Австралийә парламентида “уйғур достлуқ гурупписи” қурулған

Австралийә парламентида 11-феврал күни “австралийә парламентидики барлиқ партийәләрниң уйғур достлуқ гурупписи” (AAPPGU) қурулғанлиқи елан қилинған.

“уйғур достлуқ гурупписи” ниң қурулуш хизмити өткән йили 12-айда елан қилинған болсиму, әмма 11-феврал күни австралийә парламентида өткүзүлгән паалийәт билән “уйғур достлуқ гурупписи” ниң қурулуши рәсмийләшкән. Вәзийәттин хәвәрдар кишиләрдин игилишимизчә, “австралийә парламенти уйғур достлуқ гурупписи” хизмәт күнтәртипиниң асаслиқ нишани, австралийә парламентиниң уйғур ирқий қирғинчилиқини етирап қилишини қолға кәлтүрүш, уйғур мәҗбурий әмгәк мәһсулатлириниң австралийә базириға киришини чәкләш қануни чиқириш, хитайниң зиянкәшликидин қечип йүргән уйғур мусапирлириға ярдәм қилишни өз ичигә алидикән.

Австралийәдики “тәңритағ уйғур аяллар уюшмиси” ниң билдүрүшичә, “уйғур достлуқ гурупписи” мәзкур уюшминиң тиришчанлиқи, австралийә кеңәш палата әзаси вә ташқий ишлар министири пәний воң (Penny Wong), парламент авам палата әзаси тонй запия (Zappia) вә андрев валлес (Andrew Wallace) қатарлиқ сиясийонларниң қоллиши һәм һәмкарлиқида вуҗудқа чиққан икән.

Америка, канада, японийә, әнгилийә қатарлиқ дөләтләрдин кейин, австралийә парламентидиму “уйғур достлуқ гурупписи” ниң вуҗудқа чиқиши, уйғур мәсилисини парламент вә һөкүмәтниң күнтәртипигә елиш келиштә зор әһмийәткә игә, дәп қаралмақта.

Мәлум болушичә, авам палата әзаси тоний запия билән андрев валес “австралийә парламентидики барлиқ партийәләр уйғур достлуқ гурупписи” ниң қош рәисликини үстигә алған. Тоний запия билән андрев валес, “уйғур достлуқ гурупписи” ниң рәсмий қурулуши мунасивити билән елан қилған баянатида, бу гуруппиниң мәқсити “австралийә вә дунядики уйғур җамаитигә тәсир қиливатқан мәсилиләрдә диялог қуруш, көңүл бөлүш вә диққәт қозғашни илгири сүрүш; ‛достлуқ гурупписи‚ниң партийәләр һалқиған һәмкарлиқи арқилиқ, кишилик һоқуқ, мәдәнийәтни қоғдаш, күчлүк маслишиш вә һәқиқий өзгириш елип келиш” икәнликини билдүргән.

“австралийә парламентидики барлиқ партийәләр уйғур достлуқ гурупписи”, австралийә “муһапизәтчи” гезитиниң йеқинда америка һөкүмити уйғур мәҗбурий әмгики сәвәбидин қара тизимликкә киргүзгән хитай ширкәтлириниң миңлиған мәһсулат түрлирини австралийәгә импорт қиливатқанлиқини ашкарилап, ғулғула қозғишиниң арқисидинла елан қилинди.