MRT Ахбарат гуруһи: “йеңи шинҗаңда мәсчитләр тақалған, тавапгаһлар чеқилған”

Америкадики MRT намлиқ бир ахбарат гуруһи өткән һәптә ‍өз мухбириниң уйғур елидә елип барған бир зиярәт хатирисини елан қилип, уйғур елидә мәсчит, тавапгаһ вә тарихий орунларниң қандақ бузғунчилиққа учраватқанлиқи, хитайниң сиясий саяһәт арқилиқ уйғурларниң реаллиқини қандақ бурмилаватқанлиқини ашкарилиған.

Зиярәт хатирисидә ейтилишичә, мухбир уйғур мәдәнийитидики һалқилиқ шәһәрләрниң бири болған қәшқәрдә 30 мәсчитни тапқан болсиму, лекин улардин пәқәт һейтгаһ җамәсини өз ичигә алған үчла мәсчит ‍өзлириниң ибадәтханилиқ хаслиқини сақлап қалған. Мухбир зиярәт хатирисидә қалған мәсчитләрниң корона вируси ваксина мәркизи, хатирә буюмлар дукини, қәһвәхана дегәндәк орунларға өзгәртилгәнлики, бир мәсчитниң хитай саяһәтчиләр үчүн оборнигә айланғанлиқини билдүргән.

Зиярәт хатирисидә йәнә бу әһвалниң ноқул қәшқәргә хас һадисә әмәслики, хотәндиму ‍охшаш әһвалниң мәвҗутлуқи, хотәндики әң қайнақ базарларниң бири болған ат базириниң түзлинип, йеқинда бағчиға айландурулғанлиқи вә бу йәрдики мәсчитниң ғайиб болғанлиқи билдүрүлгән.

Зиярәт хатирисидә ейтилишичә, мәзкур райондики қелип қалған бир қанчә мәсчит пәқәт җүмә намизиға ечилидикән, қалған вақитларда болса тақақ туридикән.

Зиярәт хатирисидә, бир хитай саяһәт йетәкчисиниң бир сөзи алаһидә нәқил кәлтүрүлгән. Бу саяһәт йетәкчиси мәсчитләр тақилип “яхши болғанлиқи” ни билдүргән. У: “исламда һәр бир қанчә аһалиниң бир мәсчити болушни тәләп қилиниду. Униң қурулуши вә асраш пулини шу мәһәллидикиләр төлиши керәк. Һазир бу мәсчитләр тақилип, пулини йиғалайдиған вә башқа ишларға мәбләғ қилип салалайдиған болди” дегән.