Хитайда зиярәттә болған б д т ниң рәиси уйғурлар мәсилисини тилға алмиған

1-Февралдин башлап хитайда 4 күнлүк зиярәттә болған б д т омумий қурултийиниң рәиси чаба короси, хитай даирилири билән болған сөһбәттә уйғурлар мәсилисини тилға елип қоймиған. Анатолийә агентлиқиниң хәвәр қилишичә, чаба коросиниң баянатчиси паулина кубияк мухбирларға қилған сөзидә, “шинҗаңдики уйғур вә башқа мусулман милләтләрниң кишилик һоқуқиниң дәпсәндә қилиниши, коросиниң хитай даирилири билән болған музакириләрдә күнтәртипкә кәлмигәнлики” ни ейтқан. Чаба коросиниң 1-феврал башланған 4 күнлүк зияритиниң асаслиқ күнтәртипи хитайниң юқири дәриҗилик хитай әмәлдарлири билән тәтқиқатчилири билән учурушуп, изчил тәрәққият вә су вә иншаат қурулушлирини музакирә қилиш болған.

Анатолийә агентлиқиниң ейтишичә, коросиниң баянатчиси паулина кубияк 2-феврал мухбирларға қилған сөзидә, коросиниң “бүгүн бейҗиңда ваң йи билән көрүшкәнлики” вә “хитайниң б д т дики рәһбәрлик роли, униң хәлқләрни вә йәршарини қоллаш тиришчанлиқиға рәһмәт” ейтқанлиқини билдүргән. У йәнә сөһбәттә хәвпсизлик кеңишиниң ислаһати, украина уруши, униң йәршари иқтисадиға болған тәсири қатарлиқ мәсилиләрниңму музакирә қилинғанлиқини ейтқан. Лекин паулина кубияк анатолийә агентлиқи мухбириниң сөһбәттә коросиниң немә үчүн кишилик һоқуқ дәпсәндичиликини оттуриға қоймиғанлиқи һәққидики бир соалиға: “кишилик һоқуқ мәсилиси музакирә қилинмиди, чүнки бу униң күнтәртипидики мәсилә әмәс” дәп җаваб бәргән. Униң көрситишичә, хитай сәпири рәсмий зиярәт болуп, бу су мәсилидики изчил тәрәққиятни мәқсәт қилған” икән.

Лекин чаба короси б д т кишилик һоқуқ алий комиссари ишханисиниң өткән йили елан қилған доклатида, хитайниң уйғурларға қарита “инсанийәткә қарши җинайәт садир қилған болуши мүмкинлики” ни ейтқан болсиму, униңға көз юмуш билән әйиблинип келиватқан бирдин-бир әмәлдар әмәс. Б д т баш катипи антонио готерресму буниңға сүкүт қилиш билән әйиблинип кәлгән.