп, бу дөләттики аммиви тәшкилатлар илгири уйғурлар үчүн һәрикәтләнгән, бирақ хитай һөкүмити өткән йили һиндонезийә өлималар кеңишигә тәвә наһдлатул улималири вә муһәммәдийә мәзһипиниң диний рәһбәрлирини тәшкилләп. Хитайдики лагерларни зиярәт қилдурғандин кейин, уларниң мәйданида өзгириш болған. Улар һәтта ғәрб мәтбуатлирини “хата мәлумат бәргән” дәп әйииблгән иди. Һиндонезийә һөкүмәт даирилири болса уйғур елидики лагерлар мәсилисидә ипадә билдүрмигән.

Һиндонезийә ташқийи ишлар министирлиқиниң баянатчиси теку файзася помпейо әпәндиниң баянлиридин кейин мухбирларниң бу һәқтики соалиға дуч кәлгән. У буниңға: “һиндонезийә шинҗаңдики мусулманларни өз ичигә алған аз санлиқ милләтләрниң һоқуқини қоғдаш вә илгири сүрүшниң муһимлиқини илгири хитайға әскәрткәнлики” ни билдүргән. У йәнә: “һиндонезийә хитайни очуқ-ашкара болушқа вә шинҗаңға әркин берип келишкә йол қоюшқа чақириду. Һиндонезийәликләр у йәрдики өзгиришләрни көзитиш вә чүшинишни халайду,” дегән.