Aqsuning shayar nahiyeside 6.1 Bal yer tewrigen

Muxbirimiz erkin
2023.01.30

Aqsu wilayitining shayar nahiyesi teweside 30-yanwar küni etigen sa'et 7 din 49 minut ötkende 6.1 Bal yer tewrigen. Xitay taratqulirining xewer qilishiche, tewresh merkizi shayar nahiye baziridin 141 kilométir yiraqliqta iken. Xitay yer tewreshni ölchesh merkizi yer tewreshni 6.1 Bal, dep élan qilghan bolsimu, lékin amérika gé'ologiyelik tekshürüsh merkizi tewresh küchining 5.7 Bal ikenlikini bildürgen. “Xitay xewerliri tori” ning bergen xewiride, yer tewresh merkizi shayar nahiyesining adem shalang bolghan rayonida meydan'gha kelgenliki, tewresh merkizining 20 kilométir da'irisi ichide nupusning intayin shalang jaylashqanliqini, nöwette yerlik ot öchürüsh we qutquzush tarmaqlirining seperwer qilin'ghanliqini éytqan.

Xewerlerde éytilishiche, yer tewresh etraptiki nahiye, sheherlerde küchlük rewishte hés qilin'ghan bolsimu, lékin hazirghiche adem zeximilinish we ölüm-yitim yüz bergenlikige da'ir héchqandaq melumat yoq iken. Xitay hökümiti rayonda yüz bergen ijtima'iy, siyasiy weqelerge a'it uchurlarni qattiq kontrol qilipla qalmay, belki yuqum we tebi'iy apetke da'ir uchurlarnimu qattiq kontrol qilip kelgen. Shunga xitayning rayondiki hökümet taratqulirida yer tewreshning konkirét tepsilati, puqralarning tesirge uchrash ehwali, ahalisi shalang jaylashqan bolsimu, lékin yer tewresh merkizi da'irisi ichidiki puqralarning teqdiri qatarliq mesililer heqqide héchqandak uchur bérilmigen.

Chet ellerdiki ‍uyghur kishilik hoquq teshklilatlirining qeyt qilishiche, xitayning 2017-yili bashlan'ghan chong tutqunidin kéyin rayonda yüz bergen tebi'iy apetke da'ir uchurlargha érishishmu qiyinlashqan.

“Xitay xewerliri tori” ning xewiride, yer tewresh merkizining aral shehirige téximu yéqin ikenliki, uning aral shehirige 105 kilométir, aqsu shehirige 215 kilométir, ürümchige 611 kilométir kélidighanliqini bildürgen. Xewerde éytilishiche, yer tewreshtin kéyin shayar nahiyelik ot öchürüsh etriti 2 aptomobil bilen 10 kishini yer tewresh merkizige bérip tekshürüsh élip bérishqa ewetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.