ئامېرىكالىقلارنىڭ خىتايغا بولغان كۆز قارىشى ناچارلاپ، تارىختىكى ئەڭ تۆۋەن چەككە چۈشۈپ قالغان

«چىكاگو كېڭىشى» ناملىق تەتقىقات مەركىزى تەرىپىدىن بۇ يىل 6-7-ئايلاردا ئېلىپ بېرىلغان راي سىناش نەتىجىسىگە قارىغاندا، كۆپ ساندىكى ئامېرىكالىقلارنىڭ خىتاي ھەققىدىكى كۆز قارىشى ناچارلىشىپ، تارىختىكى ئەڭ تۆۋەن چەككە چۈشۈپ قالغان. مەزكۇر راي سىناش نەتىجىسى 24-ئۆكتەبىر كۈنى ئېلان قىلىنغان.

مەلۇم بولۇشىچە، بۇ ئورۇن راي سىناشقا قاتناشقان ئامېرىكالىقلاردىن خىتاي ھەققىدىكى كۆز قارىشىغا 0-دىن 100 گىچە نومۇر قويۇشنى تەلەپ قىلغان بولۇپ، نەتىجىدە ئۇلارنىڭ بەرگەن نومۇرى ئوتتۇرا ھېساب بىلەن 26 نومۇر بولغان. بۇ نومۇر «چىكاگو كېڭىشى» 1978-يىلىدىن باشلاپ ئېلىپ بېرىۋاتقان راي سىناش نەتىجىلىرى ئىچىدىكى ئەڭ تۆۋەن نەتىجە بولۇپ ھېسابلىنىدىكەن.

«ۋاشىنگتون پوچتىسى» گېزىتىنىڭ خەۋىرىدىن قارىغاندا، ئامېرىكادا خىتايغا بولغان ئىشەنمەسلىك دولقۇنى ترامپ ھۆكۈمىتىنىڭ سودا ئۇرۇشى مەزگىلىدە كۈچىيىپ، كوۋىد-19 ۋىرۇسى مەزگىلىدە ئۆرلىگەن. بۇ دولقۇن يېقىنقى ئىككى يىلدىن بۇيان ئىككى دۆلەتنىڭ دۇنيا سەھنىسىدىكى جۇغراپىيەلىك ۋە سىياسىي مەسىلىلەردىكى تىركىشىشلىرى بىلەن تېخىمۇ يۇقىرى پەللىگە يەتكەن.