Gherb döletliri rehberliri musulmanlarning ramizan bayrimini tebriklidi

Washin'gtondin muxbirimiz jewlan teyyarlidi
2024.04.10

Yillardin buyan gherb elliri rehberliri öz dölitide we dunyaning her qaysi jaylirida yashawatqan musulmanlarning bayrimini tebriklep kéliwatqan bolup, shu qatarda dunyaning tinchliqi we güllinishige bolghan güzel tileklirini ipadiligen.

4-Ayning 9-küni roza héyt harpisida, amérika pirézidénti jow baydén bilen mu'awin pirézidént kamala harris X da uchur yollap, dunya musulmanlirining bu qutluq bayrimini tebrikleydighanliqini bildürgen. Aqsarayning X diki hésabida élan qilin'ghan bu tebrik sözide, “Baydin-harris hökümiti amérikadiki we pütün dunyadiki musulmanlarning ramizan bayrimini tebrikleydu. Roza héytinglargha mubarek bolsun!” déyilgen.

Uningdin bashqa, birleshken döletler teshkilatining bash katipi antoniyo gutérés (Antonio Guterres) X diki hésabida uchur yollap, dunyaning her qaysi jayliridiki musulmanlarning roza héytini tebriklep, yaxshi tileklirini bildürgen؛ shundaqla musulmanlarning hazirqi ehwaligha bolghan qayghusini ipadilep: “Ghezze, sudan we bashqa jaylardiki musulmanlar duch kelgen urush, achliq apetliridin yürikim yara, köpligen musulmanlar özining bu bayriminimu tüzükkine tebrikliyelmeywatidu” dégen.

En'giliye bash weziri rishi sunakmu X hésabida roza héyt munasiwiti bilen widiyoluq nutuq élan qilip, en'giliye we bashqa jaylardiki musulmanlarning bayrimini tebrikligen hemde en'giliye jem'iyitige töhpe qoshuwatqan musulmanlargha minnetdarliqini bildürgen.

Démokratiye we étiqad erkinlikige hörmet qilidighan bu döletlerning rehberliri dunya musulmanlirining muhim bayramliridin bolghan roza héytni tebriklewatqan bu künde, xitay hökümiti roza héyt tentenisini Uyghurlarning hayatidin yiraqlashturuwatqan bolup, uning aldida daghdughisini qilghan chokantal bayrimi bilen roshen sélishturma hasil qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.